Bokou dimoun i demann zot lekor si Parol Bondye in sanze. Profet Izai ti dir ki Parol Bondye “pou dire pour touzour.” (Izai 40:8) Ki mannyer nou kapab asire ki bann promes Bondye in ganny byen prezerve?

Bondye i annan pouvwar pour prezerv son Parol e anpese ki son mesaz i sanze. Dan letan lontan, ler dimoun ti kopye Lekritir sen, zot ti kont tou let pour fer sir ki nanryen pa ganny azoute, sanze oubyen tire. Me imen i enparfe e serten sa bann dimoun ti fer fot.

I annan plizyer milye vye kopi Labib. Si enn sa kopi i annan en pti diferans, i kapab ganny konpare avek en lot kopi pour vwar laverite. Pour plis lenformasyon, vwar sa lartik “Has the Bible Been Changed or Tampered With?” lo jw.org.

Par egzanp, annou vwar bann vye roulo ki ganny apele Roulo Lanmer Mor. Zot ti ganny dekouver dan en kavern o bor Lanmer Mor an 1947 par bann Arab ki viv dan dezer. Lo sa bann vye roulo, i annan en bout sa ki’n ganny ekri dan Labib date plis ki de mil an pase. Bann eksper in konpar sa bann vye roulo avek Labib ki nou annan ozordi. Ki zot in vwar?

Bann spesyalis Labib in vwar ki sa ki’n ganny ekrir dan Labib ozordi i parey avek sa ki lo sa bann vye roulo. * Sa i montre ki sa mesaz ki dan Labib i sorti kot Bondye. Nou kapab asire ki Bondye in fer sir ki sa ki’n ganny ekrir dan son Parol, Labib i reste egzakteman parey ziska dan nou letan.

Alor, nou kapab annan konfyans e asire ki sa ki nou lir dan Parol Bondye i egzakt. Vi ki Labib i egzakt, annou vwar aprezan ki nou kapab aprann lo Bondye atraver son bann profet.