1.  Manya Babuloni Orurembo Orukuru

2.  Mesiya akaba arije kurebeka ryari?

3.  Oburyo bw’okutambirwa hakoresibwe eshagama

4.  Okwangana kw’abari omu bushwere

5.  Ebiro bikuru

6.  Endwara eziri kuturira

7.  Eby’obushubuzi n’eby’ebiragiro

 1. Manya Babuloni Orurembo Orukuru

Nitumanya tuta ku Babuloni Orurembo Orukuru eri kugeranisa amadini gona ag’ebishuba? (Okushuuruurwa 17:​5) Reba ebiri kubituhamiza:

• Babuloni Orurembo Orukuru nirukorera omu nsi yona. Babuloni Orurembo Orukuru negambwaho ku eshutami aha ‘mitwe y’abantu bingi n’amahanga mingi.’ Nambwenu netegeka ‘abagabe b’ensi.’​—Okushuuruurwa 17:​15, 18.

• Ti ekitongore c’eby’obutegeki ninga obushubuzi. “Abagabe b’ensi” n’‘abashububi’ nibija kuhonoka okucwecerera kwayo.​—Okushuuruurwa 18:​9, 15.

• Nejuma Ruhanga. Neyetwa maraya ahakuba eri kukwatanisa na za gavumenti omu by’esente n’omu bindi. (Okushuuruurwa 17:​1, 2) Nehabisa abantu b’omu mahanga gona. Nambwenu ekita abantu bingi.​—Okushuuruurwa 18:​23, 24.

Gareka ah’ishomo rya 13 akacweka ka 6

 2. Mesiya akaba arije kurebeka ryari?

Bibuli ekaba yagambire ku Mesiya yabire arije kurebeka bwanyima y’esande 69.​—Shoma omuri Danieli 9:​25.

• Esande 69 zikatandika ryari? Zikatandika omu mwaka gwa 455 M.Y. Omuri obwo bwire, Nehemiya akaba yagire omuri Yerusalemu ‘kuhunduza n’okushuba kombeka’ eyo tawuni.​—Danieli 9:​25; Nehemia 2:​1, 5-8.

• Mbwenu shi esande 69 zikaba nizingana ki? Omu buhanuzi bumwe bwa Bibuli, ekiro kimwe nikigeranisa omwaka. (Okubara 14:​34; Ezekieli 4:​6) Obwe rero, buri sande negeranisa emyaka mushanju. Omuri obu buhanuzi, esande 69 nizingana emyaka 483 (esande 69 x ebiro 7 ).

• Esande 69 zikahendera ryari? Twabara emyaka 483 turi kwiha omu gwa 455 M.Y., nituhika omu mwaka gwa 29 B.Y. * Ogo ni go omwaka ogu Yesu yabatizibwemu kandi akaba Mesiya!​—Luka 3:​1, 2, 21, 22.

Gareka ah’ishomo rya 15 akacweka ka 5

 3. Oburyo bw’okutambirwa hakoresibwe eshagama

Hariho oburyo bwingi bw’okutambirwa hakoresibwe eshagama y’omurwire. Ebyo nibitwariramu okuha abandi eshagama n’okukoresa eshagama yawe omu kukushemeza, kandi ebyo byona tibyikirizibwe ah’Abakristo.​—Eky’Ebiragiro 15:​23.

