HILTON i laekem boksing. Taem hem i gat 7 yia, hem i stat blong faet. Hem i faet long eni ples, insaed mo afsaed long ring. Long skul hem i stap lukaotem faet long ol fren. Hem i talem se: “Mi plei laki, mi stil, mi lukluk ol rabis pija, mi spolem ol woman, mo mi swea long papa mo mama blong mi. Papa mo mama, tufala i ting se mi no moa save jenisim ol fasin blong mi. Taem mi finis skul, mi aot long haos.”

Twelef yia afta, taem Hilton i kambak long haos, papa mo mama blong hem tufala i sapraes tumas long hem. Hem i kwaet, hem i bos long tingting, mo hem i gat respek. ?Wanem i mekem se fasin blong Hilton i jenis? Taem hem i stap hem wan, hem i tingting plante long laef blong hem. Mo tu hem i ridim Baebol blong luk sipos hem i save jenisim ol fasin blong hem. Hem i talem se: “Mi folem ol tok we mi ridim long Baebol. Mi lego olfala fasin blong mi mo mi ona long papa mo mama blong mi olsem Efesas 6:2, 3 i talem. Hemia fastaem long laef blong mi we mi glad olsem. Papa mo mama tu, tufala i glad.”

Stori blong Hilton i soemaot se Baebol i stret yet tede mo i gat paoa blong jenisim fasin blong man. (Hibrus 4:12) I gud yumi luk sam long ol gudfala fasin we Baebol i tokbaot, olsem no giaman, bos long tingting, stap tru long narafala, mo lav. Mo tu i gud yumi luk olsem wanem ol fasin ya oli save mekem laef i kam gud moa.