Sam man oli wantem save sipos Tok Blong God long Baebol i bin jenis. Profet Aesea i talem se tok blong God “bambae i stap olwe, gogo i no save finis.” (Aesea 40:8) ?Olsem wanem yumi save sua se ol promes blong God oli stap gud mo oli no jenis?

God i gat paoa blong protektem mo lukaotgud long Tok blong hem, blong man i no spolem. Long taem bifo, taem ol man blong raetem kopi oli mekem ol kopi blong tok blong God, oli kaontem evri leta long tabu tok ya, blong meksua oli no ademap, jenisim, o tekemaot sam leta. Be ol man oli no stretgud olgeta, taswe i gat sam smolsmol mastik we sam man blong raetem kopi oli mekem.

I gat plante taosen kopi blong ol olfala hanraet blong Baebol. Sipos wan kopi i defren smol, oli save komperem wetem ol narafala kopi, blong faenemaot se weswan i tru.—Blong save moa, yu luk atikol ya “Has the Bible Been Changed or Tampered With?” long jw.org.

Eksampol, tingbaot ol olfala hanraet ya we oli kolem se Ded Si Skrol, we oli faenem long ol hol blong ston klosap long Ded Si long yia 1947. Ol olfala hanraet ya oli ol haf blong Baebol we oli blong bitim tu taosen yia bifo. Ol man blong stadi oli komperem ol olfala hanraet ya wetem Baebol blong tede. ?Oli faenem wanem?

Ol man blong stadi oli faenem se samting we i stap long Tok blong God tede, i sem mak long hemia blong ol faswan hanraet. * Afta we oli stadigud long ol olfala hanraet ya, oli pruvum se ol tok we yumi ridim long Baebol, i sem mesej we i stap long ol faswan hanraet. Yumi save sua se God i lukaotgud long ol tok blong hem long Baebol, blong oli stapgud kam kasem tede.

Taswe taem yumi ridim Baebol, yumi save bilif mo trastem fulwan se ol tok blong hem oli tru. Wetem tingting ya, i gud yumi luk samting we yumi save lanem long saed blong God, tru long ol profet blong hem.