Konka hariho obundi buryo oburi kubasa kwikirizibwa. Obwo nibutwariramu okukoresa eshagama yitu omu kweshwijumisa, kutwihamu eshagama bwanyima bakagitugaruramu, ninga okukoresa emashini eri kukora nk’omutima baba bari kutushemeza. Buri Mukristo naba ashemerire kwekorera ensharamu y’oku eshagama yeye erije kukoresibwa yaba ari kushemezibwa, ari kutambirwa ninga shi ari kweshwijumisa. Buri mudokita nabasa kukoresa obu buryo bw’okutambira omu buryo obutari kushushana n’obu ondijo. Obwe rero mbere y’okwikiriza oburyo bw’okushemezibwa ninga shi bw’okweshwijumisa, buri Mukristo naba ashemerire kubanza yasharamu oburyo obu eshagama yeye erakoresibwemu. Shwijuma ebi bibuzo oyetonzire:

• Mbehi nimbasa kwikiriza ku eshagama yange bayinyiha omu mubiri bakagita omu mashini rero bwanyima y’obwire bakagingaruramu? Mbehi omuntuwomunda wange naba acanyikiriza kureba eyo shagama nk’ekicweka c’omubiri gwange, kibe kitari kwetengesa kuyata ahaasi?​—Eky’Ebiragiro 12:​23, 24.

• Kandi shi ku bakuba bari kunshemeza bakanyihamu eshagama bakagiboneza rero bwanyima bakagigarura omu mubiri gwange? Mbehi eco nikibasa kutuma omuntuwomunda wange yancwera orubanja?

Gareka ah’ishomo rya 39 akacweka ka 3

 4. Okwangana kw’abari omu bushwere

Ekigambo ca Ruhanga tikiri kushagika okwangana kandi nicereka ge ku omuntu owayangana kitari kumuha obugabe bw’okugaruka kutasya. (1 Abakorinso 7:​10, 11) Konka, hariho enshonga zimwe eziri kubasa kutuma Abakristo bayangana.

• Okwanga kureberera ab’omu ka okigenderire: Omushija nabasa kwanga kureberera ab’omu ka yeye, oshange batabona eby’okubatunga.​—1 Timoseo 5:​8.

• Okubonabonesibwa ekirenga: Omwe omu batasine nabasa kubonabonesibwa aha mubiri ekirenga, kituma amagara geye gaza omu kabi.​—Abagalatia 5:​19-​21.

• Okuzibirwa kuramya Yehova: Omushija ninga shi omukazi nabasa kuremesa owu batasine kuramya Yehova.​—Ebyakozirwe 5:​29.

Gareka ah’ishomo rya 42 akacweka ka 3

  5. Ebiro bikuru

Abakristo tibashemerire kwekwatanisa omu biro bikuru ebitari kushemeza Yehova. Konka buri Mukristo ashemerire kukoresa omuntuwomunda weye owamanyizibwe na Bibuli, kugira ngu asharemu oku aratwaze omu mbera zimwe na zimwe omu biro bikuru. Reba zimwe omuri ezo mbera.

• Omuntu yakwendeza ekiro kikuru kirungi. Nobasa kugira ngu, “Webare.” Ogo muntu yaba ari kwenda kumanya byingi nobasa kumushobororera enshonga ahabw’enki otari kwekwatanisa omu kukuza eco kiro kikuru.

• Owu mwatasine otari Omuhamya wa Yehova, yakweta ngu muze kurya hamwe n’abanyabuzare beye omu bwire bw’ekiro kikuru. Yaba omuntuwomunda wawe yakwikiriza kuzayo noba oshemerire kushobororera owu mwatasine bucari kare ku hariho emigenzo emwe eri kukorwa eyi otarayekwatanisemu.

• Mukama wawe yakuha akasimo omu bwire bw’ekiro kikuru. Mbehi oshemerire kukakanga? Hine obu ori kuba otashemerire kukakanga. Mbehi mukama wawe yakuha ako kasimo ahabw’okukwendeza ekiro kikuru, ninga yakakuha ahabw’okuba ori kukora ge emirimo yawe?

