Arriọba nibun mu awua yọ nẹ, ne emwa nibun ghẹ ghi si egbe koko, kevbe ne emwa ghẹ gha ya egbe rhorho egbe. Avbe Osẹe Jehova wa hoo ne iran lele adia na, sokpan, iran ye hoo ne iran gha ga Osanobua kugbe. Rhunmwuda ọni, iran keghi loo avbe app na ya ru e videoconferencing ra vidio call ya do iko, vbe na ghee Zoom.

Rhunmwuda wẹẹ Ẹbu Nọ Su hoo ne ima gha do iko vbe ẹghẹ hia, iran keghi kpasẹ yọ na loo igho eso ne etẹn ya ru izọhẹ ya ha osa ye Zoom account, ne etẹn mieke na gha loo ẹre ya do iko. Ode $15 ya sẹ $20 ẹre a ya ha osa ye avbe app na ya ru videoconferencing ra vidio call, eso vbe gberra vberriọ. Rhunmwuda ọni, emwamwa ne Ẹbu Nọ Su ru na gele wa ru iyobọ ne iko nibun ni ma sẹtin ha osa ye avbe app na. Vbene Ẹbu Nọ Su te ru emwamwa na, avbe iko na kegha loo avbe app nai ha osa yi ya do iko, a ghaa loo egbe avbe app na ya do iko, ibozẹghẹ emwa ẹre ọ khian sẹtin deba iko nii, deba ọni, avbe app na i vbe mwẹ emwi na ya gbogba ga re, ne iko na do mieke na gha khian hẹnẹhẹnẹ. Sokpan, iko hia ni loo e Zoom account ne otu ọghomwa ha osa yi wa miẹn ere vbọ, rhunmwuda te emwa nibun ghi sẹtin deba iko, kevbe wẹẹ dọmwadẹ iko gha sẹtin mwamwa e Zoom ọghe iran vbene ọ khẹke, ne iko ne iran do mieke na gha khian hẹnẹhẹnẹ. Vbene a guan na, iko nọ gberra 65,000 vbe agbẹnvbo nọ gberra 170, ẹre ọ loo egbe Zoom account na.

Ọ mwẹ iko ọkpa na tiẹre Kairagi, nọ rre Manado, vbe North Sulawesi vbe Indonesia. App na ya ru e vidio call, nai ha osa yi ẹre iran ka gha loo ya do iko, sokpan, ọ ghi sẹ ẹghẹ, iran na suẹn gha loo e Zoom account ne otu ọghomwa ha osa yi. Ọtẹn Nokpia Hadi Santoso khare wẹẹ: “Te etẹn ni ma fiẹnro efoni kevbe kọmputa ghi sẹtin sọyẹnmwẹ iko rhunmwuda, e vidio call ne iran ya do iko i ghi fian inugba nọ khin, ne iran werriegbe gha gualọ vbene iran khian ya la iko nii hẹ.”

Ọtẹn Nokpia Lester Jijón, Jr., nọ re ọkpa vbe ediọn ni rre iko ọghe Guayacanes Oeste nọ rre Guayaquil vbe Ecuador, keghi kha wẹẹ: “Etẹn nibun keghi re emwa ne obọ ma sẹ ọre, rhunmwuda ọni, ọ gha te lọghọ ne etẹn ni rre iko eso sẹtin ha osa ye Zoom account nọ gha kie ẹkpotọ yọ, ne iran hia ya gha do iko kugbe. Nia, rhunmwuda ne Zoom account ne otu ọghomwa ha osa yi na kie ẹkpotọ yọ, ne emwa nibun sẹtin gha deba iko, te ima ghi sẹtin gie na tie emwa nibun gha die iko ọghe ima, vbene ima i na mu ohan wẹẹ, ẹkpotọ i khian kie ne iran ya laọ.”

Ọten Nokpia Johnson Mwanza, nọ re ọkpa vbe ediọn nọ rre iko ọghe Ngwerere North Congregation nọ rre Lusaka vbe Zambia, keghi kha wẹẹ: “Ẹi re avbiẹ inugba ẹre etẹn ni rre iko re tae wẹẹ, ‘te Zoom account ne otu e Jehova ru emwamwa rẹn wa ya ima sikẹ etẹn sayọ, ọ vbe ya ima rẹn wẹẹ, e Jehova hoẹmwẹ ima kevbe wẹẹ ọ gbaroghe ima.’”

Igho eso na zẹkọ na ya gha ru iyobọ ne etẹn ne oguomiẹrẹ sunu da, ẹre otu ya ha osa ye Zoom account na. Sokpan, de eke ne igho na ke rre? Igho na keghi re igho ne emwa ya ru izọhẹ ye iwinna ikporhu nọ khian vbe uhunmwu otagbọn hia. E donate.isa4310.com, ẹre emwa nibun loo ya ru izọhẹ vbe intanẹt. Ma kakabọ kpọnmwẹ uwa, ne uwa na ya ekhọe hia ru izọhẹ, izọhẹ ne uwa ru, ẹre ọ zẹe ighẹ a vbe sẹtin ru iyobọ ne emwa ni rre uwu ọlọghọmwa vbe uhunmwu otagbọn hia.—2 Kọrinti 8:14.