“Salig kang Jehova sa bug-os nimong kasingkasing, ug ayawg salig sa kaugalingon nimong pagsabot. Sa tanan nimong dalan konsideraha siya, ug tul-iron niya ang imong mga agianan.”—Proverbio 3:5, 6, Bag-ong Kalibotang Hubad.

 “Salig sa GINOO sa tibuok nimong kasingkasing ug ayaw pagsalig sa imong kaugalingong salabotan. Sa tanan nimong mga dalan ilha siya, ug siya magtul-id sa imong mga agianan.”—Panultihon (Proverbio) 3:5, 6, Ang Biblia, 2011.

 Dihang mohimog importanteng mga desisyon, kinahanglang magpagiya ta kang Jehova a nga Diyos imbes mosalig lang sa atong kaugalingon.

 “Salig kang Jehova sa bug-os nimong kasingkasing.” Gipakita nato nga nagasalig ta sa Diyos dihang ginahimo nato ang mga butang uyon sa iyang kabubut-on. Kinahanglang bug-os tang mosalig sa Diyos sa tibuok natong kasingkasing. Sa Bibliya, ang kasingkasing sagad nagtumong sa sulod nga pagkatawo, nga naglakip sa emosyon, motibasyon, panghunahuna, ug tinamdan sa usa ka tawo. Busa ang pagsalig sa Diyos sa bug-os natong kasingkasing dili lang kay basta pagbati. Kita mismo ang mipili niini kay kombinsido gyod ta nga ang atong Maglalalang nahibalo kon unsay pinakamaayo para kanato.—Roma 12:1.

 “Ayawg salig sa kaugalingon nimong pagsabot.” Kinahanglan tang mosalig sa Diyos kay dili ta hingpit ug dili kasaligan ang atong panghukom. Kon sa kaugalingon lang ta mosalig o mag-agad lang ta sa atong gibati, basig makahimo tag mga desisyon nga morag maayo ra sa sinugdan pero sa ulahi moresultag dili maayo. (Proverbio 14:12; Jeremias 17:9) Ang kaalam sa Diyos mas labaw kay sa atoa. (Isaias 55:8, 9) Kon magpagiya ta sa Diyos, kita magmalipayon ug magmalamposon.—Salmo 1:1-3; Proverbio 2:6-9; 16:20.

 “Sa tanan nimong dalan konsideraha siya.” Angay natong sayron kon unsay hunahuna sa Diyos sa matag importanteng bahin sa atong kinabuhi ug sa matag importanteng desisyon nga atong himoon. Mahimo nato kini pinaagi sa pag-ampo kaniya alang sa giya ug sa pagsunod sa iyang giingon diha sa iyang Pulong, ang Bibliya.—Salmo 25:4; 2 Timoteo 3:16, 17.

 “Tul-iron niya ang imong mga agianan.” Tul-iron sa Diyos ang atong agianan pinaagi sa pagtabang kanato sa pagkinabuhi subay sa iyang matarong nga mga sukdanan. (Proverbio 11:5) Busa malikayan nato ang wala kinahanglanang mga problema ug mas magmalipayon ta sa atong kinabuhi.—Salmo 19:7, 8; Isaias 48:17, 18.

 Ang basahon sa Proverbio dunay mga prinsipyo nga kon atong sundon magmalipayon ang atong kinabuhi ug mapalipay nato ang Diyos. Ang unang siyam ka kapitulo gisulat nga samag ang amahan nagtambag sa iyang minahal nga anak. Ang kapitulo 3 naghisgot sa mga benepisyo nga madawat niadtong nagpabili ug nagpadapat sa kaalam sa atong Maglalalang.—Proverbio 3:13-26.