Usa ka lalaki nga taga-Eritrea ang mibakwet sa Norway niadtong 2011. Dihang naestorya siya sa mga Saksi ni Jehova, iyang giingnan sila nga nakahimamat na siyag mga Saksi sa iyang lugar. Niadtong sundalo pa siya, nakakita siyag mga Saksi nga napriso tungod sa ilang pagtuo, ug bisag gimaltratar pag-ayo, wala gyod sila magsundalo.

 Pero dunay kalit nga nahitabo sa iyang kinabuhi maong napriso siya. Kauban niya sa prisohan ang tulo ka Saksi—si Paulos Eyasu, Negede Teklemariam, ug Isaac Mogos—nga napriso tungod sa ilang pagtuo sukad sa 1994.

 Samtang naa sa prisohan, nakita niya nga gisunod gyod sa mga Saksi ni Jehova kon unsay ilang ginatudlo sa uban bahin sa Bibliya. Iyang namatikdan ang ilang pagkamatinud-anon ug ang paghatag nilag pagkaon sa ubang piniriso. Nakita niya nga ang mga Saksi sa prisohan mag-uban sa pagtuon sa Bibliya kada adlaw ug ilang imbitahon ang uban nga moapil nila. Dihang gitanyagan silag kagawasan pinaagig pagpirmag dokumento nga nag-ingong dili na sila mag-Saksi, sila midumili.

 Kining tawhana nakadayeg kaayo sa maong mga brader, ug pagbalhin niya sa Norway, gusto niyang mahibaloan kon nganong ang mga Saksi ni Jehova dunay ingon niana ka lig-ong pagtuo. Busa dihang naestorya siya sa mga Saksi, nagpa-Bible study dayon siya ug mitambong sa ilang mga tigom.

 Niadtong Septiyembre 2018, siya nabawtismohan ingong Saksi ni Jehova. Karon, siya naningkamot nga maestorya ang mga tawo nga gikan sa Eritrea ug Sudan aron dasigon sila sa pagtuon sa Bibliya ug pagbaton ug lig-ong pagtuo.