HAF 8
?God i Letem Fasin Nogud i Stap Blong Wanem?
1. ?Fasin nogud i stat olsem wanem?
God i letem man i rul gogo i kam klia se man i no save stretem ol trabol long wol
Fasin nogud i stat long wol ya taem Setan i giaman long Adam mo Iv. Taem God i mekem olgeta samting, Setan i wan gudfala enjel nomo. Be hem i no wantem “stap wetem olgeta we oli tok tru.” (Jon 8:44) Setan i wokem tingting ya we hem i wantem se ol narafala oli mekem wosip long hem. Be hem i no gat raet blong kasem wosip, God nomo i gat raet long samting ya. Ale Setan i giaman long fas woman ya, Iv, mo i pulum hem blong brekem loa blong God. Adam i folem woman blong hem, nao hem tu i brekem loa blong God. From samting ya, tufala i harem nogud mo tufala i ded.—Ridim Jenesis 3:1-6, 19.
Taem Setan i pulum Iv blong i brekem loa blong God, hem i girap agensem God. Hem i no wantem we God i rul long ol man. Bighaf blong ol man long wol oli joenem Setan, oli no wantem we God i rul long olgeta. Long fasin ya, Setan i kam “masta blong wol ya.”—Ridim Jon 14:30; 1 Jon 5:19.
2. ?I gat wan samting i rong long ol man mo ol enjel we God i mekem?
Taem God i mekem man mo ol enjel, oli stret gud olgeta. Taswe, oli save obei gud long God. Oli no save mestem. (Dutronome 32:4, 5) God i letem yumi blong yumi jusum rod we yumi wantem folem. Yumi save mekem ol fasin we oli gud no ol fasin we oli nogud. Sipos yumi jusum gudfala rod, yumi soemaot se yumi lavem God.—Ridim Jemes 1:13-15; 1 Jon 5:3.
3. ?God i letem ol man oli harem nogud blong wanem?
Jehova i letem ol man we oli agensem rul blong hem, oli stap kasem naoia. ?Blong wanem? Blong soemaot se rul blong ol man i no save stretem ol trabol, be rul blong hem nomo i save mekem i gud long ol man. (Prija 7:29; 8:9) I stat long fas man kam kasem naoia, sikis taosen yia i pas finis. Mo i klia nomo se man i no naf blong finisim ol faet long wol, mo fasin blong stil mo kilim man, mo fasin blong mekem i no stret long narafala, mo sik.—Ridim Jeremaea 10:23; Eksodas 9:16.
Taem man i rul, hem i stap spolem ol man nomo. Be taem God i rul, hem i mekem i gud long ol man we oli obei long hem. (Aesea 48:17, 18) I no longtaem, bambae Jehova i finisim ol gavman blong man. Ol man we oli wantem se God i rul long olgeta, olgeta ya nomo bambae oli stap long wol.—Aesea 11:9.—Ridim Daniel 2:44.
Wajem video ya ?From Wanem God i Letem Ol Man Oli Safa?
4. ?From we God i letem taem i pas, yumi gat janis blong mekem wanem?
Setan i talem se ol man oli obei long Jehova nomo from we hem i blesem olgeta. ?Olsem wanem? ?Yu yu wantem soemaot se tok ya blong Setan i giaman? !Yu save soemaot! God i letem taem i pas blong yumi gat janis blong soemaot se yumi wantem stap aninit long rul blong hem no rul blong man. Yumi soemaot samting ya long ol jus we yumi mekem long laef blong yumi.—Ridim Job 1:8-12; Ol Proveb 27:11.
5. ?Sipos yumi wantem we God i rul long yumi, yumi mas mekem wanem?
Rod we yumi jusum i soemaot se yumi wantem we God i rul long yumi, no nogat
Yumi soemaot se yumi wantem we God i rul long yumi, taem yumi stadi Baebol mo yumi wosipim God folem samting we Baebol i talem. (Jon 4:23) Yumi soemaot se yumi no wantem we Setan i rul long yumi, taem yumi stap longwe long politik mo ol faet blong wol, olsem we Jisas i mekem.—Ridim Jon 17:14.
Setan i yusum paoa blong hem blong leftemap ol rabis fasin we oli spolem yumi. Taem yumi sakemaot ol fasin ya, maet sam fren mo famle oli jikim yumi mo oli agensem yumi. (1 Pita 4:3, 4) Yumi mas jus. ?Bambae yumi joen wetem ol man we oli lavem God? ?Bambae yumi obei long ol loa blong God we oli waes mo oli soemaot se hem i lavem yumi? Sipos yumi mekem olsem, bambae yumi pruvum se Setan i giaman taem hem i talem se man we i kasem trabol, bambae i no moa obei long God.—Ridim 1 Korin 6:9, 10; 15:33.
God i lavem ol man, taswe hem i mas finisim ol fasin nogud mo ol trabol we i mekem man i harem nogud. Olgeta we oli soemaot se oli bilif long promes ya, bambae oli kasem laef we i no save finis long wol ya.—Ridim Jon 3:16.
