Loon dɔ sufɛ, masacɛ Nebukadnezar ye siko kabakoman dɔ kɛ. O y’a hakili ɲagami haali, fɔɔ a tun tɛ se ka sinɔgɔ. A y’a ka jinamoriw weele k’a fɔ u ye ko: ‘Aw ye n’ ka siko kɔrɔ fɔ n’ ye.’ U ko: ‘An matigi, i ka siko lakali an ye.’ Nka Nebukadnezar y’a fɔ u ye ko: ‘Ayi! Aw ka n’ ka siko lakali n’ ye, n’o tɛ, n’ bena aw faga.’ U tilara k’a fɔ a ye ko: ‘I ka siko lakali an ye. O kɔ, an bena a kɔrɔ fɔ i ye.’ A ko: ‘Aw bɛɛ b’a ɲinina le k’a n’ lafili. Aw ye n’ ka siko lakali n’ ye!’ U y’a fɔ masacɛ ye ko: ‘Mɔgɔ si tɛ yen min be se k’o kɛ. I be min ɲinina, o tɛ se ka kɛ.’

Nebukadnezar dimina kosɔbɛ, fɔɔ a ye cii di ko cɛɛ hakilitigi minw be yen, u k’u bɛɛ faga. Daniyɛli, Sadiraki, Mesaki ni Abɛdenego fana niin tun b’a la. Daniyɛli y’a ɲini masacɛ fɛ a ka wagati damanin di ale ma. O kɔ, ale n’a teriw ye Jehova deli a k’u dɛmɛ. Jehova ye mun lo kɛ do?

Jehova ye Nebukadnezar ka siko n’a kɔrɔ yira Daniyɛli la yelifɛn dɔ la. O dugusagwɛ, Daniyɛli tagara a fɔ masacɛ ka jɔncɛ ye ko: ‘Kana cɛɛ hakilitigi si faga. Ne be se ka masacɛ ka siko ɲɛfɔ a ye.’ Jɔncɛ tagara ni Daniyɛli ye Nebukadnezar fɛ. Daniyɛli y’a fɔ masacɛ ye ko: ‘Ala ye koo nataw yira i la. I ka siko filɛ nin ye: I ye jaa belebeleba dɔ ye min kungolo ye sanulaman ye. A disi n’a bolow ye warigwɛ ye, kɔnɔbara ni wotow ye ziralaman ye. A senkalaw ye nɛgɛlaman ye, a sentɛgɛ yɔrɔ dɔw ye nɛgɛlaman, yɔrɔ dɔw ye bɔgɔlaman ye. O kɔ, kabakuru dɔ bɔra kulu kan ka na o jaa gosi a sentɛgɛw la. O jaa mugumugura ani fɔɲɔ y’a ta ka taga n’a ye. Kabakuru min y’a gosi, o yɛlɛmana ka kɛ kuluba ye ka dugukolo yɔrɔ bɛɛ ta.’

 O kɔ Daniyɛli ko: ‘I ka siko kɔrɔ filɛ nin ye: ‘I ka masaya lo ye kungolo sanulaman ye. Warigwɛ ye masaya dɔ ye min bena wuli ele ta kɔ. O kɔ, masaya wɛrɛ bena wuli min be i n’a fɔ ziranɛgɛ. O masaya bena dugukolo bɛɛ mara. Min bena wuli o kɔ, ale fanga bena bonya i ko nɛgɛ. A laban, masaya dɔ bena wuli, farali bena kɛ min kɔnɔ: a faan dɔw fanga bena bonya i ko nɛgɛ, a faan wɛrɛw fanga bena dɔgɔya i ko bɔgɔ. Kabakuru min yɛlɛmana ka kɛ kulu ye, o ye Ala ka Masaya lo ye. A bena o masayaw bɛɛ ɲɔɲɔ ani ale yɛrɛ bena to yen fɔɔ abada.’

Nebukadnezar benna Daniyɛli ɲɛfɛ, a ɲɛɛ birinin duguma. A ko: ‘I ka Ala ye siko nin yira i la. Ale Ala ɲɔgɔn tɛ yen.’ Sanni a ka Daniyɛli faga, Nebukadnezar y’a kɛ lɔnnikɛlaw bɛɛ kuntigi ye ani a y’a sigi Babilonɛ mara bɛɛ kun na. I y’a ye Jehova ye Daniyɛli ka delili jaabi cogo min na wa?