Alagara ang Diyos sa Kagawasan

“Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.”—1 JUAN 5:3.

MAKATUBAG KA BA?

Unsay gihimo ni Satanas aron isipon natong bug-at ra kaayo ang mga balaod sa Diyos?

Nganong angay kitang mag-amping sa pagpilig mga higala?

Unsay makatabang nato nga magpabiling maunongon sa Diyos sa kagawasan?

1. Giunsa paggamit ni Jehova ang iyang kagawasan, ug sa unsang paagi niya kini gipakita kang Adan ug Eva?

SI Jehova lamang ang may bug-os nga kagawasan. Apan kanunay niya kining gigamit sa hustong paagi. Wala niya kontrolaha bisan ang kinagamyang butang nga ginahimo sa iyang mga alagad. Gihatagan niya silag kagawasan sa pagdesisyon ug sa pagtagbaw sa husto nilang mga tinguha. Pananglitan, usa lang ka butang ang gidili sa Diyos kang Adan ug Eva—ang pagkaon sa bunga sa “kahoy sa kahibalo sa maayo ug sa daotan.” (Gen. 2:17) Busa matuman gayod nila ang kabubut-on sa Diyos ug sa samang higayon duna gihapoy dakong kagawasan!

2. Sa unsang paagi si Adan ug Eva naulipon sa sala?

² Nganong gihatagan sa Diyos ang atong unang ginikanan ug dakong kagawasan? Kay gilalang niya sila sumala sa iyang dagway ug gihatagag tanlag. Busa haom lang nga dahomon niya nga buhaton nila kon unsay husto tungod sa ilang gugma kaniya ingong Maglalalang. (Gen. 1:27; Roma 2:15) Ikasubo, wala pabilhi ni Adan ug Eva ang ilang Maglalalang ug ang kagawasan nga gihatag kanila. Mas gipili nila ang kagawasan nga gitanyag ni Satanas—ang pagkaindependente gikan sa Diyos. Imbes makabatog dugang kagawasan, sila ug ang ilang mga kaliwat naulipon na hinuon sa sala, nga miresulta sa pag-antos ug kamatayon.—Roma 5:12.

3, 4. Unsay gusto ni Satanas nga atong isipon bahin sa mga sukdanan sa Diyos?

³ Kon nadani ni Satanas ang duha ka hingpit nga tawo ug ang daghang manulonda sa pagsalikway sa pagmando sa Diyos, mahimo usab niya kana nganhi kanato. Wala mausab ang iyang mga taktika. Gusto niyang isipon nato nga bug-at ra kaayo ang sukdanan sa Diyos ug dili na ta malipay sa kinabuhi. (1 Juan 5:3) Kanay panghunahuna sa mga tawo sa kalibotan, ug matakdan kita  kon kanunay kitang makig-uban nila. “Naimpluwensiyahan ko pag-ayo sa daotang mga kauban. Dili man god ko gusto nga malahi sa akong mga higala,” miingon ang 24 anyos nga sister nga nakahimog imoralidad. Lagmit nasinati na sab nimo kon unsa ka kusog ang impluwensiya sa mga higala.

⁴ Ikasubo nga ang daotang impluwensiya maggikan usahay sulod sa kongregasyon. “Duna koy mga kakongregasyon nga nakig-date ug mga dili Saksi,” miingon ang usa ka batan-ong brader. “Unya akong namatikdan nga natakdan ko sa akong pagsigeg uban-uban nila. Mihuyang ang akong espirituwalidad. Laayan na ko sa mga tigom, ug halos dili na mosangyaw. Nakaamgo ko nga kinahanglan kong mobulag nila, ug gihimo ko kadto!” Nakita ba nimo kon unsa ka kusog ang impluwensiya sa imong mga kauban diha kanimo? Tagda kining usa ka pananglitan sa Bibliya.—Roma 15:4.

GIKAWAT NIYA ANG KASINGKASING SA MGA TAWO

5, 6. Sa unsang paagi gilimbongan ni Absalom ang uban? Milampos ba ang iyang daotang plano?

⁵ Ang Bibliya naghisgot ug mga indibiduwal nga dili maayog impluwensiya sa uban. Usa kanila mao si Absalom, nga anak ni Haring David. Si Absalom guwapo kaayo. Apan sama kang Satanas, nagpadaog siya sa iyang hakog nga ambisyon. Gusto niyang ilogon ang trono sa iyang amahan, bisag wala siyay katungod niini. * Aron mailog ang pagkahari, gipatuo ni Absalom ang iyang mga isigka-Israelinhon nga siya nahangawa kanila ug ang hari kono wala magpakabana kanila. Sama sa Yawa didto sa tanaman sa Eden, nagpakaaron-ingnon si Absalom nga gusto niyang motabang sa mga tawo, ug sa samang higayon nagdaot sa iyang amahan.—2 Sam. 15:1-5.

