Pakigsuod sa Diyos

Sa Dihang ang “Kasingkasing nga Gun-ob ug Dugmok” Mangayog Pasaylo

2 SAMUEL 12:1-14

KITANG tanan kadaghan makasala. Bisag naghinulsol na, kita tingali maghunahuna: ‘Namati kaha ang Diyos sa akong tim-os nga mga pag-ampo sa paghinulsol? Pasayloon kaha ko niya?’ Ang Bibliya nagtudlo niining makapahupay nga kamatuoran: Bisan tuod si Jehova dili mokonsentir sa sala, siya andam nga mopasaylo sa mga mahinulsolon. Tin-aw kining gipakita sa nahitabo kang Haring David sa karaang Israel, sumala sa 2 Samuel kapitulo 12.

Handurawa ang kahimtang. Si David nakahimog grabeng sala. Siya nakapanapaw kang Bat-seba, ug sa dihang napakyas siya sa pagtago niini, iyang giplano nga mamatay ang bana ni Bat-seba. Nagpakahilom lang si David sa iyang mga sala sulod sa daghang bulan, nga daw wala ray nahitabo. Apan nagtan-aw si Jehova. Iyang nakita ang mga sala ni David. Apan iya usab nga nakita nga posibleng maghinulsol si David. (Proverbio 17:3) Unsay gihimo ni Jehova?

Gipaadto ni Jehova si propetang Natan kang David. (Bersikulo 1) Sa giya sa balaang espiritu, si Natan miduol sa hari sa maalamong paagi kay nahibalo nga kinahanglan niyang pilion pag-ayo ang iyang mga pulong. Unsay iyang isulti aron makaamgo si David nga iya lang gilimbongan ang iyang kaugalingon ug makita ang kabug-at sa iyang sala?

Aron si David dili magpakamatarong sa iyang kaugalingon, gisuginlan siya ni Natan ug usa ka estorya nga nakatandog pag-ayo kaniya ingong kanhing magbalantay sa kahayopan. Bahin kini sa duha ka tawo, ang usa dato ug ang usa pobre. Ang dato ‘daghan kaayog karnero ug baka,’ apan ang pobre may ‘usa lang ka bayeng nating karnero.’ Dihay bisita ang tawong dato ug gusto niyang dalitan siyag pagkaon. Inay mokuha gikan sa iyang mga karnero, iyang gikuha ang nag-inusarang karnero sa pobre. Kay nagtuo si David nga ang estorya tinuod, nasuko siya ug miingon: “Ang tawo nga nagbuhat niini angay nga mamatay!” Ngano? “Tungod kay siya wala maluoy,” matod pa ni David.⁠ a​—⁠Bersikulo 2-6.

Epektibo ang sambingay ni Natan. Daw gihukman ni David ang iyang kaugalingon. Pintok nga miingon si Natan kaniya: “Ikaw mismo ang maong tawo!” (Bersikulo 7) Sanglit si Natan naghawas sa Diyos, ang iyang gipamulong nagpakita kon unsay gibati ni Jehova, ug dayag nga nasuko si Jehova sa gibuhat ni David. Ang iyang paglapas sa balaod sa Diyos nagpakita nga siya walay pagtahod sa Maghahatag sa maong balaod. “Ikaw nagtamay kanako,” matod pa sa Diyos. (Bersikulo 10) Ang maong pintok nga pagbadlong nakadulot pag-ayo sa kasingkasing ni David mao nga siya miingon: “Ako nakasala batok kang Jehova.” Gipasaligan ni Natan si David nga pasayloon siya ni Jehova, apan angayng dawaton ni David ang dili maayong resulta sa iyang gibuhat.​—⁠Bersikulo 13, 14.

Human madayag ang iyang sala, gisulat ni David ang mabasa karon sa Salmo 51. Diha niini, gipahayag ni David ang anaa sa iyang kasingkasing, ang iyang tim-os nga paghinulsol. Ang sala nga nahimo ni David nagtamay kang Jehova. Apan human pasayloa sa Diyos ang mahinulsolong hari, siya nakaingon kang Jehova: “[Ang] usa ka kasingkasing nga gun-ob ug dugmok, Oh Diyos, dili mo pagatamayon.” (Salmo 51:17) Kining mga pulonga makapahupay gayod alang sa usa ka makasasala nga naghinulsol ug nagtinguha nga pasayloon ni Jehova.

[Footnote]