Nge ô dañe jeñe ve na ô fombô nsela’ane a ne zañe mia be bôte bevok, ô ne simesane na, be nji bo mam avale da yian. Ô ne taté na wo biasé be amu mia be be mia selan. Éyoñe ke ô mbili mbia ôsimesan a lat a be, e ne bo ayaé na ô tebe été jap. Jam ete e ne su’ulane bo na ô bo ôbangam.

“Va’an a ba be avak; yiane du a ba be ayi.”​—BEROMAIN 12:15.

Jé éfuse ji ja ye’ele bia? Éfuse ji ja ye’ele bia na, bia yiane bi fulu ya yeme tebe été bôte bevok. E tebe été bôte bevok a tinane na, bia jeñe na bi wô’ôtan mam avale môte mbo’o fe a wô’ôtane me.

Éyoñe bia yeme tebe été môte mbok, bia ye kui na bi yeme na bi nji dañe selane nye. Bia ye yene na bia wô’ôtane mam avale da, a na, bia bo mam avale da. Fulu ya yeme tebe été bôte bevo’o ja volô na bi bo teke fas vôm ba so, amu bia bese bi ne nda bôte jia. Nge bia jeñe na bi yeme bevôme bia be bôte bevo’o bia funan, avale bia yene be da ye tyendé.

Fulu ya yeme tebe été bôte bevok ja ye volô bia na bi semé be. Anne-Marie a ne Sénégal, a mbe a taté’é biasé nsamba bôt éziñ. A kat aval avé fulu ya yeme tebe été bôte bevok é nga volô nye. A jô na: “Éyoñe me mbe me yene’ avale bôte bete ba tôbane minjuk, me nga sili mamiene na, nge ma me mbe me tele’ été jap, me nga ye wô’ôtan aya? Amu nalé me nga taté na ma yeme na me nji dañe bôte bete mfa’a éziñ. Me nji bo jôm éziñ ja bo na me yené mfi a dañe be.” Nge bi jeñe na bi yeme minju’u bôte bevo’o ba tôbane mie, nalé aye bo na bi bo teke yene mam ba bo ve abé abé, ve bia ye ko be éngôngol.

Nge wo yene nsamba bôt éziñ aval étam, jeñe’ na ô yeme bevôme mia be be mia funan. Tame ve’ele simesan avale ba wô’ôtan éyoñ:

• ba di bidi a menda me bôte map

• ba mane môs ésaé

• ba lôt éyoñ a bemvôé bap

• ba vô’ôlô mezik ba nye’e

Mvuse ya valé, simesa’an avale womiene wo wô’ôtan éyoñ wo bo mam mete. Sili’i womiene na:

• ‘Ma wô’ôtan aya éyoñe môt a liti ma na me ne zezé?’

• ‘Ma wô’ôtan aya éyoñe bôte bevo’o ba tyi’i ma ajô, teke taté jeñe na be yeme ma?’

• ‘Nge ma me ne môte wua ya nsamba bôte ba vini, aval avé mé yi na bôte be nyoñe ma?’