Yu traem tingbaot stori ya: David i stap ron long trak, nao hem i go long wan ples we hem i no save nating. Ol saen long rod mo ol haos long saed blong rod, oli soemaot se hem i stap long wan rong ples. David i luksave se hem i mestem rod. Maet from we hem i bin tanem i go long rong rod taem hem i stap ron i kam.

Sipos yu yu David, ?bambae yu mekem wanem?

I gat tri samting we yu save mekem:

1. Askem help long ol man.

2. Jekem wan map.

3. Gohed blong ron long trak, mo hop se bambae yu faenem stret rod.

Blong talem stret, i no waes blong gohed blong ron long trak.

I moa gud blong jekem wan map, i bitim we yu askem help long ol man. From we map ya, bambae i lidim yu blong go long stret ples we yu wantem go long hem.

!Baebol i olsem wan map we i save givhan long yu!

Hem i beswan buk we i save:

• lidimgud yu taem yu kasem problem

• givhan long yu blong jenisim ol fasin blong yu mo kam wan gudfala man

• soemaot olsem wanem yu save gat wan laef we i beswan

Taem yumi jes lanem blong toktok yumi askem plante kwestin.

• ?From wanem skae i blu?

• ?From wanem ol sta oli saen?

Biaen yumi stat blong askem kwestin long saed blong ol trabol

• ?From wanem i gat trabol?

• ?From wanem ol man oli ded?

?Olsem wanem sipos ansa blong ol kwestin ya, oli stap long Baebol longtaem finis?

Plante man oli talem se Baebol i fulap long ol kastom stori, we oli blong bifo nomo. Be hemia tingting blong man nomo, Baebol i no olsem. Ol man oli gat wan tingting we i defren long wanem we Baebol i talem.

Yu traem tingbaot. Plante man oli ting se Baebol i talem se God nao i stap rulum wol ya. ?Yu ting se i tru? Yu traem tingbaot ol trabol long wol. Ol man oli harem nogud mo oli safa, oli sik mo oli ded, oli kam pua mo i gat ol disasta. ?Yu ting se wan God we i gat lav i save mekem ol samting ya sipos hem i rulum wol?

?Yu yu wantem save ansa blong hem? Maet bambae yu sapraes blong luk ansa we Baebol i talem.

Ating yu makem se ol advaes we oli stap long buklet ya, oli stanap long Baebol nomo. Ol Witnes blong Jehova oli bilif se Baebol i save givhan long laef blong ol man. Hemia from we ol tok blong hem, “oli kamaot long God fastaem, Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok.” (2 Timoti 3:16, 17) I stap long yu nomo blong ridim buk ya, we oli raetem bifo finis, be i stret yet long yumi tede.