Ol Impoten Save Long Sik Ya Malaria
Wol Helt Ogenaesesen i talem se long yia 2013, bitim 198 milian man oli kasem malaria, mo samwe long 584,000 oli ded. Long evri 5 man we oli ded, 4 long olgeta oli pikinini we oli no gat 5 yia yet. Sik ya i stap long klosap 100 kantri long wol, we bitim 3 bilian man oli stap long olgeta.
1 ?MALARIA HEM I WANEM?
Malaria i wan bebet we i laef insaed long wan man no wan anamol. Man we i kasem sik ya, hem i fiva, i kolkol, i swet, hed mo bodi i soa, bel i nogud, mo hem i traot. Ol saen ya oli save kambak evri 48 no 72 aoa, i dipen long wanem kaen malaria we man i gat, mo i dipen tu sipos sik ya i stap long bodi blong hem longtaem finis no i jes kasem.
2 ?SIK YA I PAS OLSEM WANEM?
-
Ol bebet blong malaria (nem blong olgeta Plasmodia), oli go long blad blong man taem wan woman moskito (nem blong hem Anopheles) i stikim man.
-
Ol bebet ya oli go insaed long ol smosmol samting long leva blong man (nem blong olgeta cell), mo long ples ya oli kam plante.
-
Taem wan long ol smosmol samting ya long leva i bosta, ol bebet ya oli kamaot nao oli go insaed long ol smosmol samting we oli stap long blad blong man (ol red cell). Long ples ya, oli kam plante moa.
-
Taem wan long ol smosmol samting ya long blad i bosta, ol bebet oli kamaot bakegen, nao oli go insaed long ol narafala smosmol samting ya.
-
Fasin ya i stap gohed gogo man i kam sik tumas. Man ya bambae i luk ol saen blong malaria evri taem we wan long ol smosmol samting long blad i bosta.
3 ?OLSEM WANEM BLONG BLOKEM MALARIA?
Sipos yu stap long wan kantri we malaria i fulap long hem . . .
-
Yu mas slip aninit long moskito net. Net ya
-
oli mas wasem long meresin.
-
i no mas brok mo i no mas gat hol long hem.
-
yu taetem raon long matres, mo yu pusum ol en blong hem oli go aninit.
-
-
Yu mas spre insaed long haos.
-
I gud yu putum skrin net long ol doa mo windo. Mo sipos yu yusum fan no ekondisen, bambae i had blong ol moskito oli sidaon long yu.
-
Yu werem klos we oli waet mo oli kavremap ful bodi.
-
Yu no go long bus we moskito i fulap long hem, mo long ol ples blong wota we oli putum eg long hem.
-
Taem yu kasem malaria, yu mas go karem meresin kwiktaem.
Sipos yu gat tingting blong go long wan kantri we malaria i fulap long hem . . .
-
Bifo we yu go, yu mas kasem moa save long saed blong malaria long kantri ya. Bebet blong malaria long wan ples i defren long narafala ples. Yu mas karem meresin we i stret long bebet blong kantri we yu go long hem. Mo tu, i gud yu toktok long dokta blong yu blong faenemaot se helt blong yu i olsem wanem.
-
Taem yu go long narafala kantri ya, yu mas folem ol advaes we yumi tokbaot finis antap.
-
Sipos yu kasem malaria, yu mas go karem meresin kwiktaem. Yu save haremsave ol saen blong malaria, wan wik go kasem fo wik afta we moskito i kakae yu.
