KON magbagyo, makadungog ka tingalig kusog nga dalugdog. Mahadlok ka ba niana?— * Aw, gitawag ni Jesus ang duha sa iyang mga sumusunod ingong “mga Anak sa Dalugdog.” Atong tan-awon kon ngano.

Kining duha ka sumusunod ni Jesus mao si Santiago ug Juan. Sila magsoon, mga anak ni Zebedeo ug sa iyang asawa nga si Salome. Si Salome lagmit igsoon sa inahan ni Jesus nga si Maria. Busa si Jesus, Santiago, ug Juan lagmit mag-agaw ug suod nga managhigala samtang sila nagdako.

Si Zebedeo usa ka mangingisda, mao man usab si Santiago ug Juan. Silang duha apil sa unang gipili ni Jesus nga mahimong iyang sumusunod. Sa dihang gidapit niya sila, dihadiha ilang gibiyaan ang ilang pangisda ug misunod kaniya. Sa ulahi mipili si Jesus ug 12 sa iyang mga sumusunod nga mahimong iyang mga apostoles. Si Santiago ug Juan apil kanila.

Pipila ka bulan una mamatay si Jesus, siya ug ang iyang mga apostoles miagi sa bukirong dapit sa Samaria. Magkilumkilom na, ug silang tanan gipangkapoy. Apan ang mga Samarianhon miingon nga dili nila gusto nga si Jesus ug ang iyang mga apostoles magpalabay sa kagabhion sa ilang siyudad. Nahibalo ka ba kon ngano?— Atong tan-awon.

Si Jesus ug ang iyang mga apostoles maoy mga Hudiyo, ug kadaghanan sa mga Hudiyo dili maayog tinagdan sa mga Samarianhon. Siyempre, dili ingon niana si Jesus. Siya buotan kanila, nga angay sab untang ipakita ni Santiago  ug Juan. Apan ang duha nangasuko sa mga Samarianhon nga wala mag-abiabi nila, ug sila miingon kang Jesus: ‘Gusto ba nimo nga among ingnon ang kalayo sa pagkanaog aron patyon sila?’ Unsa kahay giingon ni Jesus?— Giingnan niya sila nga dili maayo ang ilang gisulti! Si Santiago ug Juan kinahanglang makakat-on pa bahin sa kaluoy.

Ang lain pang dili maayong tinamdan ni Santiago ug Juan mao nga gusto nilang molabaw sa uban. Sa hapit na ang kamatayon ni Jesus, ilang gipaadto kaniya ang ilang inahan aron sa pag-ingon: “Isulti nga kining akong duha ka anak nga lalaki makalingkod, ang usa sa imong tuong kamot ug ang usa sa imong wala, diha sa imong gingharian.” Aw, sa dihang nadungog sa napulo ka apostoles ang gibuhat ni Santiago ug Juan, sila nangasuko. Masuko ka ba usab?—

Tingali. Dili ta ganahan kon ang uban gustong molabaw. Sa ulahi, nakat-onan ni Santiago ug Juan nga sayop ang ilang gibuhat, ug sila nag-usab. Sila nahimong mahigugmaon ug buotan kaayo nga mga apostoles. Unsay atong makat-onan niini?—

Atong makat-onan kang Jesus nga angay sab kitang magbinuotan sa uban. Si Jesus maayog tinagdan sa mga tawo, lakip na sa mga lalaki, babaye, ug mga bata. Maningkamot ka ba sa paghinumdom sa iyang ehemplo ug sa pagsundog niini?—