Oo. Ang Diyos may kahingawa sa iyang mga alagad nga nagmasakiton. Mahitungod sa iyang matinumanong alagad, ang Bibliya nag-ingon: “Si Jehova magpalig-on kaniya sa ibabaw sa higdaanan sa balatian.” (Salmo 41:3) Kon duna kay laygay nga sakit, ang mosunod nga tulo ka paagi makatabang nimo sa pagsagubang:

1.   Pag-ampo nga hatagan kag kusog nga makalahutay. Imong madawat “ang kalinaw sa Diyos nga labaw sa tanang panghunahuna,” nga makapamenos sa imong kabalaka ug makapalig-on nimo.—Filipos 4:6, 7.

2.   Magmapositibo. Ang Bibliya nag-ingon: “Ang pagkamalipayon makaayo sa panglawas. Inanay nga kamatayon ang pagsubo kanunay.” (Panultihon 17:22, Ang Bag-ong Maayong Balita Biblia) Ugmara ang pagkahingatawa, kay dili lang kini makahupay sa imong kasubo kondili makaayo usab sa imong panglawas.

3.   Lig-ona ang imong paglaom sa umaabot. Ang paglaom nga lig-og basehanan makatabang nimo nga magmalipayon bisan pag may laygay nga sakit. (Roma 12:12) Ang Bibliya nagtagna bahin sa usa ka panahon nga “walay pumoluyo nga moingon: ‘Ako masakiton.’” (Isaias 33:24) Nianang panahona, ayohon sa Diyos ang laygayng mga sakit nga dili maayo sa modernong siyensiya. Pananglitan, ang Bibliya nag-ingon bahin sa mga tigulang: “Mabag-o ang iyang unod labi pa kay sa pagkabatan-on; mahibalik siya sa mga adlaw sa kabaskog sa iyang pagkabatan-on.”—Job 33:25.

 Matikdi kini: Bisan tuod giila nila ang tabang nga gitagana sa Diyos, ang mga Saksi ni Jehova nga may laygay nga sakit magpatambal usab. (Marcos 2:17) Apan, wala kami magsugyot ug espesipikong paagi sa pagtambal; gibati namo nga ang matag usa ang angayng modesisyon alang sa iyang kaugalingon.