SERA * blong Gana, we i mared long Jekob 17 yia finis, i talem se: “Klosap evritaem we mitufala i rao, hem i from mane nomo.” Hem i gohed se: “Mi mi kam kros from we mi wok strong blong lukaot long famle, be Jekob i neva tokbaot mane long mi. Afta we mitufala i rao, mitufala i no moa toktok blong plante wik.”

Man blong hem, Jekob, i talem se: “Samtaem, mitufala i tok kros long mitufala. Hemia i hapen from we mitufala i no toktok klia, nao mitufala i no kasem save long tingting blong mitufala. Mo tu, rao i kamaot taem mitufala i no tingting gud bifo we mitufala i toktok.”

Netan blong India i jes mared, nao wan dei papa mo mama blong woman blong hem, tufala i rao. Olfala man i singaot strong long olfala woman. Netan i talem se: “Olfala woman i harem nogud tumas, nao i aot long haos. Taem mi askem long olfala man from wanem hem i tok strong olsem, hem i talem se, ‘Yu mared long gel blong mi, be yu no gat raet blong toktok.’ Nao hem i singaot strong long mifala evriwan.”

Ating yu tu yu bin luk se sipos yu talem sam tok we yu no tingting gud long hem, long wan taem we i no stret, hemia i save mekem rao i kamaot. Samting we i stat olsem wan storian nomo, i save kam wan rao kwiktaem. I no gat man we i save talem tok we i stret evri taem, taswe i isi blong kasem rong tingting mo jajem narawan. Nating se i olsem, yumi save mekem pis long famle mo joen gud.

?Yu save mekem wanem taem rao i kamaot? ?Wanem ol samting we yu save mekem blong putumbak pis long famle? ?Olsem wanem Sera, Jekob, Netan, mo ol narafala oli save holemtaet pis long famle? Plis, yu ridim ol tok we i kam biaen.