TAEM yu tingbaot fiuja, ?yu yu fraet? Sipos yes, i no yu nomo. Stat long taem bifo kam kasem tede, ol man oli traem talemaot ol samting we bambae i kamaot long fiuja. Plante oli luksave se fiuja blong wol bambae i nogud. Plante taosen yia finis, ol man oli wantem tumas blong save sipos i tru we wol bambae i finis, no i no tru.

Yu traem tingbaot ol stori we ol man oli stap raetem mo aktem, blong soemaot samting we oli ting se bambae i hapen. I gat ol katun, ol stori long TV, plante handred muvi, mo plante taosen buk we oli tokbaot en blong wol. Ol stori ya oli tokbaot ol narakaen enemi we oli kam mekem faet long ol man blong traem kilimaot olgeta. I gat ol robot, mo ol bigfala dabolbun, mo ol man blong ol narafala planet, mo ol gos, mo ol mangki, mo ol pijin, mo ol narakaen rat, mo ol bigbigfala honet. Be i no gat wan man we i ting se ol stori ya oli tru, mo se laef blong olgeta man blong wol bambae i finis olsem.

Sam narafala stori mo tingting oli mekem ol man oli wari moa. Oli talem se sam long olgeta oli stanap long ol save we ol saentis oli faenemaot finis. Wan tingting olsem, hemia se wantaem nomo, olgeta graon long wol bambae i sevet. Afta, bambae i gat ol bigfala taetel wef, graon bambae i seksek bitim mak, mo ol bigbigfala volkeno bambae oli bosta. Wan narafala tingting, hemia se ol planet bambae oli laenap. Samting ya bambae i mekem wan win we i strong bitim mak i kamaot long san, mo bambae i spolem evri samting long wol. I gat wan narafala tingting bakegen we i joen wetem wol blong yumi. Wol i olsem wan bigfala magnet. Mo i gat tu ples long wol we paoa blong magnet i strong moa, wan long not mo wan long saot. Sam man oli stap talem se bambae ples ya long not i jenis i go long saot, mo hemia long saot bambae i jenis i go long not. Samting ya bambae i mekem se rabis hot blong san i kilim yumi evriwan i ded. Hemia nao ol samting we plante man oli ting se bambae i hapen. Be yu no mas wari. Ol samting ya bambae oli no hapen.

I gat plante buk mo plante websaet long Intenet we oli talemaot se en blong wol bambae  i kamtru long 21 Disemba long yia ya. ?Olsem wanem? ?Tok ya i tru? Wan tingting, hemia se i gat wan planet, we oli putum nem blong hem se Nibiru, (narafala nem blong hem se Planet X). Oli talem se planet ya i stap long rod blong hem blong smasem wol, mo bambae i kasem yumi long Disemba 2012. I no gat pruf se tingting ya mo plante narafala tingting olsem oli tru. Oli stanap nomo long kalenda blong ol man Maya bifo, long sentrol Amerika. Sam man oli talem se kalenda blong ol man Maya bambae i finis long yia 2012, long taem we i kolkol long not blong wol. Hemia long dei we san i pas long saed blong skae nomo, i no antap long medel blong skae. a

Samfala we oli bilivim ol tok ya oli bildim ol ples blong haed long yad blong olgeta. Sam oli pem bigfala mane blong rentem sam rum aninit long graon, we oli save go haed long olgeta. Sam narafala oli aot long ples blong olgeta, oli muv i go antap long ol bigfala hil. Long ples ya, oli folem wan fasin blong laef we oli no dipen long ol samting we ol man long taon oli gat, olsem wota saplae mo lektrik.

Be i gat plante man we oli no bilif nating se ol samting ya bambae oli kamtru. Oli laf long tingting ya se en blong wol bambae i kamtru i no longtaem. Ol saentis we oli wok long NASA, oli talem se: “Bambae i no gat wan nogud samting i hapen long wol long yia 2012. Bitim fo taosen milian yia, wol blong yumi i stap gohed long rod blong hem. Ol saentis we yumi save trastem olgeta, oli save gud se i no gat wan samting we bambae i spolem wol long yia 2012.”

Be yu no mas ting se ol samting bambae i stap olsem nomo we i no gat trabol long fiuja. Yu no mas ting se ol tok ya en blong wol i blong ol man we oli bilif long enikaen stori nomo. ?Olsem wanem? ?En blong wol bambae i kam? Sipos yes, ?bambae i kamtru wetaem mo olsem wanem?