E sa qai dolava wale ga qo na valenivolavola ni tabana e Nigeria e rua na koronivuli ni vuli vakalou. Ena vakayacori vakalevu kina na vuli ni Koronivuli ni iTalatala ni Matanitu ni Kalou (SKE). E dua vei rau na koronivuli, e tiko ena tauni o Uli e Nigeria qai tekivu na vuli ena Feperueri 2023. Na ikarua ni koronivuli e tiko ena siti o Ibadan e Nigeria, qai tekivu caka kina na vuli ena ika2 ni June 2023. Ena vakayacori tale ga ena rua na koronivuli qori na nodra vuli na iVakatawa ni Tabacakacaka kei na Watidra.

E taravaki na rua na koronivuli qori volekata na Vale ni Soqoni Lelevu. E tiko kina e dua na vale ni vuli, na laibri kei na nodra icili na tacida era vuli. Ena veiyabaki e sivia na le 500 e Nigeria era vakalewena na nodra fomu mera vuli ena SKE. Ena loma ni dua na yabaki, e namaki me caka ruarua ena koronivuli qori e va na vuli. Ena vakarautaki ena vosa vakavalagi, vakaIgbo, vakaPidgin (Ra kei Aferika), kei na vosa vakaYoruba.

Era vola na gonevuli era se qai vuli oti ga ena SKE e Uli, e dua na nodra ivola ni vakavinavinaka. Era marautaka na totoka kei na vakadigagalu ni koronivuli. Era vola: “Keimami marautaka na neimami vuli, ni totoka na vanua e tiko kina na koronivuli kei na vanua keimami vakaicili kina. Keimami vakila tale ga na loloma vaKarisito ena nodra ivakaraitaki ni gugumatua na tacida era veivuke ena gauna ni vuli.”

Eda nuidei ni na yaga vakalevu vei ira na tacida e Nigeria na koronivuli vou qo mera ‘vakacavara vinaka na nodra cakacaka vakaitalatala.’—2 Timoci 4:5.