Ang Bibliya wala maghisgot ug Halloween, usa ka selebrasyon nga ginasaulog sa daghan kada Oktubre 31. Pero, ang sinugdanan ug mga tradisyon sa Halloween supak sa gitudlo sa Bibliya.

Niining artikuloha

•  Kasaysayan ug mga tradisyon sa Halloween

•  Importante ba nga mahibaloan ang sinugdanan sa Halloween?

•  Nganong gitawag nig Halloween?

•   Samhain: Ang Halloween naggikan niining “karaang paganong pista nga ginasaulog sa mga Celt kapig 2,000 ka tuig kanhi,” nag-ingon ang The World Book Encyclopedia. “Ang mga Celt nagtuo nga ang mga patay puwedeng makig-uban sa mga buhi nianang panahona. Panahon sa Samhain, ang mga buhi makaduaw uban sa mga patay.”—Tan-awa ang “ Nganong gitawag nig Halloween?”

•   Mga costume sa Halloween, kendi, ug trick or treat: Sumala sa usa ka reperensiya, ang pipila ka Celt nagsul-ob ug makahahadlok nga mga costume nga parehas ug hitsura sa nagsuroysuroy nga mga espiritu aron dili sila hilabtan sa maong mga espiritu. Ang uban nagtanyag ug mga kendi ngadto sa mga espiritu aron dili kini masuko. a

   Sa Europe, niadtong mga 500 C.E. hangtod 1500 C.E., gisuon sa mga klero sa Katoliko ang lokal nga paganong mga kostumbre ug gisugo ang mga membro sa ilang simbahan sa pag-adto sa kabalayan nga magsul-ob ug mga costume ug mangayog gagmayng regalo.

•   Mga multo, bampira, werewolf (o tawong lobo), ungo, ug zombie: Dugay na nga gituohan nga kini sila may koneksiyon sa kalibotan sa daotang mga espiritu. Diha sa librong Halloween Trivia, sila gitawag ingong “gamhanang mga monster,” ug mga linalang nga “nalangkit pag-ayo sa kamatayon, mga patay o sa kahadlok nga mamatay.”

•   Mga kalabasa sa Halloween, o jack-o’-lantern: Sa Britain, niadtong mga 500 C.E. hangtod 1500 C.E., ang mga tawo “mangadto sa kabalayan nga mangayog pagkaon baylo sa pag-ampo alang sa mga patay,” ug magdala silag “mga lampara nga gama sa gibangagan nga singkamas nga may kandila sa sulod, nga nagsimbolo sa kalag nga natanggong sa purgatoryo.” (Halloween—From Pagan Ritual to Party Night) Ang ubang historyano nag-ingon nga ang maong mga lampara gigamit sa pagbugaw ug daotang mga espiritu. Sa mga katuigan sa 1800 sa North America, ang singkamas gipulihag kalabasa kay mas daghan ni ug sayon rang bangagan ug kulitan.

 Oo. Para sa uban, ang Halloween kalingawan ra ug dili makadaot. Pero ang mga ginahimo panahon sa Halloween supak sa gitudlo sa Bibliya. Ang Halloween gibase sa bakak nga mga tinuohan bahin sa patay ug dili makita nga mga espiritu, o mga demonyo.

 Matikdi ang mosunod nga mga teksto nga nagpakita kon unsay panglantaw sa Diyos bahin sa Halloween:

•   “Kinahanglang walay makita diha kaninyo nga … tigpakisayod sa espiritu o tigpanagna pinaagi sa pagpangutana sa mga patay.”—Deuteronomio 18:10-12, Ang Biblia, 2011.

   Kahulogan: Dili mouyon ang Diyos sa pagpakig-estorya sa mga patay o bisan sa pagpakaaron-ingnon nga nakig-estorya kanila.

•   “Ang mga patay walay nahibaloan nga bisan unsa.”—Ecclesiastes 9:5.

   Kahulogan: Kay ang mga patay walay panimuot, dili sila makaestorya sa mga buhi.

•   “Dili … kamo makig-ambit sa mga demonyo. Kay kamo dili makainom sa kupa sa Ginoo dungan sa kupa sa mga demonyo.”—1 Corinto 10:20, 21, Ang Biblia, 2011.

   Kahulogan: Kon ang usa gustong uyonan sa Diyos, kinahanglan niyang likayan ang bisan unsa nga konektado sa mga demonyo.

•   “[Barog nga lig-on] batok sa mga lit-ag sa Yawa; tungod kay kita dunay pakig-away … batok sa daotang espiritung mga puwersa.”—Efeso 6:11, 12.

   Kahulogan: Ang mga Kristohanon angayng makig-away sa daotang mga espiritu ug dili mohimog bisan unsa nga nagpakita nga naglipaylipay sila uban sa mga demonyo.