E, a me̱nde̱ jalabe̱. Bibe̱l na myango ma longe̱ la bato ba malee̱ ná Loba a malabe̱ mika. Bibe̱l e makwala ná: “[Loba] a malonde̱ mpuli ma ba ba mabwe̱ mo̱ bo̱ngo̱, a masenga mbemb’abu, a mongwane̱ babo̱.” (Mye 145:19) Nde mambo mō̱ me wangame̱nno̱ bola ná Loba alabe̱ wa yete̱na o kane̱ mo̱.

Nje ye Loba mweńa

•   Jangame̱n nde kane̱ Loba seto̱ Yesu, Maria, basangedi, ange̱l, to̱ njimbidi. Yehova Loba mo̱me̱ne̱ mō̱ nde e nu “nu masenge̱ mika.”—Mye 65:3.

•   Mika masu mangame̱n nde be̱ mulatako na jemea la Loba lena di maso̱be̱ o Bibe̱l.—1 Yohane 5:14.

•   Jangame̱n kane̱ o dina la Yesu, na nika di mabola mo̱ edube. Yesu a kwali ná: “To̱ moto a si mapo̱ na Tete̱ esibe̱ tongwea na mba.”—Yohane 14:6.

•   Jangame̱n kane̱ na mbaki ńe̱se̱, di baise̱ pe̱ Loba ná a bateye biso̱ dube̱ yete̱na nik’e mapula.—Mateo 21:22; Lukas 17:5.

•   Jangame̱n be̱ne̱ sibise̱ la ńolo, di be̱ pe̱ mbale̱. Bibe̱l e makwala ná: “Yehova asam, a mombwea moto nu sibi.”—Mye 138:6.

•   Jangame̱n be̱ titimbe̱. Yesu a kwali ná: “[Benga] ue̱le̱, nde di mabolabe̱ bińo̱.”—Lukas 11:9.

Nje e titi Loba mweńa

•   Muso̱no̱ mo̱ngo̱ m’eyobo to̱ ekombo ango̱. “Loba a titi ndando; nde o tumba te̱ nu nu mabwe̱ mo̱ bo̱ngo̱, a bola pe̱ te̱me̱ la sim, a makasabe̱ na mo̱.”—Bebolo 10:34, 35.

•   Mbadi o mate̱me̱no̱ ke̱ we o kane̱. We ná o kane̱ Loba ke̱ o jai, ke̱ o nungame̱, ke̱ o nunge̱ mabo̱ngo̱, to̱ ke̱ o te̱m.—1 Myango 17:16; Nehemia 8:6; Daniel 6:10; Marko 11:25.

•   We te̱ kane̱, we ná o pase̱le̱ byala to̱so̱ we ná o kane̱ o mulema. Loba a malabe̱ nate̱na mika mena di makane̱no̱ ke̱ bane̱ bato ba titi senga.—Nehemia 2:1-6.

•   To̱ e be̱ ná mitakisan mo̱ngo̱ me bonde̱ne̱ to̱ ndutu jita. Loba a mome̱le̱ wa ná o “bambe̱le̱ mo̱ mutaka [mo̱ngo̱] mwe̱se̱, ebanja a mombwea [wa].”—1 Petro 5:7.