1. Nganong angay natong sundon si Jehova ingong atong Tiggiya? Iilustrar.

 IMADYINA nga nasaag ka sa lasang. Hadlok kaayo tungod sa ihalas nga mga mananap, mga insekto nga makahatag ug sakit, makahilo nga mga tanom, ug batoon nga dalan. Seguradong malipay gyod ka kon naa kay kauban nga eksperyensiyadong tiggiya nga nahibalo kon asa ang kapeligrohan ug kon unsaon paglikay niana! Kini nga kalibotan parehas niana nga lasang. Daghan nig kapeligrohan ilabina sa atong espirituwalidad. Pero naa tay hingpit nga Tiggiya, si Jehova. Tabangan ta niya nga makalikay sa mga kapeligrohan ug makaabot sa atong destinasyon—ang kinabuhing walay kataposan sa bag-ong kalibotan.

2. Giunsa ta paggiya ni Jehova?

² Giunsa ta paggiya ni Jehova? Ang pangunang paagi nga gigamit ni Jehova mao ang iyang Pulong, ang Bibliya. Pero naggamit pod siyag mga tawo sa paggiya nato. Pananglitan, gigamit niya ang “matinumanon ug maalamong ulipon” sa pagtaganag espirituwal nga pagkaon nga makatabang nato sa paghimog maalamong mga desisyon. (Mat. 24:45) Naggamit pod siyag ubang kuwalipikadong brader sa paggiya nato. Pananglitan, ang mga tigdumala sa sirkito ug mga ansiyano sa kongregasyon naghatag natog mga pagdasig ug direksiyon nga makatabang nato sa lisod nga mga panahon. Mapasalamaton gyod ta nga naa tay kasaligang giya niining lisod kaayo nga panahon sa kataposan. Makatabang ni nato nga mamentinar ang atong maayong relasyon kang Jehova ug magpabilin sa dalan sa kinabuhi.

3. Unsay atong hisgotan niining artikuloha?

³ Bisan pa ana, malisdan tingali ta usahay nga sundon ang giya ni Jehova, ilabina kon gihatag ni pinaagi sa dili hingpit nga mga brader. Ngano? Tingali dili ta ganahan sa ilang tambag, o kaha para nato dili praktikal ang ilang direksiyon. Tungod ana, basin  maghunahuna ta nga ang ilang giingon wala maggikan kang Jehova. Nianang mga panahona, ilabinang gikinahanglan nga mosalig ta nga si Jehova ang naggiya sa iyang katawhan ug nga ang pagsunod sa iyang giya moresultag mga panalangin. Aron tabangan ta nga molig-on ang atong pagsalig, hisgotan niining artikuloha (1) kon giunsa paggiya ni Jehova ang iyang katawhan sa panahon sa Bibliya, (2) kon giunsa ta niya paggiya karon, ug (3) kon sa unsang paagi makabenepisyo ta kon padayon natong sundon ang iyang paggiya.

KON GIUNSA PAGGIYA NI JEHOVA ANG NASOD SA ISRAEL

4-5. Giunsa pagpakita ni Jehova nga gigamit niya si Moises sa paggiya sa Israel? (Tan-awa ang hulagway sa atubangan sa magasin.)

⁴ Gitudlo ni Jehova si Moises sa pagpanguna sa mga Israelinhon pagawas sa Ehipto. Ug gihatagan Niya ang mga Israelinhon ug klarong ebidensiya nga Siya ang naggiya kanila pinaagi kang Moises. Pananglitan, naghatag siyag haligi nga panganod sa adlaw ug haligi nga kalayo sa gabii. (Ex. 13:21) Gisundan ni Moises ang haligi, nga maoy nagtultol niya ug sa mga Israelinhon sa Pulang Dagat. Nalisang ang katawhan dihang nakita nila nga hapit na silang maapsan sa naggukod nga kasundalohan sa Ehipto ug abi nilag natanggong na sila sa dagat. Naghunahuna sila nga nasayop si Moises sa pagdala nila sa Pulang Dagat. Pero dili to sayop. Gituyo ni Jehova nga dad-on ang iyang katawhan didto pinaagi kang Moises. (Ex. 14:2) Dayon giluwas sila sa Diyos sa makapahingangha kaayong paagi.—Ex. 14:​26-28.

⁵ Sa misunod nga 40 ka tuig, si Moises padayong misalig sa haligi nga panganod sa paggiya sa katawhan sa Diyos latas sa kamingawan. a Dihay panahon nga gibutang ni Jehova ang haligi ibabaw sa tolda ni Moises, diin makita kini sa tanang Israelinhon. (Ex. 33:​7, 9, 10) Gikan sa haligi, si Jehova nakig-estorya kang Moises, dayon gisulti ni Moises ang mga direksiyon ni Jehova ngadto sa katawhan. (Sal. 99:7) Ang mga Israelinhon daghan gyog nakitang ebidensiya nga gigamit ni Jehova si Moises sa paggiya kanila.

