“Bengaa be Yéhôva be nji be ôsesa ve a bôt étam, be mbe fe ôsesa a bemvu. Môs éziñ, Élaine, Ngaa Yéhôva é mbe é tele fefel ata’a bekalate, a nga ve bemvu bam bebaé biwôlé. Mvuse ya valé, éyoñ ése me mbe me lôte’e afôla ete bemvu bam, be mbe be yi’i na be ke vôme Bengaa be Yéhôva be mbe be tele asu na be bi ‘biwôlé’

“Mvuse bone bengon, bi nga ke ôsu a lôte valé. Bemvu bam be mbe be ja’a biwôlé, me ki me laane bone minlañ a Bengaa be Yéhôva. Ve, me nji be me yi’i na bi dañe laan abui. Me mbe me lôteya mimbu 70, a me nji be me yeme’e mame Bengaa be Yéhôva ba buni. Mbôle mam me nga yen ñyebe Beprotestant me nga te’e ma nyul, me nga ti’i na ma jiba yé’é Kalate Zambe mamien étam.

“Me mbe me yene’e Bengaa be Yéhôva mefôla mefe ya tison, fefele meta’a bekalate map. Be fe be mbe ôsesa. Be mbe be yala’ane minsili miam éyoñ ése a zene ya Kalate Zambe, a nalé a nga bo na me tu’a tabe be ndi.

“Môs éziñ, Élaine a nga sili ma na, ‘Ye wo too ô yeme’e na betite be ne dase Zambe?’ Nde me nga yalane nye na, ‘teke vaa nge beté!’ Ane Élaine a nga liti ma Ésaïe 11:6-9. Éyoñ ete nje me nga bi nkômbane ya tu’a yé’é Kalate Zambe, to’o mbôle me nji be me kañese’e lañ bekalate bap.

“Melu me nga tôé valé, me mbe meva’a ya laan minlañe ya Kalate Zambe a Élaine ba nnôme wé, Brent. Be nga lebe ma na me lañ ataté kalate Matthieu akekui kalate Mam minlôman asu na me tu’a wôk aval avé Bekristen ba yiane nyiñ. Nde me nga bo fe nalé. Mvuse mone éyoñ, bebé ngone samane ya mbu 2016, me nga kañese na ma yé’é Kalate Zambe a Brent ba Élaine.

“Me mbe me bu’uban ayé’é Kalate Zambe dam a bisulane ya akônda sondô ase. Me mbe angôndô ya meva’a ya kôme yé’é mame Kalate Zambe a ye’ele. Me nga baptizôban mbu ô nga tôé valé, a bo Ngaa Yéhôva. Éyoñe ji me bili mimbu 79, a ma ve Zambe akéva amu a nga volô ma na me yen nya ñyebe. Yéhôva a nga botane ma nya abuii amu a nga nyoñe ma ane ébu’a ya nda bôte bebo bisaé bé.”