Yehova * Loba nde a latise̱ diba laboso. Bibe̱l e malangwea biso̱ ná a weki mut’a boso na mo̱ “a wanea moto mo̱.” Adam a bo muńe̱nge̱ jita na mo̱ a kwala ná: “Nun so̱ nde e ewes’a bewese bam n’eyobo a eyobo am.” (Bebotedi 2:22, 23) ­Yehova a dia a mapula ná mome na muto be o ndabo a diba ba be̱ bonam.

Ombusa latise̱ la diba lo̱ngo̱, wená wo̱nge̱le̱ ná mambo me̱se̱ ma me̱nde̱ nde be̱ bwam mo̱ na mo̱. Nje ye mbale̱ ye nde ná, to̱ mome na muto ba to̱ndo̱ne̱le̱ nde to̱ nē̱ bena ba wana myambo. (1 Korinto 7:28) O me̱nde̱ so̱ o nin kalati nisadi bete̱sedi ba Bibe̱l bena be mongwane̱ diba lo̱ngo̱ na ndabo ango̱ ńa mbia o be̱ bonam yete̱na o we̱le̱ mo̱ o ebolo.—Myenge 19:9-12.

NJE BIBE̱L E MAKWALANO̱: Mome nde e mulopo ma ndabo a mbia.—Efeso 5:23.

Yete̱na we nde mubaedi, Yehova a mengane̱ wa ná o le̱le̱ munj’ango̱. (1 Petro 3:7) A weki nde mo̱ ná a be̱ mongwaned’ango̱, ońola nika a mapula ná o bongwe mo̱ n’edube na ndolo. (Bebotedi 2:18) Wangame̱ne̱ o be̱ne̱ne̱ munj’ango̱ ndol’a ńo̱ngo̱ńo̱ngo̱ ńai weno̱ be̱be̱ o se̱le̱ pulise̱ bwam bao denge̱ bo̱ngo̱.—Efeso 5:25-29.

Yete̱na we nde muto nu babe̱, Yehova a mengane̱ wa ná o bole mom’ango̱ edube ende̱ne̱ na jongwane̱ pe̱ mo̱ o londise̱ mbe̱ mao. (1 Korinto 11:3; Efeso 5:33) Sue̱le̱ bedomsedi bao na mulema mo̱ngo̱ mwe̱se̱, nde wongwane̱ pe̱ mo̱ esibe̱ to̱kisane̱. (Kolose 3:18) O boli te̱ nika, o me̱nde̱ be̱ mut’a bede̱mo ba bwam o miso̱ ma mom’ango̱ na ma Yehova.—1 Petro 3:1-6.

NJE WENO̱ NÁ O BOLA:

• Baise̱ mom’ango̱ to̱so̱ munj’ango̱ nje wangame̱ne̱no̱ bola ná o be̱ mome to̱so̱ mut’a bwam. Lambe̱ye̱ mo̱ toi, o bole pe̱ me̱se̱ ná o po̱ngulane̱ bede̱mo bo̱ngo̱

• Be̱ we̱lisane̱. Nika e me̱nde̱ no̱ngo̱ ponda ná mō̱ ńańu te̱ okwe bia ne̱ni eno̱ ná a bwese̱ nune̱ muńe̱nge̱

NJE BIBE̱L E MAKWALANO̱: Wangame̱ne̱ o pulise̱ bwam ba mom’ango̱ to̱so̱ munj’ango̱. (Filipi 2:3, 4) Bongwa mo̱ ka lambo la tiki, o̱nge̱le̱ pe̱ ná Yehova a mengane̱ bautu bao ná ba “be̱ nde muyao na be̱se̱.” (2 Timoteo 2:24) “Eto̱pe̱to̱pe̱ ye bowoli ka po̱, eyem’a ba dibie̱ e majesane̱ bwam.” Ońola nika no̱ngo̱ ponda o po̱so̱ byala bo̱ngo̱. (Minia 12:18) Mudī ma Yehova mu me̱nde̱ jongwane̱ wa ná o to̱pe na ndolo na muyao.—Galatia 5:22, 23; Kolose 4:6.

NJE WENO̱ NÁ O BOLA:

• Kane̱ ná o kuse jongwane̱ o be̱ pī na be̱ pe̱ ńai ni mapule̱ o so̱ṅtane̱ nune̱, obiana o makwalea ońola lambo le mweńa na mom’ango̱ to̱so̱ na munj’ango̱

• No̱ngo̱ ponda o dutea o nje o me̱nde̱no̱ to̱po̱ na ne̱ni o me̱nde̱no̱ kwalea mo̱

NJE BIBE̱L E MAKWALANO̱: Ombusa latise̱ la diba lo̱ngo̱, bińo̱ na mom’ango̱ to̱so̱ munj’ango̱ lo mabe̱ nde “eyobo ewo̱.” (Mateo 19:5) Tona nika, bińo̱ lo dia te̱nge̱ nde bato baba bena bená ba be̱ne̱ mo̱nge̱le̱ me diwengisan. Ońola nika bińo̱ langame̱ne̱ jokwa be̱ mulatako o mo̱nge̱le̱ mańu nikame̱ne̱ pe̱ na o besengedi bańu ba mulema. (Filipi 2:2) “Dia diwo̱ di si makaka dibomba.” Mulatako mwe mweńa ońola no̱ngo̱ la bedomsedi. Bibe̱l e makwala ná: “mulatako ma mo̱nge̱le̱ ma bwam nde mu matongwe̱le̱ myano.” (Minia 20:18, NW.) Bińo̱ ese̱le̱ ná bete̱sedi ba Bibe̱l be die̱le̱ bińo̱ ke̱ lo mano̱ngo̱ bedomsedi ba mweńa mwemba.—Minia 8:32, 33.

NJE WENO̱ NÁ O BOLA:

• O si langwea mom’ango̱ to̱so̱ munj’ango̱ mambo omo̱ń na mo̱ń, nde bola ná a bie besengedi bo̱ngo̱ ba njiba

• Se̱le̱ baise̱ jo̱nge̱le̱ la mom’ango̱ to̱so̱ munj’ango̱ obiana o mano̱ngo̱ ngaban o bola lambo