“N’ y’a ɲini ka Bibulu kalan. Nka n’ fari fagara sabu n’ y’a ye ko a ka jan kojugu!”—Briana, saan 15.

 Ele fana b’o lo miiri wa? N’o lo, barokun nin be se k’i dɛmɛ!

•  Mun na i ka ɲi ka Bibulu kalan?

•  Fɛɛrɛ jumanw lo be se ka n’ dɛmɛ ka Bibulu kalan?

•  I filankuruw be min miiri

 Ka Bibulu kalan, yala o miiriya dama b’i fari faga wa? N’o lo, o be faamu. N’a sɔrɔ i b’a miiri ko Bibulu kɔnɔnakumaw ka ca kojugu, ko a sɛbɛriw ka dɔgɔ dɔgɔ kojugu ani ko jaa foyi t’a la. O kama i b’a miiri ko ka telewisɔn ni videwow filɛ, o ka fisa ka Bibulu kalan!

 Nka, miiri nin na: N’i bɔra kɛsuba kɔrɔ kɔrɔ dɔ kan min fanin lo nafolofɛnw na, yala i tɛna a ɲini k’a yɛlɛ walisa k’a lɔn min b’a kɔnɔ wa?

 Bibulu be i n’a fɔ o kɛsuba. Hakilitigiya kuma caaman lo b’a kɔnɔ minw bena i dɛmɛ:

•   Ka desizɔn ɲumanw ta

•   Ka ele n’i bangebagaw kaan bɛn

•   Ka teri ɲumanw sɔrɔ

•   Ka dusukasi muɲu

 Mun na o gafe kɔrɔ ɲɔgɔn be se ka an nafa bɛrɛbɛrɛ an ka wagati la? Sabu “Ala ka kuma bɛɛ sɛbɛnna Ala yɛrɛ ka sebagaya barika la.” (2 Timote 3:16). O kɔrɔ ko ladili minw be sɔrɔ Bibulu kɔnɔ, o tigi ɲɔgɔn tɛ yen.

 Fɛɛrɛ fɔlɔ: Bibulu kalan, k’a ta a daminɛ fɔɔ a laban. O bena i dɛmɛ k’a faamu Bibulu kuturu bɛɛ be kuma min koo la. An be se ka Bibulu kalan cogo caaman na. An ka cogo fila lajɛ:

•    Bibulu ka kitabu 66 nunu be tugu tugu ɲɔgɔn kɔ cogo min na, i be se k’a latigɛ k’u kalan ten, k’a ta Zɛnɛzi fɔɔ ka taga se Yirali ka kitabu ma.

•    Koow lakalila ka tugu tugu ɲɔgɔn kɔ cogo min na Bibulu kɔnɔ, i be se k’a latigɛ ka Bibulu kalan ka kɛɲɛ n’o ye.

 Ladili dɔ: Koo jɔnjɔn minw kɛra Yezu ka ɲɛnamaya la tuma min na a tun be dugukolo kan, u lakalila Appendice A7 yɔrɔ la Traduction du Monde Nouveau kɔnɔ.

 Fɛɛrɛ 2nan: Bibulu ka maana dɔ sugandi min be kuma gwɛlɛya dɔ koo la ani o gwɛlɛya ɲɔgɔn b’i kan. Misali la:

•   Yala i b’a fɛ ka teriw sɔrɔ i be se ka la minw na wa? Zonatan ni Dawuda ka maana kalan (1 Samuyɛli sapitiri 18-20). O kɔ, barokun nin lajɛ jw.org kan: “Comment se faire des ami fidèles” (Teri sɔbɛw sɔrɔcogo). A bena i dɛmɛ k’a lɔn i be se ka kalan nafaman minw sɔrɔ o maana na.

•   I b’a fɛ ka see sɔrɔ koɲuman kɔrɔbɔliw kan wa? Yusufu ka maana kalan. I bena a ye cogo min na a ye see sɔrɔ kɔrɔbɔli kan (Zɛnɛzi sapitiri 39). O kɔ, barokun nunu lajɛ jw.org kan k’a filɛ i be se ka kalan nafaman minw sɔrɔ o maana na: “Comment résister à la tentation . . . Joseph— 1^re partie” ani “Accusé à tort! Joseph— 2^e Partie.”

•   I b’a fɛ k’a lɔn delili be se k’i dɛmɛ cogo min na wa? Nehemi ka maana kalan (Nehemi sapitiri 2). O kɔ, barokun nin lajɛ k’a filɛ i be se ka kalan nafaman minw sɔrɔ o maana na: “Dieu a répondu à sa prière.”

 Ladili dɔ: N’i be Bibulu kalanna, i janto ka kɛ yɔrɔ min na mankan tɛ yen. O la, i bena se k’i hakili sigi.

 Fɛɛrɛ 3nan: Bibulu ka maana wala Zaburu dɔ sugandi k’a kalan. O kɔ, miiri k’a filɛ o ɲɛsinnin be i ma cogo min na. N’i y’a kalan ka ban, i yɛrɛ ɲininga ko:

•    Mun na Jehova y’a kɛ o sɛbɛra Bibulu kɔnɔ?

•    O be mun lo yira n’ na Jehova ka jogow n’a ka kokɛcogow koo la?

•    N’ be se k’o sira tagama cogo di n’ ka ɲɛnamaya la?

 Ladili dɔ: Laɲinita dɔ latigɛ! A sɛbɛ loon min na i b’a fɛ k’a daminɛ ka Bibulu kalan.