MIRIAM NA DANIEL ba bane̱ nde o mo̱di má Ńe̱te̱ki 2000 na babo̱ ba ja o mundi ma Barselona o Pańa. Daniel mo̱ ná: “Di ta di be̱ne̱ longe̱ la bwam, na bebolo be ta bongwane̱ biso̱ o da o bepolo ba mada ba bwam, o wala o lo̱ndo̱ o mwe̱n ekombo, na bo̱to̱ pe̱ mbo̱t’a bwam. Di ta pe̱ di te̱ dikalo ponda ye̱se̱.” Na mambo ma tukwa.

O jako̱to̱ne̱ la 2006, min myuedi mi ta mi baisabe̱le̱ o ekwali ewo̱: “Mo̱ je o we̱ na ngińa o jongwane̱ ba ‘ba madiabe̱le̱ o kwedi’ ná ba dangwe o nge’a longe̱ la bwindea e?” mi ta mi tapa mulema ma Daniel. (Min. 24:11) Y’ekwali e ta e kika m’bē̱ di be̱nno̱ o bīse̱ mwe̱ndi ma besungedi ma Bibe̱l. (Bebolo 20:26, 27) Daniel a dia a mo̱nge̱le̱ ná, “Na sengi nde na mbame̱ne̱ ná Yehova a ta nde a kwalisane̱ mba.” Y’ekwali e ta pe̱ e kika ná wala te̱ dikalo wuma ipe̱pe̱ di mawana muńe̱nge̱ munde̱ne̱. Daniel a ta a bia ná nika ńe mbale̱.Miriam a ta a mábotea ebol’a paonia na kusa pe̱ jita la minam.

Daniel mo̱ ná: “Na mba na domse̱ ná ponda e mápo̱ o wana diwengisan dinde̱ne̱ o longe lam.” A bola pe̱ nika. A wutise̱ háw’ao y’ebolo, a botea ebol’a paonia, a dutea pe̱ muńe̱nge̱ bā na Miriam ba me̱nde̱no̱ be̱ne̱ o bolea we̱ni ńo̱ng’a bate̱ dikalo la Janea ńeno̱ jita.

O mo̱di má Emiase̱le̱ 2007, Daniel na Miriam bese̱le̱ ebol’abu, bala o Panama, mundi ba tano̱ ba máse̱le̱ pe̱pe̱le̱. Epoloso abu ya dikalo ya peńa e ta e be̱ne̱ byondi jita o Bokas del Toro Arkipelago o munja ma Karaib, be̱n ba bato ba Guaymi nde ba ta ba ja oten dongo dinde̱ne̱. Daniel na Miriam bo̱nge̱le̱ ná ekoted’abu ya mo̱ni e wusa jongwane̱ babo̱ ja o Panama lambo ka myo̱di lo̱mbi.

Ba po̱i nde na medi ma munja, nde ba ta pe̱ ba bolane̱ medi ma mundi o yenga o be byondi be̱se̱; nika ńo̱nge̱le̱ babo̱ nged’a boso ba duane̱no̱ medi o bwaba ba lo̱ndo̱ ba lambo ka 32 Km o midongo na owas’a wei a ngińa. Daniel a ta a wo̱lo̱ kańena a bo̱le̱ nde o ko̱. Nde mbia ma Guaymi ba tano̱ ba dongame̱n mi ta mi bia kasa be̱n, sepo̱n ponda bokono̱ ngus’a byala ba y’eyem’a bwambo. Ba ta ba mábe̱ne̱ 23 ma mokwa ma Bibe̱l

Ponda ekoted’abu e bo̱ino̱, ba si ta pe̱ muńe̱nge̱. Daniel mo̱ ná: “Na miso̱di o miso̱, di botedi o dutea ne̱ni timba o Pańa. Di bo ndutu jita o dia bautu basu ba jokwa la Bibe̱l.” Nde, ombusa mo̱di mō̱, na babo̱ ba kusa mwe̱ndi ma muńe̱nge̱ munde̱ne̱. Miriam mo̱ na: “Di ta di belabe̱ o be̱ bate̱ dikalo ba pond’a mususu ńa tobotobo. Se̱ muńe̱nge̱ di bono̱ o ja o epolo asu ya dikalo!”

O mbu 2015, ombusa mawengisan ma po̱i o bebokedi, e ta e baisabe̱le̱ Daniel na Miriam ná balane̱ ebolo oboso ka paonia ya pond’a mususu. Nje bola e? Ba ta ba lakisane̱ kakane̱ di nanga o Myenge 37:5: “Bake̱ Yehova mangea mo̱ngo̱, pite̱ pe̱ na mo̱, nde mo̱ a me̱nde̱ yue̱le̱ mo̱.” Ba kusi ebolo e mongwane̱ babo̱, we̱nge̱ ba mabolea o mwemba mō̱ ma mundi ma Veraguas, Panama.

Daniel mo̱ ná: “Obiana di masumwe̱ o Pańa, di si ta mbaki ná je ná di be̱ne̱ longe̱ di wam. Nin we̱nge̱, di be̱n mo̱, di be̱ne̱ pe̱ nje ye̱se̱ e mapule̱.” Nje so̱ ye muńe̱nge̱ mabu mu peti e? Bā ná, “Jongwane̱ la ba mulema musibi o bia Yehova le nde muńe̱nge̱ mu si be̱n elangisan!”