Miusik i wan nambawan presen we Jehova i givim. Miusik i gat paoa long tingting blong yumi, i save mekem yumi hapi o sad, mo i givim paoa blong wok. Hemia i tru tumas long saed blong ol original singsing blong yumi. Antap long ol samting ya, ol singsing ya oli save pulum yumi i kam klosap moa long Jehova.

 !Stat long 2014, i gat bitim 70 niufala original singsing, mo naoia wan long ol singsing ya o maet moa, i kamaot long bitim 500 lanwis! Be maet yu wantem save se: ‘?Hu i wokem ol singsing ya, mo oli wokem olsem wanem?’

 Wan tim blong ol brata mo sista we oli wok long Odio/Video Sevis, i wokem ol singsing ya. Tim ya i wok aninit long Tijing Komiti blong Hed Kampani. Long tim ya, i gat 13 brata mo sista we oli raetem ol singsing, oli mekem miusik, program, mo ol narafala wok tu we i joen wetem ol singsing ya. Mo tu, Tijing Komiti i agri se sam volontia long ol nara ples long wol oli save givhan long wok ya, olsem rerem miusik, plei instramen, mo singsing. Ol brata mo sista ya oli gat tingting daon, taswe oli no wantem se ol narafala oli leftemap olgeta from wok ya we oli mekem.

 ?Olsem wanem oli wokem wan original singsing? Fastaem, Tijing Komiti i mekem desisen long ol vas we singsing bambae i kamaot long hem, mo filing we singsing i mas givim. Nao miusik tim i makemaot hu bambae i raetem miusik ya mo ol tok blong hem. Oli mekem wan rikoding blong traem fastaem. Nao Tijing Komiti i lesin long rikoding ya mo i givim sam moa advaes. Afta, miusik tim i jenisim sam samting long singsing ya, mo i rikodem bakegen laswan. Oli rikodem ol singsing ya long ol defdefren ples, sam long ol branj ofis, mo sam long haos blong ol brata mo sista we oli gat ol stret samting blong rikodem.

 Blong wokem mo rikodem ol original singsing, ol brata oli yusum ol defren kaen program blong kompiuta. Mo tu, oli yusum ol instramen, ol masin blong miksim mo mekem i laod, ol spika mo maekrofon. Praes blong ol maekrofon wanwan i defdefren, i save stat long 11,000 vatu i go kasem bitim 110,000 vatu. Long 2020, mifala i spenem bitim 12,900,000 vatu long ol samting we mifala i nidim blong rikodem miusik.

 ?Olsem wanem mifala i traehad blong no westem mane? Mifala i no gat wan bigfala tim blong miusik long Betel, be mifala i yusum plante volontia afsaed long Betel. Mo tu, plante taem mifala i no singaot ol man oli kam wanples blong plei miusik, be ol brata oli yusum ol kompiuta program blong mekem saon blong ol instramen taem oli rikodem singsing.

 Ol brata mo sista oli laekem blong lesin long ol original singsing. Tara blong Jemani, i talem se: “Taem mi wari, ol singsing ya oli halpem mi blong rilaks. Mo taem mi harem olgeta long prapa lanwis blong mi, mi harem olsem se Jehova i stap hagem mi.” Wan brata long Kasakstan we nem blong hem Dimitri, i talem se: “Mi laekem blong lesin long ol singsing, we mi no nid blong wari se maet ol toktok blong olgeta i agensem samting we Baebol i talem. Mo tu, ol singsing ya oli halpem mi blong putum tingting blong mi i stap strong long Jehova oltaem.”

 Delia blong Saot Afrika, i tokbaot ol original singsing, i se: “Ol singsing ya oli mekem bilif blong mi i strong. Taem mi harem nogud o mi kasem wan trabol, oltaem mi gat wan singsing we i stret long situesen blong mi. !Plante taem, tiun blong singsing nomo i jenisim filing blong mi!”

 Sam brata mo sista oli laekem moa ol original singsing i bitim ol nara singsing. Lerato, we i blong Saot Afrika, i talem se: “Ol singsing olsem ‘Klosap Bambae i Kamtru’ mo ‘Long Wan Niufala Wol,’ oli givhan long mi blong tingbaot taem we bambae mi welkamem bak gudfala mama blong mi. Evri taem mi lesin long ol singsing ya, mi pijarem hem we i stap ron i kam blong hagem mi.”

 Wan original singsing i givhan bigwan long wan gel long Sri Lanka. Hem i talem se: “Sayens tija blong mi i tok strong long mi long fored blong klas, from we mi wan Witnes blong Jehova. Mi mi fraet mo mi no save wanem blong talem. Taem mi kambak long haos, mama blong mi i talem long mi blong lesin long singsing ya ‘Study Makes You Strong.’ Singsing ya i soemaot long mi se mi mas mekem risej mo rerem wan ansa. Ale, long nekis dei, mi toktok wetem tija blong mi. Hem i lesin, mo i talem se naoia hem i kasem save moa long ol Witnes blong Jehova. Tangkiu long oganaesesen blong Jehova, from we i givim ol gudfala singsing we oli leftemap tingting blong yumi.”

 ?Olsem wanem mifala i kasem mane blong wokem ol singsing ya? Hemia ol presen mane we i sapotem wok long fulwol, mo mifala i kasem long ol rod we donate.isa4310.com i tokbaot. Tangkiu tumas from ol presen mane we yufala i givim long gladhat blong yufala.