Nne aval nkômban ete da so so vé? Amu jé bôte ba kômbô nyiñ nnôm éto? Amu Kalate Zambe a liti na, nne Zambe a nga té bia nalé. (Écclésiaste 3:11) A jô fe na “Zambe a ne nye’an.” (1 Jean 4:8) Ye mia buni na Zambe ya nye’an a mbe ngule ya té bia a nkômbane ya nyiñe nnôm éto, éyoñ éte a bo na nkômban ôte ô bo teke jaléban?

E ne fo’o été na môt éziñ a nji kômbô wu; ke Kalate Zambe émien a jô na awu é ne “nsiñ” wongan! (1 Becorinthien 15:26) Bôte béziñ ba ji’a wu, bevo’o ki ba nyiñ ayap, ve bese ba su’ulane wu. Amu nalé, zezé ôsimesane ya na bi wu ja bo na bôte be ko woñ. Ye awu da ye mane môs éziñ? Ye jam ete e ne fo’o boban?

Ye mia yeme fo’o na atata’a, nkômbane Zambe ô nji be na mona môt a wu? Kalate Metata’a a ve beamu ba liti na nkômbane Zambe ô mbe na, môta binam a nyiñ nnôm éto e si va. Yéhôva Zambe a nga kôme nyoñ éyoñe ya kôme si na é bo étaba’a mona môt. Ane a nga té fam ôsu Adam, a toé nye afube y’Éden, e paradis. Éyoñ éte “Zambe a nga yene na jôm ése a nga bo é mbe mvaé.”​—Metata’a 1:26, 31, Mfefé Nkôñelan.

 Zambe a nga té Adam teke ayeñe y’abé, éve’ela jé émien. (Deutéronome 32:4) Ève, minga Adam, nnye fe a mbe teke ayeñe y’abé, mfuban minsôn a nsisim. Yéhôva a nga jô be na: “Biaéane bon, a fôé, a yiane si nyô, a jôô je; jô’ane fe kose ya mañ, a anone ya yôp, a jôm ése é vee j’awulu si nyô.”​—Metata’a 1:28.

E nga ye sili Adam ba Ève abui éyoñ asu na be jalé si a mvoñe bôte jap. Ève a nga ye biaé bon, bone bé fe be nga ye biaé akekui si ése é nga ye jaé, avale Zambe a nga jô. (Ésaïe 45:18) Ye Yéhôva a nga ye ve Adam ba Ève fan éte nge a mbe a yeme’e na ba ye yene fo’o ve bone bap a bendaé bap, a na ba ye ke yem aval ényiñ ja ye bo mvuse ya valé?

Simesa’ane fe ésaé Yéhôva a nga ve be na be nyoñe ngap a betit. A nga jô Adam na a ve betit biyôlé, ésaé éte ki é nga ye nyoñ ayab éyoñ. (Metata’a 2:19) Ve asu na be nyoñe ngab a be a jôé be, é nga ye sili abui éyoñ asu na be mane yemban a be, a yeme be.

Mebendé Yéhôva a nga ve nda bôt ôsu na, é jalé si a na é nyoñe ngab a betit ma liti fo’o na, a nga té bone be bôte na be nyiñ nnôm éto. Adam a nga nyiñe fo’o fe ôbe nté.

Kalate Zambe a liti na bone be bôt béziñ be nga nyiñe nya ayabe a dañe bia bia nyiñe den. A jô na: “Melu mese Adam a nga to me mbe mimbu mintet ébu a mewôm mela.” A kobô fe ajô bôte besaman be nga nyiñ a lôte mimbu 900. Bi ne lañe Seth, Énosch, Kénan, Jéred, Metuschélah a Noé. Bese be nga nyiñ ôsusua Ndône mendim​—Noé ki a nga nyiñe tañe mimbu 600 ôsusua na Ndône mendim ja so. (Metata’a 5:5-27; 7:6; 9:29) Nde, be mbe ngule ya nyiñ abim ayabe di aya?

Bôte bete bese be nga nyiñ valé mona môt a ndôme jañele ényiñ é mbe teke nsem. Amu nalé, be nga too be nyiñ ayap. Ve aval avé môt a mbe te nsem a mbe ngule ya nyiñ ayap? A aval avé awu da ye vas? Asu na bi bi éyalan ya minsili mite, bia yiane taté yem amu jé bia yômbô a wu.