1. ?From wanem i gud blong tingbaot ol samting we yumi no save luk wetem prapa ae blong yumi? (Yu luk pija long stat blong stadi.)

JEHOVA i givim wan nambawan presen long yumi, hemia blong tingbaot ol samting we oli no kamtru yet. Fasin ya i givhan long yumi blong putum tingting i stap long ol gudfala samting we bambae oli kamtru, mo i givhan long yumi blong mekem ol desisen we oli waes. Jehova i save ol samting we bambae i kamtru long fiuja, mo hem i talemaot sam long ol samting ya long yumi. Nating se yumi no save luk ol samting ya long prapa ae blong yumi, be yumi save tingbaot olgeta, mo samting ya i mekem yumi bilif strong se bambae oli kamtru.—2 Korin 4:18.

2, 3. (1) ?Fasin blong tingbaot wan samting we i no hapen yet, i save givhan olsem wanem long yumi? (2)  ?Wanem ol kwestin we bambae yumi ansa long olgeta long stadi ya?

² Samtaem yumi save tingbaot ol samting we bambae oli neva hapen. Eksampol, maet wan smol gel i stap tingbaot se hem i stap flae long wan bataflae, be hemia wan samting we i no save hapen. Be mama blong Samuel, Hana, i stap tingbaot wan samting we i tru, i no wan drim. Hem i tekem taem blong tingbaot taem ya we bambae hem i tekem boe blong hem i go long haos tapolen blong  wok wetem ol pris. Hemia i wan samting we hem i wantem mekem. Taswe, taem Hana i stap tingbaot samting ya, tingting blong hem i strong moa blong holem promes we hem i mekem long Jehova. (1 Samuel 1:22) Sipos yumi stap tingbaot ol samting we Jehova i promes blong mekem, yumi stap tingbaot wan samting we bambae i kamtru.—2 Pita 1:19-21.

³ Plante man blong Jehova bifo, oli stap tingbaot ol samting we Jehova i promes blong givim long olgeta. ?From wanem i gud we oli tingbaot ol promes blong hem? ?Mo from wanem i gud we yumi tu yumi tingbaot se laef blong yumi bambae i olsem wanem taem ol promes blong Jehova oli kamtru?

4. ?Wanem i mekem se Ebel i stap tingbaot wan gudfala fiuja?

⁴ Ebel i fas man we i bilif long ol promes blong Jehova. Hem i save wanem we Jehova i talem long snek, afta we Adam mo Iv tufala i mekem sin. Jehova i talem se: “Yu mo woman ya, bambae yutufala i no laeklaekem yutufala, bambae yutufala i stap agens long yutufala. Ol pikinini we bambae oli kamaot biaen long yu, mo ol pikinini we bambae oli kamaot biaen long hem, bambae oli stap badfren long olgeta. Nao wan long ol pikinini ya blong hem bambae i smasem hed blong yu, mo yu bambae yu kakae leg blong hem.” (Jenesis 3:14, 15, futnot) Be Ebel i no save se samting ya bambae i hapen olsem wanem, taswe hem i mas tingting plante long promes ya. Maet hem i stap tingbaot se: ‘?Hu ya man ya we snek bambae i kakae leg blong hem, mo we bambae i givhan long ol man blong oli kam stret gud olgeta?’ Nomata se Ebel i stap tingbaot nomo ol samting ya, hem i bilif strong se promes blong Jehova bambae i kamtru. Taswe, Jehova i glad long sakrefaes blong hem.—Ridim Jenesis 4:3-5; Hibrus 11:4.

5. ?From wanem fasin blong Inok blong tingbaot wan gudfala fiuja, i givhan long hem blong i gat strong tingting?

⁵ Wan narafala man we i gat strong bilif long God, hemia Inok. Hem i laef long medel blong ol man we oli stap sakem ‘ol rabis tok’ agens long God. Be Inok i no fraet long olgeta. Hem i gohed blong talemaot ol tok panis blong Jehova. Hem i talem long ol man se Jehova bambae i spolem ol rabis man. (Jud 14, 15) ?Wanem i givhan long Inok blong i gat strong tingting? Maet samting we i givhan long Inok, hemia se hem i stap tingbaot wan taem we evri man oli wosip long Jehova nomo.—Ridim Hibrus 11:5, 6, NW. *

6. ?Afta we Bigfala Wota i ron, maet Noa i stap tingbaot wanem?