• Omuntu yakuha ekiconco omu bwire bw’ekiro kikuru. Owakuha ekiconco nabasa kukugambira ngu: “Nimanya ku otari kwekwatanisa omu kukuza eki kiro kikuru, konka ninyenda kukuha eki kiconco.” Ogo muntu nabasa kuba ari efura. Konka nambwenu nabasa kuba ari kwenda kukugeza ngu arebe yaba ori kubasa kwekwatanisa omu kukuza eco kiro kikuru. Wamara kushwijuma ebyo byona n’iwe ori kweshariramu yaba orayikirize eco kiconco ninga okacanga. Nitwenda ngu ensharamu zona ezi turi kukora zitume twagira omuntuwomunda murunga, kandi tugume turi abesigwa ahari Yehova.​—Ebyakozirwe 23:1.

Gareka ah’ishomo rya 44 akacweka ka 1

 6. Endwara eziri kuturira

Ahabw’okuba turi kukunda abantu nitwerinda kugira ngu tutaturiza abandi. Eco nico eki oshemerire kukora waba orwire erwara eri kuturira. Eco nitukikora ahabw’okuba Bibuli netugambira ngu: “Kunda mutahi wawe nk’oku oyekunda.”​—Abarooma 13:​8-​10.

Ni bata oku turi kubasa korobera eco kiragiro omu bikorwa? Omuntu orwire naba ashemerire kwerinda kuhobera abantu ninga shi kubakura omu ngaro. Tashemerire kwehurira kubi hagira abayanga kumweta omu ka yabo ahabw’obwerinzi. Kandi yaba atakabatizibwe ashemerire kugambira omubuganisa w’akakiko k’abazehe kugira ngu hakorwe entebekanisa y’okurinda abandi abarabatizibwe nawe. Omuntu owarwara erwara eri kuturira yaza kusigura ashemerire kubanza yayepimisa aha irwariro. Eco wakikora noba wayereka ku ori kufa aha bandi ‘otari kufa aha byawe wenka kureka ori kufa n’ahaby’abandi.’​—Abafilipi 2:​4.

Gareka ah’ishomo rya 56 akacweka ka 2

 7. Eby’obushubuzi n’eby’ebiragiro

Nitubasa kwerinda ebizibu turi kuhandikirana n’Omukristo mugenzi witu twaza kukorana eby’obushubuzi. (Yeremia 32:​9-​12) Abakristo nibabasa kuba batari kureba omu buryo oburi kushushana ebikwatirine n’esente ninga shi ebindi bintu. Bashemerire kutereza ebyo bizibu juba, omu businge kandi bari bonka.

Ni bata oku turi kubasa kutereza ebizibu bigumire nka magendo n’ebishuba? (Shoma omuri Matayo 18:​15-​17.) Yesu akatugambira ebintu bishatu ebi turi kubasa kukuratira:

1. Mugezeho kutereza ekibuzo ahagati yanyu muri mwenka.​—Reba orunyiriri rwa 15.

2. Eco yaba kitakora shaba Omukristo omwe ninga babiri abakuzire omu buryo bw’omwika mugende hamwe.​—Reba orunyiriri rwa 16.

3. Ku arayange nibwo oshemerire kurondera obuhabuzi aha bazehe.​—Reba orunyiriri rwa 17.

Emirundi myingi nituba tushemerire kwerinda kutwara benetata omu ishengero, ahabw’okuba tukikozire nituba twajumisa Yehova n’ekibina. (1 Abakorinso 6:​1-8) Konka hariho embera eziri kutuma omuntu yaza omu biragiro harimu nk’okutana, kureberera omwana, kuhebwa omugabane gwawe bwanyima y’okutana, obweshingizi, eby’amabanja n’eby’okutunga oburagwa. Omukristo ori kushaba gavumenti ngu etereze ebizibu nk’ebyo naba atashisha obuhabuzi bw’omuri Bibuli.

Nambwenu hagira owakora ekibi c’amani nk’okuhamba, okushisha omwana, obushuma hamwe n’okwita, Omukristo yaza kumurega omuri gavumenti naba atashisha obuhabuzi bw’omuri Bibuli.

Gareka ah’ishomo rya 56 akacweka ka 3