ANG GIINGON SA BIBLIYA

Sa wala pa himoa sa Diyos ang uniberso ug ang unang mga tawo, siya naghimo nag hataas nga matang sa intelihenteng mga linalang. Sila mas gamhanan kay sa tawo, ug sila nagpuyo sa puy-anan sa Diyos—puy-anan nga dili maabot ug dili makita sa tawo. (Job 38:4, 7) Ang Bibliya nagtawag niining labaw nga mga linalang ingong mga “espiritu” ug mga “manulonda” o anghel.—Salmo 104:4. *

Unsa ka daghan ang mga anghel? Daghan kaayo. Ang mga anghel sa palibot sa trono sa Diyos may gidaghanon nga “tinagpulo ka libo ka tinagpulo ka libo” o “linibo ka libo.” (Pinadayag 5:11) Kon sabton kini sa literal, ang gidaghanon sa mga anghel maoy gatosan ka milyon!

“Nakita ko, . . . [ang] daghang manulonda [o anghel] libot sa trono . . . ug ang ilang gidaghanon maoy tinagpulo ka libo ka tinagpulo ka libo ug linibo ka libo.”—Pinadayag 5:11.

ANG GIINGON SA BIBLIYA

Ang mga anghel sagad mag-alagad ingong tigpamaba sa Diyos o mensahero. * Sila gipadayag sa Bibliya nga maoy mobuhat sa mga milagro nga gikan sa Diyos. Ang Diyos nagpadalag anghel sa pagpanalangin kang Abraham ug sa pagpugong kaniya sa paghalad sa iyang anak nga si Isaac. (Genesis 22:11-18) Usa ka anghel ang nagpakita kang Moises diha sa nagkalayong tanom sa paghatod ug makapabag-o sa kinabuhi nga mensahe. (Exodo 3:1, 2) Dihang si propetang Daniel gitambog sa yungib sa mga leyon, ang “Diyos nagpadala sa iyang manulonda [anghel] ug nagtak-om sa baba sa mga leyon.”—Daniel 6:22.

“Unya ang manulonda ni Jehova nagpakita [kang Moises] diha sa usa ka dilaab sa kalayo taliwala sa usa ka tunokong tanom.”—Exodo 3:2.

ANG GIINGON SA BIBLIYA

Dili nato mahibaloan ang tanan nga ginahimo sa mga anghel karon. Apan ang Bibliya nagpakita nga sila nalangkit sa pagtabang sa sinserong mga tawo sa pagkat-on pag dugang bahin sa Diyos.—Buhat 8:26-35; 10:1-22; Pinadayag 14:6, 7.

Gipadamgo ni Jehova ang patriarkang si Jacob diin nakakita siyag mga anghel nga nagsaka kanaog sa “hagdan” tali sa langit ug yuta. (Genesis 28:10-12) Tungod niana nga damgo, si Jacob ug kita tingali makaingon nga si Jehova mopadalag mga anghel dinhi sa yuta sa pagtabang sa maunongong mga tawo nga nagkinahanglag tabang.—Genesis 24:40; Exodo 14:19; Salmo 34:7.

“May usa ka hagdan nga nagbarog diha sa yuta ug ang tumoy niini miabot sa mga langit; ug, tan-awa! dihay mga manulonda sa Diyos nga nagasaka ug nagakanaog niini.”—Genesis 28:12.