6. Unsay reaksiyon sa mga Israelinhon sa paggiya ni Jehova? (Numeros 14:​2, 10, 11)

⁶ Makapaguol kay gisalikway sa daghang Israelinhon si Moises bisag klaro kaayo ang ebidensiya nga gigamit siya ni Jehova ingong Iyang representante. (Basaha ang Numeros 14:​2, 10, 11.) Gani, daghang higayon nga ila nang gihimo. Tungod ana, ang maong henerasyon sa mga Israelinhon wala pasudla sa Yutang Saad.—Num. 14:30.

7. Paghatag ug mga pananglitan niadtong misunod sa paggiya ni Jehova. (Numeros 14:24) (Tan-awa sab ang hulagway.)

⁷ Pero naay mga Israelinhon nga misunod sa paggiya ni Jehova. Pananglitan, si Jehova miingon: “Si Caleb . . . padayong nagsunod kanako nga kinasingkasing.” (Basaha ang Numeros 14:24.) Gigantihan sa Diyos si Caleb ug gitugotan pa gani siyang mopili kon unsang lugara sa Canaan ang iyang ganahan. (Jos. 14:​12-14) Ang misunod nga henerasyon sa mga Israelinhon maoy maayo pod nga ehemplo sa pagsunod sa giya ni Jehova. Dihang si Josue mipuli kang Moises ingong tinudlong lider sa mga Israelinhon, ilang “gitahod siya pag-ayo sa tibuok niyang kinabuhi.” (Jos. 4:14) Ingong resulta, gipanalanginan sila ni Jehova pinaagi sa pagdala kanila sa yuta nga iyang gisaad kanila.—Jos. 21:​43, 44.

8. Giunsa paggiya ni Jehova ang iyang katawhan panahon sa mga hari? Ipatin-aw. (Tan-awa sab ang hulagway.)

⁸ Katuigan sa ulahi, migamit si Jehova ug mga maghuhukom aron giyahan ang iyang katawhan. Human ana, panahon sa mga hari, migamit si Jehova ug mga propeta sa paggiya sa iyang  katawhan. Ang matinumanong mga hari misunod sa tambag sa mga propeta. Pananglitan, mapainubsanong gidawat ni Haring David ang pagtul-id ni propetang Natan. (2 Sam. 12:​7, 13; 1 Cron. 17:​3, 4) Si Haring Jehosapat misunod sa giya nga gihatag ni propetang Jahaziel ug gidasig niya ang katawhan sa Juda nga ‘tuohan ang mga propeta’ sa Diyos. (2 Cron. 20:​14, 15, 20) Panahon sa lisod kaayong kahimtang, si Haring Ezequias miduol kang propetang Isaias. (Isa. 37:​1-6) Dihang ang mga hari misunod sa paggiya ni Jehova, sila gipanalanginan ug ang nasod napanalipdan. (2 Cron. 20:​29, 30; 32:22) Klaro kaayo nga gigamit ni Jehova ang iyang mga propeta sa paggiya sa iyang katawhan. Bisan pa ana, kadaghanan sa mga hari ug sa mga tawo nagsalikway sa mga propeta ni Jehova.—Jer. 35:​12-15.

KON GIUNSA PAGGIYA NI JEHOVA ANG MGA KRISTOHANON SA UNANG SIGLO

9. Kinsay gigamit ni Jehova sa paggiya sa mga Kristohanon sa unang siglo? (Tan-awa sab ang hulagway.)

⁹ Sa unang siglo C.E., giporma ni Jehova ang Kristohanong kongregasyon. Giunsa niya paggiya ang maong mga Kristohanon? Gitudlo niya si Jesus ingong ulo sa kongregasyon. (Efe. 5:23) Pero wala giyahi ni Jesus sa personal ang matag Kristohanon. Gigamit niya ang mga apostoles ug ang mga ansiyano sa Jerusalem sa pagpanguna kanila. (Buh. 15:​1, 2) Naa poy mga ansiyano nga gitudlo sa paggiya sa mga kongregasyon.—1 Tes. 5:12; Tito 1:5.

10. (a) Unsay reaksiyon sa kadaghanan sa mga Kristohanon sa unang siglo bahin sa mga direksiyon nga ilang nadawat? (Buhat 15:​30, 31) (b) Nganong ang uban sa panahon sa Bibliya wala mosunod sa mga representante ni Jehova? (Tan-awa ang kahong “ Kon Nganong Gisalikway sa Uban ang Klarong Ebidensiya.”)

