Jean 3:1-36
3 A nga bo na, mone pharisien a too jôé na, Nicodème, ntebe ôsu bejuif a mbe valé.
2 A nga ke yene nye alu a jô nye na: “A Rabbi, bia yeme na, wo so be Zambe a na, ô ne ñye’ele amu teke môt éziñ a ne bo mesimba wo bo ma, nge Zambe a nji bo a nye.”
3 Ane Yésus a nga jô nye na: “Ma bele fo’o ane ma kate wo na, nge môt éziñ a nji beta bialé* a vo’o yen Éjôé Zambe.”
4 Nicodème a nga sili nye na: “Aval avé môt a ne bialé éyoñ a ntoo nnôm? A vo’o nyiin abume nyia éyoñe baa a beta bialé, sa nalé?”
5 Yésus a nga yalane na: “Ma bele fo’o ane ma kate wo na, nge môt a nji bialé mendim a nsisim, a vo’o nyiin Éjôé Zambe.
6 Jôme ja te bialé nsôn é ne nsôn, a jôme ja te bialé nsisim é ne nsisim.
7 Te bo fe’e ne vema amu ma te kate wo na mia yiane beta bialé.
8 Évuñulu ja vuñe vôme ja kômbô vuñ, a wo wôk éduñe jé ve ô nji yeme vôme ja so a vôme ja ke. Nne fe é ne nalé be môt ase a te bialé nsisim.”
9 Ane Nicodème a nga sili nye na: “Aval avé mame ma me ne boban?”
10 Yésus a nga yalane na: “Aval avé ô ne bo ñye’ele ya Israël, ve ô teke yeme mame ma?”
11 Ma bele fo’o ane ma kate wo na, mame bia yem, bia kobô me, a mame bia te yene bia kañete fe me, ve mi nji kañese nkañete wongan.
12 Ma te kate mia mame ya si, ve mia ke ôsu a bo teke buni, nde, aval avé mia ye buni, nge ma kate mia mame ya yôp?
13 Nde fe, teke môt a beteya yôp, ve nyu a nga sise si a so’o yôp, Mona môt.
14 A fo’o ve avale Moïse a nga bete* nyo nkôte si, avale da fe Mona môt a yiane beteban,*
15 ndembene môt ase a buni nye a ne bi ényiñe ya nnôm éto.
16 “Amu Zambe a nga nye’e bôte bese ya si nyu* étua ya abui ane a nga lôm atyi’i Mone dé, ndembene môt ase a bili mbunane be nye a ne bo teke wu, ve bi ényiñe ya nnôm éto.
17 Amu Zambe a nji lôme Mone wé be bôte bese ya si nyu na, a zu tyi’i bôte bese ya si nyu mejô, ve na, bôte bese ya si nyu be nyiiban a zene jé.
18 Nyu ase a liti mbunane be nye a yiane ki tyi’iban ajô. Nyu ase a nji liti mbunan a tyi’ibaneya ajô, amu a nji liti mbunan éyôlé atyi’i Mona Zambe.
19 Mbôka’a ya ntyi’ane mejô ñwô wu: éfufup é nga zu be bôte bese ya si nyu, ve bôte be nga nye’e dibi a dañ éfufup amu mimboone miap mi mbe abé.
20 Amu môt ase a bili fulu ya bo mbia be mam a vini éfufup a a nji so éfufup, ndembene mimboone mié mi ne bo te kulan.*
21 Ve môt ase a bo jam é ne zôsô a zu éfufup, ndembene mimboone mié mi ne litibane na mia wô’an a nkômbane Zambe.”
22 Mvuse ya mame mete, Yésus ba beyé’é bé be nga ke minlame ya Judée a a nga tabe abim éyoñ éziñ a be wôé, a nga du fe bôt.*
23 Ve Jean fe a mbe a du bôt Énon, bebé Salim, amu abui mendim é mbe wôé, a bôte be mbe mbane ya ke wôé a duban;
24 amu Jean a mbe a ngenane teke ke mimbôk.
25 A nga bo na, beyé’é be Jean be nga sañetan a mone juif ajô ya metiñe ma fombô ntunan.*
26 Nde be nga zu be Jean a jô nye na: “Rabbi, môte mia nye mi mbe e Jourdain yat, nyu ô nga kañete ajô dé, tame yen, nyuli ate a nga du bôt a bôte bese be nga ke be nye.”
27 Ane Jean a nga yalane na: “Môt a se ngule ya bi to’o ve mone jôm éziñe nge Zambe a nji ve nye je.
28 Miabebiene mi ne ma ngaa na, me nga jô na, ‘Me nji bo Krist, ve me ne nlôman ôsu wé.’
29 Môt a ndeme lu’u minga a ne nluk, ve mvôé nluk, éyoñ é tele valé é wô’ô fe tyiñe jé, nlem ô ne nye mevak abui amu a wô’ô tyiñe nluk. Nde meva’a mam me ne njalane ne lut.
30 Nyuli ate nnye a yiane nenenen, ve ma ma yiane wula wulan.”
31 Môt a so yôp a dañe bôte bese bevok. Môt a so si a so si nde fe a kobô mame ya si, môt a so yôp a dañe bôte bese bevok.
32 A kañete mam a te yen a wôk, ve teke môt a kañese nkañete wé.
33 Môt ase a kañeseya nkañete wé, môt ate a bo’olô fo’o* na, Zambe a ne benya mejôô.*
34 Amu nyu Zambe a nga lôm a kobô mejô me Zambe, amu Zambe a ve nsisim te vek.*
35 Ésa a nye’e Mon. A nga ve fe nye mame mese e mo mé été.
36 Môt a liti mbunane be Mona Zambe a bili ényiñe ya nnôm éto, môt a bo Mone melo a ye ke yen ényiñ, ve ayaa Zambe é too be nye.
Notes
^ Be ne fe jô na, “bi abialé ya yôp.”
^ Nge ke, “tyelé.”
^ Nge ke, “tyeléban.”
^ Lañe’e Atinane bifia, “Si nyu.”
^ Nge ke, “mi za ve nye mekua.”
^ Nalé a tinane na, Yésus nnye a mbe a tebele’e nduan ôte.
^ Nge ke, “mfuban.”
^ Nge ke, “futi sitame jé.”
^ Nge ke, “Zambe a kobô benya mejôô.”
^ Nge ke, “lañ.”