⁶ Noa i laef taem Bigfala Wota i ron, from we hem i bilif long Jehova. (Hibrus 11:7) Mo from we hem i gat bilif, hem i mekem sakrefaes i go long Jehova. (Jenesis 8:20) Afta we Bigfala Wota i ron, rabis fasin i kam antap bakegen. Nimrod i stat blong rul mo hem i wantem se ol man oli agensem Jehova. (Jenesis 10:8-12) Be Noa i gat strong bilif oltaem. Hem i gat sem tingting olsem Ebel. Noa i sua fulwan se wan dei, God bambae i tekemaot sin mo ded. Maet hem i stap tingbaot taem ya tu we bambae i no moa gat ol rabis man oli rul. !Yumi tu yumi save tingbaot gudfala taem ya, we naoia i klosap tumas!—Rom 6:23.

7. ?Ebraham, Aesak, mo Jekob, oli stap tingbaot wanem fiuja?

⁷ Ebraham, Aesak, mo Jekob oli stap tingbaot wan nambawan fiuja, from we Jehova i promes se bambae olgeta neson oli kasem blesing from wan man we bambae i “kamaot biaen” long olgeta. (Jenesis 22:18; 26:4; 28:14) God i promes long olgeta tu se bambae oli kam plante we plante, mo bambae oli laef long wan naesfala ples we hem i givim long olgeta. (Jenesis 15:5-7) Trifala oli savegud se ol promes ya blong Jehova bambae oli kamtru, taswe oli stap tingbaot se famle blong olgeta i laef finis long graon ya we Jehova i promes blong givim. Stat taem Adam mo Iv tufala i mekem sin, Jehova i givhan long ol man blong hem blong oli kasemsave se bambae oli kasem gudfala laef bakegen.

8. ?Wanem i givhan long Ebraham blong i gat strong bilif mo i obei?

⁸ Ebraham i gat strong bilif, nao hem i obei long Jehova nating se samtaem i no isi. Hem i save mekem olsem from we hem mo ol narafala man long taem blong hem, oli stap tingbaot ol samting we Jehova i promes blong mekem, nating se oli no kamtru yet long taem blong olgeta. Baebol i talem se: ‘Olgeta oli stap luk ol samting ya olsem we oli stap longwe yet long olgeta, be oli glad tumas blong luk.’ (Ridim Hibrus 11:8-13.) Ebraham i save se bifo olgeta, oltaem ol promes blong Jehova oli kamtru, taswe hem i sua gud se ol samting we Jehova i promes blong mekem long fiuja, oli mas kamtru.

9. ?Bilif we Ebraham i gat long ol promes blong God, i halpem hem olsem wanem?

⁹ Bilif we Ebraham i gat long ol promes blong Jehova, i givhan long hem blong mekem samting we Jehova i askem hem blong mekem. Blong soemaot bilif ya, hem i lego taon blong Uru, mo i muv i go long Kenan mo i stap long wan taon afta narawan. Hem i no stap longtaem long wan taon from we hem i save se ol taon raonabaot, oli no save stap longtaem, mo ol man we oli rul long olgeta, oli no wosipim Jehova. (Josua 24:2) Defren olgeta, long ful laef blong Ebraham, hem i stap wet long “wan taon we fandesen blong hem i save stap oltaem nomo. Taon ya, God i mekem ol plan blong hem.” (Hibrus 11:10) Ebraham, Ebel, Inok, Noa, mo sam narafala bakegen, oli bilif long laef bakegen. Mo oli stap tingbaot taem ya we Kingdom blong Jehova bambae i rulum wol ya blong olwe. Taem oli stap tingbaot laef olwe long paradaes, bilif blong olgeta long Jehova i kam strong moa.—Ridim Hibrus 11:15, 16.

10. ?Taem Sera i stap tingbaot fiuja, samting ya i givhan long hem olsem wanem?

¹⁰ Yu traem tingbaot Sera, woman blong Ebraham. Hem tu i bilif strong long ol promes blong Jehova. Nating se hem i no gat pikinini yet taem hem i gat 90 yia, hem i stap tingbaot taem ya we bambae hem i gat wan bebi. Hem i stap tingbaot taem ya tu we bambae ol pikinini blong hem oli kam plante we plante. (Hibrus 11:11, 12) ?Wanem i mekem se Sera i suagud long samting ya? Jehova i talem long Ebraham se: “Mi bambae mi blesem hem, mi mekem we hem bambae i bonem wan pikinini boe blong yu. Mo from we mi mi blesem hem, bambae mi mi mekem hem i kam stamba blong ol man  blong plante ples. Mo long olgeta ya, bambae i gat ol king tu oli stap.” (Jenesis 17:16) Biaen, Sera i gat wan pikinini boe we nem blong hem Aesak. Merikel ya i mekem Sera i bilif se ol narafala promes blong Jehova tu bambae oli mas kamtru. Long sem fasin, bilif blong yumi i save kam strong moa sipos yumi stap tingbaot ol gudfala samting we Jehova i promes blong givim long yumi.

