E yeme jôé womien a tinane na ô ne ngule ya

• yange a ôjibi

• ya yeme bi nlem

• ya man ésaé ba ve wo ja’a ô nji je nye’e

• ya telé miñyiane mi bôte bevo’ ôsu

Bongô ba yeme jôé bebien be ne ngule ya sa’ale meve’ele, to’o nalé a tinane na be sube mam méziñ. Ve ba be nji yeme jôé bebien be ne

• bo ôngase

• be ne kone dépression

• be ne nyu ta’a, meyok nge banga a lôte nné

• be ne bo te yeme top aval bidi ba yiane di

Mfasan éziñ ô nga liti na, bongô ba yeme jôé bebien, ba ye sa’ale abui akon, ba ye yeme belane moné wop a ba ye ke bi mejô a bijôé éyoñe ba ye bo benya bôtô. Mfasan ôte ô nga tindi Angela Duckworth, Ñye’ele ya Université de Pennsylvanie, na a jô na: “Môt a vo’o jô na a yeme jôé émien ‘abime da yian.’”

Yeme’e jô na teké’é, ô bo fe avale wo te jô.

ÑYE’ELANE YA BIBLE: “Nkobô wônan ô bo’o ve yaa, yaa; momo, momo!”​—Matthieu 5:37, Mfefé Nkôñelan.

Biyoñe biziñ, bongô be wô’ô vañe kañ zezé e bôt été, asu na bebiaé bap be ve be jôm ba yi. Nge mbiaé a tyendé jôm a te jô, mongô a ji’a wô’ô valé na, a ne bi jôm ése a yi nge a kañ.

Ve éyoñ mbiaé a tyi’i na a ve ki mone wé jôm a sili, teke tyendé anyu, mongô a ye ba’ale ñye’elane wu: bi vo’o bi jôm ése bia yi éyoñ ése. Dokita David Walsh a tili na: “Beta jam a ne na, bôte be nga yé’é na ba jôé bebien mbe ba dañe bi mevak. Nge bia yale bone bangan a ôsimesane ya na be ne bi jôm ése ba yi, yeme na bia nye’e ki be.” *

Nge ô liti nyo mone na a vo’o bi jôm ése a yi, da ye bo tyi’ibi na a bi fulu ya yeme jôé émien enyiñe jé, éko éziñ nge ba tindi nye na a nyu banga, a bo mvine mame ya bisôk, nge mbia jam mfe.

 Volô’ô benyo bon be yeme na jam ése é bili ma’an.

ÑYE’ELANE YA BIBLE: “Jôm ése môt a mias, nje éte fe a ye kôan.”​—Begalate 6:7.

Nyo mon a yiane yeme na jam ése é bili ma’an, nde nge a bo te jôé émien a ye tôbane minjuk. Éve’an é ne na, nge nyo mon a ne ôngase, bôte ba ye tube nye. Ve nge a yeme jôé émien éyoñe ba soñe nye, nge yeme yange a lôte na a tyi’i môte mbo’o nkobô, bôte ba ye nye’e nye. Volô’ô nye na a yeme na ényiñe jé ja ye dañe bo abeñ nge a yeme jôé émien.

Ye’ele’ nyo mone na a yeme telé mame ma dañe mfi ôsu.

ÑYE’ELANE YA BIBLE: “Mi aye yemelane mam me adañ [mfi].”​—Bephilippien 1:10.

E yeme jôé biabebien a nji volô ve na bi sa’ale mame me ne abé; a volô fe bia na bi bo mame bi nji nye’e, ve me to mfi. Wo yiane volô nyo mone na a yemelan mam a yiane telé ôsu. Éve’an é ne na, a yiane taté mane bo bisaé ba te nye ve sikôlô ôsusua na a vôman.

Liti’i nye mbamba eve’ela’a.

ÑYE’ELANE YA BIBLE: “Amu ma te ve mia éve’ela’a na avale ma te bo mia, mia fe mi bo nalé.”​—Jean 13:15, Mfefé Nkôñelan.

Nyo mon a yen aval wo bo éyoñe wo wô’ô ôlun. Liti’i nye na, mame me ne kômeban éyoñ a yeme jôé émien. Éve’an é ne na, éyoñe nyo mon a bo jam é ne abé, ô wô’ô bo aya: ye wo kañ, ye wo jôé womien?