⁶ Milampos ba ang daotang plano ni Absalom? Sa usa ka bahin, oo, kay ang Bibliya nag-ingon: “Si Absalom nagpadayon sa pagkawat sa mga kasingkasing sa mga tawo sa Israel.” (2 Sam. 15:6) Apan sa ulahi, ang iyang pagkamapahitas-on miresulta sa iyang kapildihan ug kamatayon, lakip sa libolibo pa ka tawo nga mituo kaniya.—2 Sam. 18:7, 14-17.

7. Unsay atong makat-onan sa asoy bahin kang Absalom? (Tan-awa ang hulagway sa panid 14.)

⁷ Nganong dali rang nalimbongan ang mga Israelinhon? Lagmit gipangandoy nila ang mga butang nga gisaad ni Absalom. O kaha nadala sila sa iyang kaguwapo. Kon unsa man ugaling, segurado kita niini: Sila wala magmaunongon kang Jehova ug sa iyang tinudlong hari. Si Satanas naggamit gihapon karon ug “mga Absalom” sa paglimbong sa mga alagad ni Jehova. Sila tingali moingon, ‘Estrikto ra kaayo ang mga sukdanan ni Jehova. Tan-awa ang mga tawo nga wala mag-alagad niya, malipayon kaayo sila!’ Motuo ka ba niana nga kabakakan, o magpabilin kang maunongon sa Diyos? Isipon ba nimo nga ang “hingpit nga balaod” ni Jehova—ang balaod ni Kristo—mao lamang ang motultol kanimo sa tinuod nga kagawasan? (Sant. 1:25) Kon mao, pabilhi kana nga balaod ug gamita ang maong kagawasan sa paagi nga makapahimuot kang Jehova.—Basaha ang 1 Pedro 2:16.

8. Unsa nga mga kasinatian ang nagpakita nga dili ka magmalipayon kon imong supakon ang mga sukdanan ni Jehova?

⁸ Ang mga batan-on maoy pangunang target ni Satanas. Usa ka brader nga kapig 30 anyos na ang nahinumdom niadtong batan-on pa siya: “Giisip nako ang moral nga sukdanan ni Jehova ingong restriksiyon, dili proteksiyon.” Ingong resulta, siya nakahimog imoralidad. Apan wala kini makahatag kaniyag kalipay. “Sulod sa dugayng panahon, gihasol ko sa akong konsensiya ug nagbasol ko pag-ayo,” siya miingon. Usa ka sister ang nahinumdom usab sa iyang pagkabatan-on: “Human makahimog imoralidad, naluya ko pag-ayo ug mibating walay pulos. Bisag  milabay na ang 19 ka tuig, mahinumdom gihapon ko sa akong dili maayong kagahapon.” Ang laing sister miingon: “Ang pagkahibalo nga ang akong panggawi nakapasakit pag-ayo sa akong mga minahal dunay grabeng epekto sa akong hunahuna, espirituwalidad, ug emosyon. Lisod kaayong mabuhi nga wala ang pag-uyon ni Jehova.” Dili gusto ni Satanas nga imong hunahunaon ang maong mga sangpotanan sa sala.

9. (a) Unsang mga pangutana ang angayng isukna sa kaugalingon bahin kang Jehova ug sa iyang mga balaod ug prinsipyo? (b) Nganong hinungdanon nga atong mailhan pag-ayo si Jehova?

⁹ Gipakita sa maong mga kasinatian ang daotang resulta sa pagsupak sa Diyos. Ikasubo nga daghang batan-on ug mga edaran ang nag-antos una ayha sila nakaamgo niini! (Gal. 6:7, 8) Busa pangutan-a ang kaugalingon: ‘Nahibalo ba ko sa mga lit-ag nga gigamit ni Satanas sa paglimbong kanako? Giisip ko ba si Jehova nga akong kinasuorang Higala, nga kanunayng nagsulti sa tinuod ug nagtinguha sa akong kaayohan? Kombinsido ba ko nga dili gyod niya ihikaw ang mga butang nga makaayo ug makapalipay kanako?’ (Basaha ang Isaias 48:17, 18.) Aron oo ang imong mga tubag, kinahanglang nakaila ka pag-ayo kang Jehova. Kinahanglan nimong isipon nga ang mga balaod ug prinsipyo sa Bibliya maoy pamatuod nga siya nahigugma kanimo, dili kay pig-otan ka.—Sal. 25:14.

