LEKSIYON 36
Magmatinud-anon sa Tanang Butang
Ganahan gyod tag mga higala nga matinud-anon. Gidahom ni Jehova nga magmatinud-anon pod ang iyang mga higala. Pero dili ni sayon kay daghan sa kalibotan karon ang dili matinud-anon. Unsay mga kaayohan kon matinud-anon ta sa tanang butang?
1. Unsa ang pinakaimportanteng rason kon nganong magmatinud-anon ta?
Dihang magmatinud-anon ta sa uban, atong gipakita kang Jehova nga ato siyang gihigugma ug gitahod. Konsideraha ni: Si Jehova nahibalo sa tanan natong ginahunahuna ug ginahimo. (Hebreohanon 4:13) Iyang makita dihang mopili ta nga magmatinud-anon, ug malipay siya niana. Ang iyang Pulong nag-ingon: “Gidumtan ni Jehova ang tawong limbongan, apan makigsuod Siya sa matul-id.”—Proverbio 3:32.
2. Unsaon nato pagpakita nga matinud-anon ta adlaw-adlaw?
Gusto ni Jehova nga ‘mosulti tag tinuod sa usag usa.’ (Zacarias 8:16, 17) Unsay gipasabot ani? Dihang makig-estorya ta sa atong pamilya, kauban sa trabaho, igsoon sa kongregasyon, o opisyales sa gobyerno, dili ta mamakak o mosultig sayop nga impormasyon. Ang matinud-anong mga tawo dili mangawat o mangilad. (Basaha ang Proverbio 24:28 ug Efeso 4:28.) Ug bayran nila ang tanang buhis nga kinahanglan nilang bayran. (Roma 13:5-7) Niining mga paagiha ug sa uban pa, atong mapakita nga kita ‘matinud-anon sa tanang butang.’—Hebreohanon 13:18.
3. Unsay mga kaayohan kon matinud-anon ta?
Kon nailhan ta nga matinud-anon, ang uban mosalig nato. Makatabang ta nga ang tanan sa kongregasyon mobating luwas, nga samag pamilya. Hinlo pod ang atong konsensiya. Kon matinud-anon ta, ‘mas madayeg [pod] ang pagtulon-an sa atong Manluluwas, ang Diyos,’ ug madani ang uban sa pag-alagad kang Jehova.—Tito 2:10.
TUN-IG DUGANG
Sayra kon sa unsang paagi ang pagkamatinud-anon makaapektar kang Jehova ug kanimo ug kon sa unsang paagi ka magmatinud-anon sa lainlaing kahimtang.
4. Kon matinud-anon ta, mapalipay nato si Jehova
Basaha ang Salmo 44:21 ug Malaquias 3:16, ug dayon hisgoti kini nga mga pangutana:
-
Ngano kahang dili maalamong maghunahuna nga matago nato ang tinuod?
-
Unsa kahay bation ni Jehova dihang mopili ta nga isulti ang tinuod, bisan dihang lisod ning himoon?
Dihang ang mga anak mosulti sa tinuod, mapalipay nila ang ilang ginikanan. Dihang mosulti ta sa tinuod, mapalipay nato si Jehova
5. Magmatinud-anon sa tanang panahon
Daghan ang naghunahuna nga dili kanunayng praktikal ang pagkamatinud-anon. Pero konsideraha kon nganong angay tang magmatinud-anon sa tanang panahon. I-play ang VIDEO.
Basaha ang Hebreohanon 13:18, ug dayon hisgoti kon sa unsang paagi ta magmatinud-anon . . .
-
sa atong pamilya.
-
sa trabahoan o eskuwelahan.
-
sa ubang kahimtang.
6. Ang pagkamatinud-anon makahatag natog kaayohan
Tingali moresultag mga problema kon magmatinud-anon ta. Pero sa ngadtongadto, makita nimo nga mao ni ang pinakamaayong buhaton. Basaha ang Salmo 34:12-16, ug dayon hisgoti kini nga pangutana:
-
Nganong magmalipayon ka kon matinud-anon ka?
-
Kon matinud-anon ang bana ug asawa, mapalig-on nila ang ilang kaminyoon
-
Kon matinud-anon ang empleyado, saligan siya sa iyang amo
-
Kon matinud-anon ang usa ka tawo, maayo siyag reputasyon diha sa mga opisyales sa gobyerno
ANG UBAN MOINGON: “Wala ra man nay kaso. Ginagmay ra man na nga pagpamakak.”
-
Nganong nagtuo ka nga gidumtan ni Jehova ang tanang bakak?
SUMARYO
Gusto ni Jehova nga ang iyang mga higala magmatinud-anon sa tanan nilang isulti ug buhaton.
Review
-
Unsaon nato pagpakita nga matinud-anon ta?
-
Nganong dili maalamong maghunahuna nga matago nato ang tinuod?
-
Nganong gusto nimong magmatinud-anon sa tanang panahon?
SUSIHA
Sa unsang paagi matudloan sa mga ginikanan ang ilang mga anak nga mahimong matinud-anon?
Unsay mga kaayohan kon tumanon nato ang atong mga saad?
Konsideraha kon angay ba tang mobayad ug buhis bisan dihang gamiton ni sa sayop nga paagi.
“Buhis—Kinahanglan ba Kining Bayran?” (Ang Bantayanang Torre, Septiyembre 1, 2011)
Unsay nakapalihok sa usa ka dili matinud-anong tawo nga magbag-o?
“Nakat-onan Nako nga si Jehova Maluluy-on ug Mapinasayloon” (Ang Bantayanang Torre, Mayo 1, 2015)
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
