Ang mga siyentipiko dugay nang nainteres sa pilitpilit nga laway, o hydrogel, nga ginapagula sa hagfish. Ngano? Tungod kay ang hydrogel sa hagfish gitawag ingong usa sa “kinahumokan ug mainat-inat nga natural nga substansiya nga nadiskobrehan.”

 Hunahunaa: Ang hagfish susama sa ubod ug kini nagpuyo sa salog sa dagat. Kon dunay mosulay ug tukob sa hagfish, kini mopagula ug gel gikan sa espesyal nga mga glandula. Kini nga likido dunay mga protina nga mahimong morag sip-on ug may linibo pa ka ubang protina nga morag tag-as nga hilo ang hitsura. Kini nga mga protina magsagol, ug ang tubig palibot sa hagfish mahimong pilitpilit nga likido. Kini nga likido makapabara sa hasang sa manunukob, maong iluwa niini ang hagfish ug mobiya kini.

 Ang hydrogel sa hagfish talagsaon kaayo. Ang matag hilo nga protina niini nipis kaayo. Kon bahinon ug ka-100 ang usa ka lugas sa buhok sa tawo, ang usa ka bahin niana maoy gidak-on sa usa ka hilo nga protina. Ug kini 10 ka pilo nga mas lig-on kay sa naylon. Sa dihang ibuga kini ngadto sa dagat, ang kombinasyon sa morag sip-on nga protina ug sa mga hilo nga protina mahimong samag nipis, 3-D nga salaan. Kini nga “salaan” makasuhop ug tubig nga 26,000 ka pilo sa gibug-aton niini. Gani, ang laway sa hagfish halos 100 porsiyentong tubig!

 Ang mga siyentipiko wala gyod makahimog hydrogel nga susama sa laway sa hagfish. “Kining natural nga substansiya komplikado kaayo,” miingon ang usa ka researcher. Bisan pa niana, ang mga siyentipiko nagplano sa paggamag mga hilo nga protina gamit ang bakterya. Ang ilang tumong mao ang paghimog produkto nga gaan, dili daling magisi, mainat-inat, ug biodegradable. Kining dili natural nga mga hilo nga protina puwedeng gamiton diha sa industriya sa paggamag mga panapton ug sa medical field. Oo, daghan gyod nig posibleng kagamitan.

 Unsay imong hunahuna? Ang komplikado ba nga laway, o hydrogel, sa hagfish mitungha pinaagig ebolusyon? O kini ba gidisenyo?