Gidisenyo Ba Kini?

Ang Kabhang sa Kinhason

◼ Ang mga kinhason morag gabok tan-awon, apan lig-on diay kaayo. “Ako kining gimartilyo aron mabuak,” nag-ingon ang inhenyero nga si Kenneth Vecchio, nga naghunahuna sa bata pa siya. Ang talagsaong kinaiya sa kinhason mao ang kalig-on sa kabhang sa mollusk. a

Hunahunaa: Ang ilalom nga lut-od sa kabhang sa mollusk (gitawag ug nacre, o tipay) dunay gigming kaayong mga himbis-himbis nga dikit kaayo. “Makapahingangha gayod ang sobrang pagkadikit sa mga himbis-himbis sa nacre ug tingali kini ang nakapalig-on pag-ayo sa kabhang,” nag-ingon si Christine Ortiz, luyo-luyong propesor sa Department of Materials Science and Engineering sa Massachusetts Institute of Technology, U.S.A.

Ang magsusulat kabahin sa siyensiya nga si Charles Petit naghubit sa gipadak-ang hulagway sa nacre ingong “hapsay kaayo.” Siya miingon: “Kon tan-awon sa mikroskopyo, ang tinabas sa kabhang sa kinhason morag gikamada nga mga tisa, nga unom ug kilid nga mga bareta sa pino nga calcium carbonate nga minerales nga maayo kaayong pagkalut-od-lut-od. Ang nagpatapot niini mao ang tugob ug protina nga laway-laway sa kinhason.”

Nagtuo ang mga siyentipiko nga ang mga sekreto sa kabhang sa mollusk daghag kagamitan—sama sa mas lig-ong mga kagamitan sa gubat, mga bungbong ug atop sa awto, ug mga pako sa ayroplano. Sumala kang Ortiz, ang pagkagama sa kabhang sa mollusk nga gihisgotan sa ibabaw maoy gigamit sa kinaiyahan sa paggamag usa ka butang nga mas maayo pa kay sa mahimo sa mga inhenyero. Ug siya miingon nga wala pay inhenyero ang nakahimo niana.

Unsay imong hunahuna? Ang lig-on ba kaayong kabhang sa mollusk sulagma lang nga mitungha? O dunay nagdisenyo niini?

[Footnote]

[Hulagway sa panid 25]

Gipadak-ang seksiyon sa ilalom nga lut-od sa kabhang sa mollusk

[Credit Line]

Inset: © Eye of Science/Photo Researchers, Inc.