Sam skul oli singaot Maekel se “Tabu Maekel,” hemia nem blong Jisas, bifo mo afta we hem i laef long wol. a Maekel i rao wetem Setan afta we Moses i ded, mo Maekel i givhan long wan enjel blong talemaot mesej blong God long profet Daniel. (Daniel 10:13, 21; Jud 9) Nem ya Maekel i minim, “?Hu i Olsem God?” Mo Maekel i soemaot mining blong nem ya taem hem faet wetem ol enemi blong God, blong protektem hae rul blong God.​—Daniel 12:1; Revelesen 12:7.

 Hemia sam risen we oli soemaot se i stret nomo blong talem se Jisas nao i Maekel.

•   Maekel i “Jif blong ol enjel.” (Jud 9) Tok ya “jif blong ol enjel” i kamaot nomo long tu vas blong Baebol. Long tufala vas ya, oli yusum wan tok we i givim tingting blong wan man nomo, i no plante. Wan long ol vas ya i talem se Masta Jisas “bambae i aot long heven i kamdaon, mo i singaot bigwan wetem voes blong jif blong ol enjel.” (1 Tesalonaeka 4:​16) Jisas nao i gat “voes blong jif blong ol enjel” from we hem nao Maekel, jif blong ol enjel.

•   Maekel i lidim wan ami blong ol enjel. “Maekel wetem ol enjel blong hem oli stap faet agens long bigfala algita ya,” Setan. (Revelesen 12:7) Maekel i gat bigfala paoa i bitim ol narafala enjel, from we hem i “hae moa long ol narafala enjel.” (Daniel 10:13, 21; 12:1) David E. Aune, wan man we i stadi long Niu Testeman i talem se, tok ya i soemaot se Maekel “i komanda blong ami blong ol enjel.”

   Baebol i tokbaot nem blong wan narafala man bakegen se i lidim ami blong ol enjel. Hemia “Masta Jisas we i stap long heven, i kam long klia ples wetem ol strong enjel blong hem, long bigfala faea blong panisim olgeta we oli no save God.” (2 Tesalonaeka 1:​7, 8; Matiu 16:27) Jisas i “go finis long heven. Mo God i putum ol enjel, mo ol haeman, mo olgeta we oli gat paoa oli stap aninit long hem.” (1 Pita 3:​21, 22) Bambae i narakaen sipos God i putumap Jisas mo Maekel blong tufala i stap kompit blong kam komanda blong ol enjel. Taswe, i stret nomo blong talem se tufala nem ya, Jisas mo Maekel, tufala i minim sem man nomo.

•   Maekel ‘bambae i kamtru’ long “taem blong trabol” we man i no tingbaot. (Daniel 12:1) Long buk blong Daniel, plante taem tok ya “kamtru” i minim wan king we i girap mo i kam blong tekem wan spesel aksen. (Daniel 11:​2-4, 21) Jisas Kraes, we hem nao i “Tok Blong God,” bambae i tekem aksen olsem “King blong ol king” blong kilim i ded ol enemi blong God, mo protektem ol man blong God. (Revelesen 19:11-​16) Bambae hem i mekem samting ya long taem blong “bigfala trabol” we i neva hapen bifo, stat taem God i mekem wol ya kam kasem naoia.”​—Matiu 24:21, 42.