LO KOUVERTIR | ESKI OU TI A KONTAN ETIDYE LABIB?

Akfer etidye Labib?

Ki bi nou lavi?

Akoz dimoun i soufer e mor?

Ki lavenir i rezerve pour nou?

Eski Bondye i enterese avek mwan?

Eski ou’n deza demann ou lekor bann kestyon koumsa? Si i leka, ou pa tousel. Dimoun partou dan lemonn pe reflesir lo sa bann kestyon pli enportan dan lavi. Eski ou kapab trouv larepons?

Plizyer milyon dimoun ti pou dir, “Wi!” Akoz? Parski zot i’n trouv bann larepons satisfezan dan Labib pour zot bann kestyon. Eski ou ti pou kontan konn sa ki Labib i dir? Si wi, petet ou ti a kontan benefisye atraver en letid Labib gratwit ki ganny ofer par Temwen Zeova. *

I vre, konsernan etidye Labib, serten dimoun i dir “Mon tro okipe.” “I tro difisil.” “Mon pa pou sanz mon larelizyon.” Me lezot dimoun i annan en lot pwennvi. Zot sezi sa loportinite pour aprann sa ki Labib i dir. Annou vwar serten legzanp:

“Mon ti al legliz Katolik ek Protestan, tanp Sik ek monaster Boudis e mon ti etidye teolozi dan liniversite. Pourtan, en kantite mon bann kestyon lo Bondye pa ti ganny reponn. Apre sa, en Temwen Zeova ti pas kot mwan. Mon ti vreman enpresyonnen par son bann larepons ki ti baze lo Labib, alor mon ti dakor pour etidye Labib.”​—Gill, Langleter.

“Mon ti annan bokou kestyon konsernan lavi, me mon pa ti satisfe avek bann larepons ki paster mon legliz ti donnen. Par kont, en Temwen Zeova ti reponn tou mon bann kestyon zis an servan Labib. Kan i ti demann mwan si mon ti a kontan aprann plis, mon ti aksepte avek plezir.”​—Koffi, Benen.

“Mon ti kirye konsernan kondisyon bann mor. Mon ti krwar ki bann mor ti kapab fer ditor bann ki vivan, me mon ti anvi konnen sa ki Labib i dir konsernan sa. Alor mon ti konmans etidye Labib avek en zanmi Temwen Zeova.”​—José, Brezil.

“Mon ti esey lir Labib me mon pa ti kapab konpran li. Apre, Temwen Zeova ti pas kot mwan e zot ti eksplik klerman plizyer profesi dan Labib. Mon ti anvi gete kwa ankor ki mon ti kapab aprann.”​—Dennize, Meksiko.

“Mon ti demann mon lekor si Bondye ti vreman enterese avek mwan. Alor mon ti deside pour priy avek sa Bondye ki Labib i koz lo la. Son landmen Temwen Zeova ti pas kot mwan e mon ti aksepte en letid Labib.”​—Anju, Nepal.

Sa bann leksperyans i fer nou rapel bann parol Zezi: “Ere bann ki konsyan zot bezwen spirityel.” (Matye 5:3, NW) Wi, i dan natir tou imen pour annan en bezwen spirityel. Zis Bondye ki kapab satisfer sa bezwen e i fer sa atraver son Parol Labib.

Alor, kwa ki enplike dan en letid Labib? Ki mannyer i kapab benefisye ou? Sa bann kestyon pou ganny reponn dan lartik swivan.

[Not anba lo paz]

 [Bwat lo paz 4]

BANN FE LO LABIB

NON: Sorti dan sa mo Grek bi·bliʹa ki vedir “bann pti liv”

KONTENI: 39 liv an Ebre (avek serten parti an Arameen) e 27 liv an Grek

EKRI: Par apepre 40 ekriven dan en lespas 1,600 an, depi 1513 A.N.L. ziska apepre 98 N.L. *

LANGAZ: In ganny tradwir an antye oubyen an parti dan plis ki 2,500 langaz

DISTRIBISYON: Apepre senk bilyon Labib. I sa liv ki’n ganny distribye plis dan lemonn antye.

[Not anba lo paz]