˗KA ˗YA KA ˈˈYAAN!
Mɛn ˗nu ˗bha ˗zoyö ˈˈsɛkɔɔmɛn ˗nu ˗dhɛ ˗sü ˗yö ˈdho ˗ni ˈgü ˈˈshia˗: ˈMën Biblö ˗ya pö?
Vote ꞊va ꞊dede ˗dho kë ˗kwɛ 2024 ˈgü ˈˈkpɔnŋtaadhɛ ˗todhʋ̈sü ˈgü. ˈˈKɛɛ ˈkö kë ˈˈdhʋ̈, mɛn ˗nu ˗bha ˗zoyö ˈˈsɛkɔɔmɛn ˗nu ˗dhɛ ˗sü ˗yö ˈdho ˗ni ˈgü ˈˈshia˗.
˗Mlɛɛnkɛn ꞊vadhɛ ˈö ˈwo ˈwɔn ˗nu ˈˈpiʋ̈ pɔn, ˗wa ˗pö ꞊dhɛ «ˈˈsɛkɔɔmɛn ꞊vadhɛ ˗wo wo ˗zota woo dosɛnŋ ꞊nën wo ˗wɔn ˈgü.» ˈWaa wo ˗zota ˗an ˗bha ˈˈsɛgümɛn ˗nu ˗wɔn ˈgü. a—˗Kwɛ 2023 Sɛtanblö 19, Pew Research Center.
Wlüünën ꞊vadhɛ ˈwaa wo ˗zoyö ˈpö ˈˈsɛkɔɔmɛn ˗nu ˗dhɛ.
«꞊Dɛɛ, pë ˈö wlüünën ˗nu ꞊vadhɛ ˗gɔ ˈgü ˈyö ˗tɔ ˈwɔn ˈˈgbɩɩ˗ ˗nu ˈˈɲan bhɔ ˗sü. ˈˈKɛɛ ˗dhɛ ˈö ˈwo ˗an dhɛɛˈˈ kpɔ, ˗wa ˗pö ꞊dhɛ ˈˈsɛkɔɔmɛn ˗nu ˈwaa ꞊mɔɔn˗ ˗bha kö ˗wo ˈwɔn ˈˈgbɩɩ˗ ˗nu bhë, ˗an ˈˈɲan bhɔ wo ˗dhɛ.»—˗Kwɛ 2024 Zanvie 29, The New York Times.
«ˈWɔnsuanbhomɛn ˈbha ˗nu ˗wa ˗pö ꞊dhɛ wlüünën ꞊vadhɛ ˗bha ˈdhaŋ˗ ˗bho mɛn ˗nu ˈwo video ˗nu ˗ya ɛntɛnɛtö ˗ta ˗an ˈˈdhiʋ̈ ˗sü ˗yö ˗ʒiö ˗an ˗bha ˈdhaŋ˗ ˗bho ˈˈsɛkɔɔmɛn ˗nu ˈˈdhiʋ̈ ˗sü ˗ta.»—˗Kwɛ 2024 Zanvie 22, The Korea Times.
˗Yö ga ˗sü ˈka kwa ˈgü ꞊dhɛ ˈˈsɛkɔɔmɛn ˗nu ꞊mɔɔn˗ ˗bha ˈwo kwa ˗bha ˗dhɛkpaɔ dhiʋ̈ˈˈ kë ˗së ˗ee? ˈDe ˈkwa ꞊mɔɔn˗ ˗bha ˈkwa kwa ˗zoyö ˗a ˗dhɛ ꞊dedewo?
˗Kwa mɛn ˗nu ˈö ˈkwa dho kwa ˗zoyö ˗an ˗dhɛ ˗an ˗ga ˗së ˈka
˗Yö ˗së kö mɛn ˗nu ˈö ˈkwa dho kwa ˗zoyö ˗an ˗dhɛ, ˈkwa ˗an ˗ga ˗së ˈka. Biblö ˗ya ˗pö: «Mɛn ˈö ˗tamansü ˗yö ˈdhaŋ˗ ˗bho ˈwɔn ˈˈpɛpɛ ˈwo˗ ꞊blɛɛ ˗a ˈˈdhiʋ̈, ˈˈkɛɛ mɛn ˈö ˈwɔn ˗nu ˗kë ö ˈsuan˗ ˈka, ˗yö ö ˗gɛn yödhɛ ˗ga ˗së ˈka.»—Proverbes 14:15.
ˈBha˗ pö ˈü ˈˈslö ˗nu ˈwo dho ü ˗takun kö nɔɔn˗ ˗nu ˈü ˗an man, ˗a ˗dhɛ ˈö gagade ˈka ˈü˗ dɔ, ˗bhö ˈwɔn ˗gɔ « Protégez-vous de la mésinformation » ˗wo pö.
Gagade ˈbha ˈö ˈdhö ˈyö ˗tɔ ˈˈsɛkɔɔmɛn ˈbha yöö kë kpɛnŋdhö ˗kɔ ˈˈʋʋ ˗kɔ ˈgü, ˈyaa ꞊mɔɔn˗ ˗bha kö ˈwɔn ˗së ˈˈpɛpɛ ˈö˗ ˗zo ˈˈpiʋ̈, ˗a kë. Biblö ˗ya ˗pö:
«ˈKa ˈdho ka ˗zoyö ˗gblüdë gbö ˗nu ɛɛnˈˈ mɛnbhɩɩdhe ˗dhɛ, ˈyö ˈtɔ˗ ˈyaa ꞊mɔɔn˗ ˗bha kö ˗yö mɛn dha.»—Psaume 146:3.
ˈˈDhiʋ̈sümɛn ˈö ˈkwa ꞊mɔɔn˗ ˗bha ˈkwa kwa ˗zoyö ˗a ˗dhɛ
Biblö ˗ya ˗pö ꞊dhɛ ˗Zlan ˗ya ö ˗kɔ ˈˈyɛ ˈˈdhiʋ̈sümɛn ˈbha ˈö ˗kɔmɔnwɔnbhasü ˈdhö˗ ˗gɔ, ˈö ˈkwa ꞊mɔɔn˗ ˗bha ˈkwa kwa ˗zoyö ˗a ˗dhɛ ˗a ˗bha. ˗A ˗mɛn ˈö ˈˈdhʋ̈ ˈyö ˗tɔ Yesu Klito. (Dhukö 1:32, 33) Yesu ˈnën ˗tɔ ˗Zlan ˗bha ˗Gblüdëdhɛ ɛɛnˈˈ ˗a ˗bha mɛnkɔɔnsü ˈö dhaŋ˗ ˈgü ˗a ˗Gɔdhiʋ̈mɛn.—Matiö 6:10.
ˈPë ˗kë ˈkwa ꞊mɔɔn˗ ˗bha ˈkwa kwa ˗zoyö Yesu ˗dhɛ waa pë ˈö dho ˗a kë kö ˗yö kwa ˗bha ˈwɔn ˈˈgbɩɩ˗ ˗nu ˈˈɲan bhɔ, ˗bhö ˗a ˗ga. ˗Bhö ˈwɔn ˗gɔ ˗nu « Qui est le Roi du royaume de Dieu ? » waa « Que fera le royaume de Dieu ? » ˗wo pö.
a ˗Kwɛ 2023 Sɛtanblö, Pew Research Center, “Americans’ Dismal Views of the Nation’s Politics.”