● Ang bokya maoy mga 95 porsiyento nga tubig ug lainlain ug gidak-on nga walay usa ka pulgada ngadto sa kapin sa unom ka piye ang diyametro. Ang kaunoran sa kadaghanang bokya maoy magpabuka-buka sa ilang samag-kampana nga lawas, nga morag payong nga nagbuka-buka.

Hunahunaa: Ang mga siyentista nga nagtuon sa fluid dynamics nakadiskobre nga dunay pipila ka matang sa bokya, nga bisag dili paspas molangoy, talagsaon ug paagi sa paglangoy. Sa matag pagbuka-buka sa lawas, ang tubig molilo nga makapatulod sa ilang lawas. Ang puwersa sa lilo maoy magpasulpot niini nga morag jet, pero ang puwersa sa pagpasulpot putol-putol, dili deretso. “Morag simple kini paminawon,” matod pa sa magasing New Scientist. “Apan lisod kalkulahon pinaagig matematika kon giunsa sa bokya pagpalilo sa tubig.”

Gitun-an sa mga tigdukiduki ang paagi sa paglangoy sa bokya aron makagamag mas maayong mga sakyanan ilalom sa dagat. Usa ka tigdukiduki nakaimbentog submarino nga upat ka piye ang gitas-on nga makapatunghag lilo nga sama nianang sa bokya. Ang sakyanan nakadaginot ug 30 porsiyento nga enerhiya kay sa sakyanan nga gipadagan pinaagig palabad. Laing posibleng kagamitan niini mao ang sa kasingkasing sa tawo. Sanglit ang sirkulasyon sa dugo sulod sa usa ka seksiyon sa kasingkasing molilo man, ang abnormal nga mga paglilo mahimong maoy unang mga timailhan nga may diperensiya ang kasingkasing.

Unsay imong hunahuna? Ang paagi ba sa paglangoy sa bokya mitungha pinaagig ebolusyon? O kini ba gidisenyo?

[Hulagway sa panid 13]

Ang inagian sa paglangoy sa bokya mahimong lilo nga makapasulpot sa lawas niini

[Picture Credit Lines sa panid 13]

Photo: © JUNIORS BILDARCHIV/age fotostock; graphic: Courtesy of Sean Colin