¹⁰ Unsay reaksiyon sa mga Kristohanon sa unang siglo? Daghan ang nalipay nga mosunod sa mga direksiyon nga ilang nadawat. Gani “sila nalipay pag-ayo sa . . . pagdasig” nga gihatag kanila. (Basaha ang Buhat 15:​30, 31.) Pero sa unsang paagi gigiyahan ni Jehova ang iyang katawhan karon?

KON GIUNSA TA PAGGIYA NI JEHOVA KARON

11. Unsay pananglitan nga nagpakita nga gigiyahan ni Jehova kadtong mga nanguna sa modernong panahon?

¹¹ Padayong gigiyahan ni Jehova ang iyang katawhan karon. Iya nang ginahimo pinaagi sa iyang Pulong ug sa iyang Anak, ang ulo sa kongregasyon. Naa pod bay ebidensiya nga ang Diyos  padayong naggamit ug mga tawo sa paggiya nato karon? Oo. Konsideraha pananglitan ang nahitabo human sa tuig 1870. Nasabtan ni Charles Taze Russell ug sa iyang mga kauban nga ang 1914 maoy importanteng tuig para sa Gingharian sa Diyos. (Dan. 4:​25, 26) Nakahimo sila ana nga konklusyon tungod sa ilang pagsusi sa mga tagna sa Bibliya. Gigiyahan ba ni Jehova ang ilang pag-research sa Bibliya? Oo, klaro kaayo. Pagka-1914, ang mga panghitabo sa kalibotan nagpamatuod nga nagsugod na pagmando ang Gingharian sa Diyos. Nahitabo ang Gubat sa Kalibotan I ug gisundan kinig mga kamatay, linog, ug kanihit sa pagkaon. (Luc. 21:​10, 11) Klaro nga gigamit ni Jehova ang maong sinsero nga mga Kristohanon sa pagtabang sa iyang katawhan.

12-13. Unsang mga kahikayan ang gihimo panahon sa Gubat sa Kalibotan II aron mapauswag ang buluhatong pagsangyaw ug pagpanudlo?

¹² Konsideraha pod ang nahitabo panahon sa Gubat sa Kalibotan II. Human sa pagtuon sa Pinadayag 17:​8, nasabtan sa nanguna nga mga brader sa hedkuwarter nga ang maong gubat dili mosangko sa Armagedon, kondili sa panahon sa kalinaw nga maghatag ug kahigayonan nga mas mapalapad pa ang buluhatong pagsangyaw. Busa ang organisasyon mihimog mga kahikayan nga tingali para sa uban dili praktikal niadtong panahona. Gisugdan sa organisasyon ni Jehova ang Watchtower Bible College (School) of Gilead aron mabansay ang mga misyonaryo sa pagsangyaw ug pagpanudlo sa lainlaing bahin sa kalibotan. Ang mga misyonaryo gipadala pa gani sa ilang mga asaynment bisan panahon sa gubat. Gihikay pod sa matinumanong ulipon ang Course in Theocratic Ministry b aron mabansay ang tanan diha sa kongregasyon nga mahimong epektibo sa pagsangyaw ug pagpanudlo. Niining mga paagiha, ang katawhan sa Diyos giandam para sa mas dakong buluhaton sa umaabot.

¹³ Nakita gyod nato nga gigiyahan ni Jehova ang iyang katawhan nianang lisod kaayo nga panahon. Sukad sa Gubat sa Kalibotan II, ang katawhan ni Jehova sa daghang nasod nakapahimulos sa panahon sa kalinaw ug kagawasan samtang ilang ginahimo ang buluhatong pagsangyaw. Gani, daghan na ang nakaila kang Jehova ug ang maayong balita gisangyaw na sa tibuok kalibotan.

14. Nganong makasalig ta sa mga direksiyon gikan sa organisasyon ni Jehova ug sa mga ansiyano? (Pinadayag 2:1) (Tan-awa sab ang hulagway.)

 ¹⁴ Karon, ang mga membro sa Nagamandong Lawas padayong nagpagiya sa Kristo. Naningkamot sila nga ang mga direksiyon nga ilang ihatag sa mga igsoon uyon sa panglantaw ni Jehova ug Jesus. Ug ila kining ipaabot sa mga kongregasyon pinaagi sa mga tigdumala sa sirkito ug mga ansiyano. c Ang dinihogang mga ansiyano naa sa “tuong kamot” sa Kristo. (Basaha ang Pinadayag 2:1.) Siyempre, kini nga mga ansiyano dili hingpit ug usahay masayop. May mga higayon nga nasayop si Moises ug Josue, ug mao pod ang mga apostoles. (Num. 20:12; Jos. 9:​14, 15; Roma 3:23) Pero klaro nga ang Kristo naggiya sa matinumanong ulipon ug sa gitudlo nga mga ansiyano, ug padayon na niyang himoon “sa tanang adlaw hangtod sa hinapos sa sistema sa mga butang.” (Mat. 28:20) Busa daghan gyod tag rason nga mosalig sa paggiya nga iyang gitagana pinaagi niadtong mga gitudlo nga manguna kanato.

