Pag-opera nga Walay Dugo—Usa ka Pananglitan sa Malamposong Operasyon
Pag-opera nga Walay Dugo—Usa ka Pananglitan sa Malamposong Operasyon
Human mapatik ang Enero 8, 2000 nga isyu sa Pagmata! maylabot sa ulohang walay-dugo nga pagpanambal ug operasyon, ang mga editor nakadawat niining makapadasig nga sulat.
“Kining isyuha sa Pagmata! nagpahinumdom sa usa ka kahimtang nga giatubang nako ug sa akong bana uban sa among anak babaye, si Janice. Wala madugay human sa iyang pagkahimugso, lima ka depekto sa kasingkasing ang nadayagnos, ang kinagrabehan mao ang pagkabaylo sa dagkong mga ugat. * Sanglit gikinahanglan ang operasyon, nakigkita kami sa usa ka siruhano sa kasingkasing sa mga bata sa Buffalo, New York, T.B.A., nga andam moopera nga walay dugo.
“Sa upat ka bulan nga pangedaron, si Janice unang gioperahan—usa ka closed-heart nga operasyon aron pugngan ug diyutay ang pag-agay sa dugo ngadto sa iyang mga baga. Lima ka bulan sa ulahi, gioperahan siya sa ikaduhang higayon—niadtong higayona gihimo ang open-heart nga operasyon nga gituyo aron tultolan ang pag-agay sa iyang dugo sa hustong paagi. Ang duha ka operasyon gihimo nga wala mogamit ug dugo, ug kini bug-os nga nagmalamposon!
“Si Janice sa pagkakaron 17 anyos na ug adunay himsog nga panglawas. Kami mapasalamaton sa maisogong mga siruhano nga andam sa pagtahod sa among baroganan bahin sa dugo. Sa pagkatinuod, sila mao ang inyong gitawag diha sa Enero 8 nga isyu, ‘Mga Mag-uuna sa Pagpanambal.’ Isip tubag sa pangutanang gisukna nianang magasina nga, Ang walay-dugo nga operasyon usa ba ka dili-peligrosong kapilian? kami makatubag uban ang hugot nga pagtuo nga kini dili gayod peligroso!”
[Footnote]
^ Niining kahimtanga, ang posisyon sa dakong ugat nga nagpaagay sa dugo gikan sa kasingkasing ug ang ugat nga padulong sa baga nagkabaylo. Busa, ang dagaya-sa-oksiheno nga dugo nga angay untang moagay ngadto sa tibuok lawas miagay lamang ngadto sa mga baga. Usa ka susamang kahimtang gitaho diha sa among isyu sa Awake! sa Abril 8, 1986, mga panid 18-20.
[Hulagway sa panid 31]
Human sa iyang mga operasyon
[Hulagway sa panid 31]
Si Janice ug ang iyang mga ginikanan karon