Ang mga Saksi ni Jehova nakadawat ug mas daghang espirituwal nga pagkaon sa digital nga format. Pero sa ubang lugar, ang atong mga igsoon dili makakuhag Internet access kay naglisod sa pinansiyal. Ang uban nagpuyo sa mga lugar nga pirmeng walay koryente, hinay ang Internet, o wala gyoy Internet.

 Pero karon, daghang igsoon ang maka-download na ug digital nga mga publikasyon bisag walay Internet! Sa unsang paagi ni naposible?

 Ang JW Box maoy gamayng kit nga gipadala ngadto sa mga kongregasyon nga nalisdan sa pag-access sa Internet. Kini dunay router device nga gipalit gikan sa usa ka kompaniya, software nga gihimo sa Computer Department sa Bethel, ug digital nga mga publikasyon ug video nga naa sa jw.org. Ang usa ka JW Box mokantidad ug mga ₱3,600.

 Sa Kingdom Hall, i-connect sa mga igsoon ang ilang mga gadyet sa JW Box pinaagig Wi-Fi, ug dayon maka-download na silag mga publikasyon ug video. Bisag karaan o dili mahalon ang gadyet sa ubang igsoon, puwede silang maka-connect. Pero kon walay Internet access ang kongregasyon, sa unsang paagi ang JW Box mabutangan ug bag-ong mga publikasyon? Ang sangang buhatan regular nga magpadalag mga USB, nga mokantidad ug mga ₱190 kada usa. Kini gisudlan nag bag-ong mga publikasyon gikan sa jw.org aron ma-update ang JW Box.

 Sa unsang paagi ang JW Box nakatabang sa atong mga igsoon? Si Nathan Adruandra, usa ka amahan nga nagpuyo sa Democratic Republic of Congo, miingon: “Dugay na kong naningkamot nga ma-download ang drama nga ‘Oh Jehova, . . . Ako Nagasalig Kanimo’ ug ang Hinumdomi ang Asawa ni Lot. Pero dili gyod nako ni ma-download, maong naguol ko. Karon, ma-download na nako ni nga mga video sa akong cellphone, ug nakatabang ni namo nga matudloag maayo ang among mga anak.”

 Ang usa ka brader nga mitabang sa pag-set up sa mga JW Box sa Nigeria miingon: “Para sa mga igsoon espesyal kaayo nga regalo gikan kang Jehova ang JW Box. Lipay kaayo sila nga sayon nang i-download ang mga publikasyon ug video gikan sa Teaching Toolbox.”

 Kapin sa 1,700 ka kit ang gipadala ngadto sa mga igsoon sa Africa, Oceania, ug South America, ug naa nay plano nga padad-an sab ang daghan pang kongregasyon. Asa gikan ang kuwarta nga gigasto para ani nga kahikayan? Gikan ni sa mga donasyon sa worldwide work, nga kadaghanan niana gi-donate gamit ang donate.isa4310.com. Salamat kaayo sa inyong suporta ug pagkamahinatagon.