Long Bigfala Toktok blong Jisas antap long hil, hem i talem se: “Olgeta samting we yufala i wantem blong ol man oli mekem long yufala, yufala tu i mas mekem long olgeta.” (Matiu 7:12; Luk 6:31) Samfala oli yusum defren tok blong talem, oli se: “Mekem long ol narafala olsem we yu wantem se oli mekem long yu.”—Encyclopedia of Philosophy.

•  ?Jisas i minim wanem?

•  ?Olsem wanem rul ya i save mekem i gud long yumi evriwan?

•  ?Hemia i givhan long yumi blong kasem samting long narafala nomo?

•  ?Olsem wanem yu save folem advaes ya blong Jisas?

 Jisas i pulum yumi blong mekem i gud long ol narafala olsem we yumi wantem se oli mekem long yumi. Bighaf blong ol man oli laekem taem narafala i gat respek, i kaen, mo i soemaot lav long olgeta. Taswe yumi sud mekem i sem mak long ol narafala.—Luk 6:31.

 Rul ya i stret long evri samting long laef blong yumi. Olsem nao, hem i save . . .

•   Mekem mared i stanap strong.—Efesas 5:28, 33.

•   Givhan long ol papa mo mama blong oli tijim ol pikinini blong olgeta.—Efesas 6:4.

•   Mekem se yumi joen gud wetem ol fren, ol neba, mo olgeta we yumi wok wetem.—Ol Proveb 3:27, 28; Kolosi 3:13.

 Rul ya i soemaot stamba tingting long plante haf blong Oltesteman. Rul blong Jisas i soemaot “mining blong Loa [Jenesis kasem Dutronome] mo blong Ol Profet [ol buk blong ol profet].” (Matiu 7:12) Hemia i min se rul ya i soemaot wan stamba trutok blong Oltesteman, se yumi mas lavem neba blong yumi.—Rom 13:8-10.

 Nogat. Jisas i wantem makem se yumi mas givim samting long narafala. Taem Jisas i talem rul ya, hem i stap tokbaot olsem wanem blong mekem i gud long olgeta man, wetem ol enemi blong yumi tu. (Luk 6:27-31, 35) Taswe rul ya i stap pulum yumi blong mekem i gud long ol narafala.

1.  1. Lukluk gud ol samting raonabaot long yu. Lukluk ol man we oli stap klosap long yu. Maet yu luk wan we i stap karem ol hevi samting we i pem long stoa, o yu harem nius se neba blong yu i slip long hospital, o yu luk se wan we yu wok wetem, tingting blong hem i foldaon. Taem yu “tingbaot ol narafala,” bambae yu luk ol janis blong talem o mekem samting blong givhan long olgeta.—Filipae 2:4.

2.  2. Traem kasem save long filing blong narafala. Tingbaot se yu stap long sem situesen olsem hem. ?Bambae yu harem olsem wanem? (Rom 12:15) Taem yu traehad blong kasem save long filing blong narafala, plante taem yu harem se yu wantem givhan long hem.

3.  3. Rere blong jenisim tingting blong yu. Tingbaot se yumi evriwan i defdefren. Samting we narafala i wantem se yu mekem long hem, maet i defren long samting we yu yu wantem se narafala i mekem long yu. Taswe taem yu mekem wan samting blong narafala, traem jusum samting we bambae i mekem hem i glad.—1 Korin 10:24.