?I Gat Wan Man We i Wokem Samting Ya?

Glu Blong Wom Blong Solwota

● Taem wan man i brekem wan bun long bodi blong hem, samtaem ol dokta oli yusum ol pin, ol aean, mo ol skru, blong holemtaet bun ya blong i save joen bakegen. Be i hadwok long dokta blong yusum ol pin mo aean mo skru ya blong joenem ol smosmol bun we oli brok. Taswe, longtaem finis, ol man oli stap traem wokem wan glu we i save joenemgud ol bun bakegen. Be i no isi blong wokem wan glu we i save wok gud insaed long bodi, from we glu i no save kam drae mo strong long ples we i wetwet oltaem. Ale, i no longtaem i pas, oli faenem wan gudfala samting long wan wom we i stap mekem haos blong hem long sanbij aninit long solwota (wom ya long Inglis oli kolem se sandcastle worm).

Tingbaot: Wom blong solwota i stap yusum sanbij mo ol smosmol pis sel blong wokem haos blong hem. Hem i stap yusum wan glu blong joenem ol smosmol pis ya wanples. Glu ya i kamaot long wan smol paos insaed long jes blong wom, mo hem i moa gud i bitim ol glu we ol man oli stap yusum naoia. I gat sam spesel protin oli joen blong mekem glu blong wom ya. Ol man oli luk we taem ol protin ya oli joen wanples, oli mekem se glu ya i save kam strong kwiktaem nomo nating se i stap long wota. Ol man oli sapraes long wok blong smol wom ya. !Oli talem se hem i moa gud i bitim man we i savegud wok blong joenem ol brikis blong haos! Russell Stewart we i wok long Yunivesiti blong Utah, i talem se smol wom ya i winim finis “ol bigfala problem we i nidim spesel glu blong winim.”

Taem ol man oli kasem save long saed blong glu blong wom ya, oli mekem wan glu we i klosap sem mak be i strong moa i winim glu blong wom blong solwota. Be ol dokta oli no yusum glu ya yet. Oli stap wok yet long hem, from we oli wantem faenem wan rod blong mekem we glu ya i save ronaot hem wan afta we bun i kam strong bakegen. Sipos oli winim, bambae oli save yusum glu ya, mo samting ya bambae i givhan bigwan long wok blong olgeta.

?Wanem tingting blong yu? Nambawan glu ya we wan smol wom blong solwota i save mekem, ?yu ting se hem wan nomo i faenem rod blong wokem glu ya, no yu ting se i gat wan Man we i wokem wom ya olsem?

[Tok blong pija long pej 30]

Ol man oli wantem faenem wan narafala rod we i moa gud i bitim ol pin, aean, mo skru blong joenem bakegen ol bun we oli brok

[Foto Credit Line long pej 30]

Sandcastle worm: © Peter J. Bryant, University of California, Irvine