PAG-AMPO ALANG SA MAALAMON UG MASINUGTANONG KASINGKASING

10. Nganong angay natong sundogon ang batan-on nga si Haring Solomon?

¹⁰ Sa batan-on pa si Solomon, siya mapainubsanong miampo: “Ako usa lamang ka gamayng  bata. Ako dili mahibalo kon unsaon paggawas ug unsaon pagsulod.” Dayon siya mihangyo nga makabatog maalamon ug masinugtanong kasingkasing. (1 Hari 3:7-9, 12) Gitubag ni Jehova ang iyang sinserong pag-ampo, ug buhaton usab niya kana kanimo, batan-on ka man o edaran. Siyempre si Jehova dili milagrosong mohatag kanimog hait nga salabotan ug kaalam. Apan himoon ka niyang maalamon kon ikaw magkugi sa pagtuon sa iyang Pulong, mag-ampo alang sa balaang espiritu, ug magpabili sa espirituwal nga mga tagana sa Kristohanong kongregasyon. (Sant. 1:5) Pinaagi niini, gihimo ni Jehova bisan ang batan-ong mga alagad nga mas maalamon kay sa mga tawong wala magsunod sa iyang tambag, bisan niadtong gitawag nga mga ‘maalamon ug makinaadmanon’ niining kalibotana.—Luc. 10:21; basaha ang Salmo 119:98-100.

11-13. (a) Unsang importanteng mga leksiyon ang atong makat-onan sa Salmo 26:4, Proverbio 13:20, ug 1 Corinto 15:33? (b) Unsaon nimo pagpadapat ang maong mga prinsipyo?

¹¹ Sa pagpakita sa kahinungdanon sa pagtuon sa Bibliya ug sa pagpamalandong sa atong nabasa aron mailhan pag-ayo si Jehova, tagda kining mosunod nga mga teksto. Ang matag usa niini dunay importanteng prinsipyo bahin sa pagpilig mga kauban: “Wala ako molingkod uban sa mga tawo sa kabakakan; ug dili ako mosulod uban niadtong magpakaaron-ingnon.” (Sal. 26:4) “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.” (Prov. 13:20) “Ang daotang pakig-uban makadaot sa mapuslanong pamatasan.”—1 Cor. 15:33.

¹² Unsang importanteng mga leksiyon ang atong makat-onan sa maong mga teksto? (1) Gusto ni Jehova nga mag-amping kita sa pagpilig mga higala. Gusto niyang panalipdan kita sa moral ug sa espirituwal nga paagi. (2) Ang atong mga kauban makaimpluwensiya kanato sa paghimog maayo o daotan. Tinuod gayod kana. Matikdi nga ang mga teksto wala ipresentar ingong mga lagda, sama sa “ayaw nig buhata” o “ayaw nag buhata,” apan ingong simpleng mga kamatuoran. Gipakita niini nga buot ni Jehova nga tandogon ang atong kasingkasing. Sama ra nga si Jehova miingon kanato: ‘Kini ang tinuod. Unsay imong buhaton? Unsay imong pagbati niini?’

¹³ Sanglit ang tulo ka teksto maoy paninugdang mga kamatuoran, kini mapadapat gihapon karon ug sa daghang kahimtang. Pananglitan, pangutan-a ang kaugalingon: Unsaon nako paglikay sa mga ‘nagpakaaron-ingnon’? Sa unsang mga kahimtang nga ako silang mahibalag? (Prov. 3:32; 6:12) Kinsa ang mga “maalamon” nga gusto ni Jehova nga akong mahigala? Kinsa ang “mga hungog” nga gusto niya nga akong likayan? (Sal. 111:10; 112:1; Prov. 1:7) Unsang “mapuslanong pamatasan” nako ang madaot sa daotang mga kauban? Sa kalibotan lang ba nako mahibalag ang daotang mga kauban? (2 Ped. 2:1-3) Unsay imong tubag niining mga pangutanaha?

14. Sa unsang paagi ninyo mapauswag ang inyong Pamilyahanong Pagsimba?

¹⁴ Mahimo usab nimong susihon niining paagiha ang ubang teksto nga nagbutyag sa hunahuna sa Diyos bahin sa mga butang nga hinungdanon kanimo ug sa imong pamilya. * Mga ginikanan, hisgoti kining mga puntoha sa inyong Pamilyahanong Pagsimba. Samtang himoon kini, hinumdomi nga ang inyong tumong mao ang pagtabang sa matag membro sa pamilya nga masabtan nga ang mga balaod ug prinsipyo sa Diyos maoy pagpakita sa iyang dakong gugma kanato. (Sal. 119:72) Oo, ang maong paagi sa pagtuon magpalig-on sa inyong relasyon kang Jehova ug sa usag usa.