MAKABENEPISYO TA KON PADAYON NATONG SUNDON ANG PAGGIYA NI JEHOVA

15-16. Unsay imong nakat-onan sa mga eksperyensiya niadtong nagpagiya kang Jehova?

¹⁵ Kon padayon natong sundon ang paggiya ni Jehova, makadawat tag mga panalangin bisan karon. Pananglitan, gipadapat ni Andy ug Robyn ang tambag nga magkinabuhing simple. (Tan-awa ang study note sa Mateo 6:22.) Tungod ana, nakaboluntaryo sila sa mga proyekto sa pagpanukod sa organisasyon. Si Robyn miingon: “Nakasulay mig puyo sa gamay kaayo nga mga balay, nga sagad walay kosina. Ug kinahanglan nakong ibaligya ang akong daghang equipment sa photography, nga maoy hilig nako. Nakahilak ko pagbaligya nako adto. Pero sama sa asawa ni Abraham nga si Sara, determinado ko nga dili na magsigeg hunahuna sa mga butang nga ako nang gitalikdan.” (Heb. 11:15) Unsay mga kaayohan sa gihimong desisyon ni Andy ug Robyn? Si Robyn miingon: “Nalipay kaayo mi kay nahibalo mi nga gihatag namo kang Jehova ang tanan namong nabatonan. Sa among mga asaynment, samag natilawan namo kon unsa unya ang kinabuhi didto sa bag-ong kalibotan.” Uyon si Andy niana. Siya miingon: “Nalipay kaayo mi kay gihatag namo ang tanan namong panahon ug kusog aron suportahan ang Gingharian.”

¹⁶ Unsa pay mga kaayohan kon padayon natong  sundon ang paggiya ni Jehova? Human mo-graduate sa high school, gisunod ni Marcia ang pagdasig nga magpayunir. (Mat. 6:33; Roma 12:11) Siya miingon: “Gitanyagan kog upat ka tuig nga scholarship sa usa ka university. Pero gusto nakong kab-oton ang akong espirituwal nga mga tumong. Busa gipili nako nga moeskuwela sa technical school aron makakat-on kog skill nga makasuportar sa akong pagpayunir. Usa to sa pinakamaayong desisyon nga akong nahimo. Karon, regular payunir na ko, ug kay flexible man ang akong eskedyul sa trabaho, nag-alagad ko ingong commuter sa Bethel ug nakadawat ug ubang nindot nga mga pribilehiyo.”

17. Unsa pang mga panalangin ang atong madawat kon padayon natong sundon ang paggiya ni Jehova? (Isaias 48:​17, 18)

¹⁷ Ang organisasyon naghatag ug mga tambag aron panalipdan ta. Pananglitan, gipasidan-an ta nga dili higugmaon ang kuwarta ug likayan ang bisan unsa nga posibleng moresulta sa paglapas sa mga balaod sa Diyos. Kon mosunod ta niini nga mga giya ni Jehova, makabenepisyo ta. Makabaton tag hinlong konsensiya ug malikayan nato ang daghang problema. (1 Tim. 6:​9, 10) Ingong resulta, bug-os tang makaalagad kang Jehova, ug kini makahatag natog tinuod nga kalipay, kalinaw, ug katagbawan.—Basaha ang Isaias 48:​17, 18.

18. Nganong determinado ka nga padayong magpagiya kang Jehova?

¹⁸ Segurado nga si Jehova padayong mogamit ug mga tawo sa paggiya nato panahon sa dakong kasakitan ug bisan panahon sa Usa ka Libo ka Tuig nga Pagmando. (Sal. 45:16) Padayon ba tang mosunod sa maong direksiyon bisan dihang lahi ni sa atong gusto? Mas dakog purohan nga mosunod ta nianang panahona kon karon pa lang, nagpagiya na ta kang Jehova. Busa padayon natong sundon ang paggiya ni Jehova, apil na ang giya niadtong mga gitudlo nga magbantay kanato. (Isa. 32:​1, 2; Heb. 13:17) Ug daghan gyod tag rason nga mosalig sa atong Tiggiya, si Jehova, kinsa nagtabang nato nga makalikay sa espirituwal nga mga kapeligrohan ug makaabot sa atong destinasyon—ang kinabuhing walay kataposan sa bag-ong kalibotan.