11, 12. ?Wanem i givhan long Moses blong i lavem Jehova moa?

¹¹ Moses tu i bilif long ol promes blong Jehova. Hem i lavem Jehova tumas. Taem Moses i yangfala, hem i stap long haos blong king long Ijip. Taswe i isi nomo blong hem i wantem gat hae nem mo blong kam wan rijman. Be hem i no tingbaot ol samting ya. Stret papa mo mama blong hem, tufala i tijim hem long saed blong Jehova, mo promes we Jehova i mekem se bambae ol man Isrel oli fri, oli no moa slef long Ijip, mo bambae hem i givim wan gudfala kantri long olgeta. (Jenesis 13:14, 15; Eksodas 2:5-10) Moa we Moses i stap tingbaot ol promes ya, moa we hem i lavem Jehova.

¹² Baebol i talem se: “From we Moses i stap bilif strong long God, taswe taem hem i kam bigman, hem i no wantem we olgeta oli talem se hem i pikinini blong gel blong Fero. Hem i no wantem blong i stap hapi long fasin blong sin we i blong smoltaem nomo, hem i glad moa blong go joen long ol man blong God blong harem nogud wetem olgeta. Hem i stap ting se sipos ol man oli laf long hem from Mesaea ya we God bambae i sanem hem i kam, be hem bambae i no save sem. Hem i harem gud moa long samting ya, i winim we i harem gud long ol gudfala samting blong laef long Ijip. Hem i mekem olsem from we oltaem hem i stap luk long pei we God bambae i givim long hem.”—Hibrus 11:24-26.

13. ?From we Moses i stap tingbaot ol promes blong Jehova, hemia i givhan long hem olsem wanem?

¹³ Moses i tingting plante long ol promes ya blong Jehova. Olsem ol narafala man blong Jehova, Moses i stap tingbaot taem ya we Jehova bambae i mekem evri man oli fri, oli no moa ded. (Job 14:14, 15; Hibrus 11:17-19) Hem i savegud se Jehova i lavem ol man tumas. Taswe hem i lavem tumas Jehova mo i bilif strong moa long hem. Hemia i givhan long hem blong i mekem wok blong Jehova long ful laef blong hem. (Dutronome 6:4, 5) Nating se King Fero i wantem kilim hem, be hem i no fraet. Hem i save se Jehova bambae i givim pei long hem long fiuja.—Eksodas 10:28, 29.

14. ?Sam man oli stap tingbaot wanem?

¹⁴ Plante man oli stap tingbaot ol samting we bambae oli neva hapen. Nating se oli pua, be oli stap drim se bambae oli kam rij mo oli no moa wari long wan samting. Be Baebol i talem se ol man long wol ya blong Setan ‘oltaem oli stap kasem trabol, oli stap harem nogud.’ (Ol Sam 90:10) Samfala oli stap tingbaot se gavman blong man bambae i stretem ol trabol we oli stap kasem. Be Baebol i talem se Kingdom blong God nomo i save mekem olsem. (Daniel 2:44) Mo plante man oli ting se ol rabis fasin bambae oli neva finis. Be Baebol i talem se God bambae i finisim ol rabis fasin blong wol. (Sefanaea 1:18; 1 Jon 2:15-17) Tru ya, olgeta we oli stap tingbaot ol samting we bambae oli neva kamtru, bambae oli harem nogud bigwan.

15. (1) ?From wanem yumi save harem gud taem yumi stap tingbaot fiuja blong yumi? (2) Yu tokbaot wan samting we yu stap tingbaot blong mekem long fiuja.

