NIADTONG 2010, halos lima ka milyong baril sa krudo ang misanap sa Gulf of Mexico human mibuto ug miunlod ang drilling rig. Pero paglabayg pipila ka bulan, halos wala nay makitang krudo. Sa unsang paagi kana nahitabo?

Hunahunaa: Nadiskobrehan sa mga siyentista nga dunay mga bakterya sa dagat nga mokaon ug mga molekula sa karbon nga anaa sa krudo. Sumala ni Propesor Terry Hazen, environmental microbiologist, kini nga mga organismo samag “mga missile nga krudo ang ginatarget.” Kini sila nakatabang sa pagwagtang sa krudo nga misanap sa Gulf of Mexico, nga gihisgotan sa sinugdan.

“Busa ang dagat diay dunay mga mikrobyo nga kusog mokaog krudo,” matod sa report sa BBC. Sa tinuod lang, “ang mga likiliki ilalom sa salog sa dagat nagapagawas ug krudo” sulod sa dugay na kaayong panahon.

Tinuod, epektibo ang mga paningkamot sa tawo sa paghinlo sa dagat nga nasanapan ug krudo. Apan ang maong paningkamot mas dako tingalig ikahatag nga kadaot kay sa kaayohan. Ang kemikal nga gigamit nga pangpabungkag sa krudo makadaot sa natural nga proseso sa paghilis sa krudo. Kini usab nga mga kemikal makahilo ug dili maayog epekto sa kalikopan. Pero ang katakos sa kinaiyahan sa paghilis sa krudo, lakip sa mga mikrobyo nga kusog mokaog krudo, makatabang sa dagat sa paghinlo sa kaugalingon nga walay daotang mga epekto sama nianang sa artipisyal nga pamaagi. *

Unsay imong hunahuna? Ang katakos ba sa mga mikrobyo sa pagkaon ug krudo sulagma lang mitungha? O kini ba gidisenyo?