15. Unsaon nimo pagkahibalo kon maalamon ug masinugtanon ang imong kasingkasing?

 ¹⁵ Unsaon nimo pagkahibalo kon maalamon ug masinugtanon ang imong kasingkasing? Ang usa ka paagi mao ang pagtandi sa imong hunahuna ug nianang sa matinumanong mga alagad kanhi, sama kang Haring David. Siya misulat: “Sa pagbuhat sa imong kabubut-on, Oh Diyos ko, ako nagakalipay, ug ang imong balaod ania sa akong kahiladman nga mga bahin.” (Sal. 40:8) Ang magsusulat sa Salmo 119 miingon usab: “Gihigugma ko gayod ang imong balaod! Kini ang akong gipalandong sa tibuok nga adlaw.” (Sal. 119:97) Kini nga gugma dili kay motungha rag iya. Maugmad nimo kini pinaagig makugihong pagtuon sa Bibliya, pag-ampo, ug pagpamalandong. Molalom usab kini dihang imong masinati ang daghang panalangin sa pagsunod sa mga sukdanan ni Jehova.—Sal. 34:8.

PAKIGBUGNO ALANG SA KRISTOHANONG KAGAWASAN!

16. Unsay angay natong hinumdoman aron magmadaogon sa pagpakigbugno alang sa tinuod nga kagawasan?

¹⁶ Latas sa kasaysayan, ang mga nasod nakiggubat alang sa kagawasan. Dili ba mas labaw kang makigbugno sa espirituwal nga paagi alang sa imong Kristohanong kagawasan? Hinumdomi nga ang imong mga kaaway dili lang si Satanas, ang kalibotan, ug ang makahilong espiritu niini. Kinahanglang makigbugno ka usab sa imong pagkadili-hingpit, apil na ang malimbongong kasingkasing. (Jer. 17:9; Efe. 2:3) Apan mahimo kang magmadaogon pinaagi sa tabang ni Jehova. Dugang pa, sa matag kadaogan—dako man o gamay—dunay duha ka maayong resulta. Una, imong mapalipay ang kasingkasing ni Jehova. (Prov. 27:11) Ikaduha, samtang nakabenepisyo ka sa pagsunod sa “hingpit nga balaod nga iya sa kagawasan,” mas molig-on ang imong determinasyon nga magpabilin sa ‘sigpit nga dalan’ paingon sa kinabuhing walay kataposan. Sa umaabot, imong matagamtam ang mas dakong kagawasan nga gisaad ni Jehova sa iyang maunongong mga alagad.—Sant. 1:25; Mat. 7:13, 14.

17. Nganong dili kita angayng maluya dihang kita masayop, ug unsang tabang ang gitagana ni Jehova?

¹⁷ Siyempre, kitang tanan masayop usahay. (Eccl. 7:20) Kon mahitabo kana, ayawg kaluya o mobating walay pulos. Kon madagma ka, pagaingnon pa, bangon—bisag nagpasabot kana nga moduol ka sa mga ansiyano. Ang ilang “pag-ampo sa pagtuo,” matod ni Santiago, “mag-ayo sa usa nga naluya, ug si Jehova magbangon kaniya. Dugang pa, kon siya nakasala, siya pagapasayloon.” (Sant. 5:15) Oo, ayaw gayod kalimti nga ang Diyos maluluy-on kaayo ug gikabig ka niya ngadto sa kongregasyon kay may nakita siyang maayo kanimo. (Basaha ang Salmo 103:8, 9.) Busa kon padayon kang mag-alagad kang Jehova sa bug-os kasingkasing, dili ka gyod niya pasagdan.—1 Cron. 28:9.

18. Sa unsang paagi kita molihok uyon sa pag-ampo ni Jesus sa Juan 17:15?

¹⁸ Sa gabii una namatay si Jesus, siya nag-ampo uban sa iyang 11 ka matinumanong apostoles ug gisulti niya kining makapatandog nga mga pulong: ‘Bantayi sila tungod sa usa nga daotan.’ (Juan 17:15) Maingon nga si Jesus nabalaka sa iyang mga apostoles, siya nabalaka usab sa tanan niyang sumusunod karon. Busa makaseguro kita nga tubagon ni Jehova ang pag-ampo ni Jesus pinaagi sa pagpanalipod kanato niining makuyaw nga mga panahon. “[Si Jehova] usa ka taming alang niadtong mga nagalakaw sa integridad . . . Iyang bantayan ang dalan sa iyang mga maunongon.” (Prov. 2:7, 8) Oo, dili kanunayng sayon ang dalan sa integridad, apan kini lamang ang dalan paingon sa kinabuhing walay kataposan ug sa tinuod nga kagawasan. (Roma 8:21) Ayawg tugoti si bisan kinsa nga magpatipas kanimo nianang dalana!

[Mga footnote]

[Mga Pangutana sa Pagtuon]

[Mga hulagway sa panid 14]

Sa unsang paagi nato mailhan ang modernong adlaw nga mga Absalom ug mapanalipdan ang atong kaugalingon batok kanila?