¹⁵ Jehova i promes blong givim wan nambawan  fiuja long yumi. Samfala bambae oli laef long heven mo sam narafala bambae oli laef olwe long wol. ?Yu yu stap tingbaot taem ya we bambae yu harem gud fulwan long ol samting we Jehova i promes blong givim? Taem yu stap tingbaot taem ya, ating yu harem gud tumas mo yu gat strong tingting blong mekem wok blong Jehova oltaem. Maet yu stap tingbaot taem ya we bambae yu laef olwe. Yu stap tingbaot se yu wok wetem ol narafala blong mekem wol i kam wan paradaes. Olgeta we oli lukaot long ol wok ya oli kea long yu. Evriwan raonabaot long yu, oli lavem Jehova olsem yu. Yu gat gud helt, yu gat paoa, mo yu no moa wari long wan samting. Yu yu glad from we yu yusum save mo gudhan blong yu blong givhan long ol narafala mo blong ona long Jehova. Maet yu givhan long olgeta we oli laef bakegen blong oli save Jehova. (Jon 17:3; Ol Wok 24:15) Ol samting ya we yu stap tingbaot, oli no wan drim nomo. Bambae oli mas kamtru from we hemia nao samting we Baebol i talem.—Aesea 11:9; 25:8; 33:24; 35:5-7; 65:22.

16, 17. ?From wanem i gud blong tokbaot samting we bambae yumi mekem long fiuja?

¹⁶ Taem yumi tokbaot ol samting we yumi wantem mekem long niufala wol wetem ol Kristin brata mo sista, ol promes blong Jehova bambae oli kam klia moa long tingting blong yumi. I tru se yumi no save stret, samting we bambae yumi wanwan i mekem. Be taem yumi tokbaot samting we yumi wantem mekem, yumi soemaot se yumi bilif long ol promes blong Jehova. Long rod ya, yumi stap mekem sem mak olsem Pol mo ol Kristin long Rom. Yumi stap givgivhan long yumi blong mekem bilif blong yumi i strong, blong gohed blong mekem wok blong Jehova, long ol las dei ya.—Rom 1:11, 12.

¹⁷ Taem yumi stap tingbaot ol promes blong Jehova, bambae yumi no tingting tumas long ol trabol we yumi stap kasem.  Wan taem, Pita i wari mo i talem long Jisas se: “Mifala i bin lego evri samting blong mifala, blong kam biaen long yu. ?Bambae mifala i kasem wanem?” Jisas i wantem se Pita mo ol narafala disaepol oli tingbaot ol nambawan samting we bambae oli mekem long fiuja. Hem i talem long olgeta se: “Tru mi talem long yufala, long niufala wol ya we bambae i kam, mi, mi Pikinini blong Man, bambae mi King, mi sidaon long bigfala jea blong mi. Nao long taem ya, yufala twelef ya we yufala i stap biaen long mi, bambae yufala tu i king, yufala i save sidaon long ol bigfala jea blong yufala. Nao bambae yufala i hed long ol twelef laen blong Isrel, blong rul long olgeta. Mo man we i lego haos blong hem, no brata no sista blong hem, no papa no mama blong hem, no pikinini blong hem, no graon blong hem from we hem i man blong mi, hem bambae i no save sot long ol samting ya. Bambae hem i save kasem ol samting ya wan handred taem antap bakegen, mo bambae hem i gat laef we i no save finis.” (Matiu 19:27-29) Taswe, Pita mo ol narafala disaepol oli save tingbaot taem ya we bambae oli rul wetem Jisas long heven mo oli givhan long ol man we oli obei long God blong oli kam stret gud olgeta.

18. ?Taem yumi stap tingbaot taem ya we ol promes blong Jehova oli kamtru, samting ya i mekem i gud long yumi olsem wanem?

¹⁸ Yumi tokbaot finis se ol man blong Jehova oli gat strong bilif mo oli harem gud, from we oli stap tingbaot wan gudfala fiuja we Jehova i promes blong givim. Ebel i stap tingbaot promes ya tu mo i bilif long hem, nao Jehova i glad long hem. Ebraham i stap tingbaot taem ya we promes blong Jehova long saed blong ‘pikinini blong woman’ bambae i kamtru, taswe hem i obei long Jehova nating se samtaem i no isi. (Jenesis 3:15) Moses i stap luk long pei we Jehova i promes blong givim long hem, mo samting ya i mekem se hem i lavem Jehova tumas mo i bilif strong long hem. (Hibrus 11:26) Taem yumi stap tingbaot taem ya we Jehova bambae i mekem ol promes blong hem oli kamtru, bilif blong yumi mo lav we yumi gat long Jehova bambae i kam strong moa. Long nekis stadi, bambae yumi tokbaot wan narafala rod blong tingbaot ol samting we yumi no save luk long prapa ae blong yumi.