Mata we i wan Witnes Blong Jehova long Guatemala, i stap lanem lanwis Kekji blong i save talemaot mesej blong Baebol long ol man we oli toktok lanwis ya. Wan dei, hem i luk wan man i stap aot long hospital. Taem Mata i luk ol klos blong man ya, hem i stap tingting se maet hem i blong wan vilej antap long ol bigbigfala hil, we ol man long hem oli toktok lanwis Kekji. Ples ya, ol Witnes Blong Jehova oli prij wanwan taem nomo long hem. Mata i save sam toktok nomo long lanwis Kekji, be hem i go klosap long man ya, mo i toktok long hem long lanwis ya.

 Mata i askem long hem sipos hem i wantem stadi Baebol. Man ya i glad mo i akseptem blong stadi, be hem i talem se hem i no gat mane blong pem hem. Ale Mata i eksplenem long hem se ol Witnes Blong Jehova oli stap stadi fri nomo wetem ol man. Mata i talem tu se hem i save stadi wetem hem long fon, mo ful famle blong hem tu oli save joen long stadi. Ale man ya i agri. Man ya i save lanwis Spanis mo i save ridim ol buk tu long lanwis ya, ale Mata i givim long hem wan Baebol ya New World Translation of the Holy Scriptures long lanwis Spanis. Mo tu, hem i givim wan buk blong stadi, hemia ?Wanem Samting We Baebol i Rili Tijim? long lanwis Kekji. Long nekis wik blong hem, man ya wetem waef blong hem, mo tufala pikinini blong tufala, oli stat blong stadi wetem Mata long fon. Oli stadi tu taem long wan wik. Mata i talem se: “From we mi mi no toktok gud lanwis Kekji, mifala i stadi long lanwis Spanis, mo man ya i transletem ol samting we mifala i tokbaot i go long lanwis Kekji, blong waef blong hem i kasemsave. Ol pikinini oli kasemsave lanwis Spanis.”

 Man ya i wan pasta long jos blong hem. Nao hem i stat blong tijim ol man long jos ya long ol samting we hem i lanem long Baebol stadi blong hem. Ol man ya oli laekem ol samting we oli harem, ale oli askem long hem se weples hem i lanem ol niufala tijing ya. Taem hem i tokbaot Baebol stadi we hem i stap gotru long hem, olgeta tu, wan afta long narawan, oli stat blong joen long stadi. I no longtaem afta, samwe 15 man mo woman oli joen evri wik blong stadi wetem Mata long fon. Taem i pas, ale oli putum wan maekrofon klosap long fon, blong evriwan oli save harem.

 Taem Mata i tokbaot Baebol stadi ya long ol elda blong kongregesen blong hem, wan long olgeta i go visitim vilej we ol studen ya oli stap long hem. Biaen hem i invaetem olgeta blong oli go lesin long wan pablik tok we eria elda a bambae i givim long wan narafala vilej. Blong kasem vilej ya, oli mas ron wan aoa long trak, biaen oli mas wokbaot tu aoa bakegen. Ol studen ya oli agri blong go, mo 17 long olgeta oli joen long miting ya.

 Sam wik afta, eria elda mo sam narafala Witnes oli go spenem fo dei wetem ol studen ya. Long ol moning, oli wajem ol video long lanwis Kekji we i stap long jw.org, mo oli stadi long buklet ya ?Hu i Stap Mekem Samting We Jehova i Wantem? Mo long ol aftenun, oli wajem sam program long JW Brodkasting. Mo tu, eria elda i arenjem blong evri studen wanwan i gat prapa tija blong hem.

 Long ol fo dei ya, ol Witnes oli go prij long ol vilej raonabaot we ol man long hem oli toktok lanwis Kekji, mo oli invaetem olgeta blong oli kam long wan spesel miting. Long miting ya, ol brata oli invaetem ol 47 man we oli stap, blong oli gat prapa Baebol stadi blong olgeta. Leven famle oli agri blong stadi.

 Sam manis afta, ol elda oli arenjem blong i gat wan miting evri wiken long vilej blong ol faswan studen we oli stadi wetem Mata long fon. Tede, samwe 40 long olgeta oli stap joen oltaem long ol miting. Mo taem ol brata oli mekem Memoriol blong ded blong Jisas long ples ya, oli glad tumas blong luk se 91 man oli kam.

 Taem Mata i tingbaot olsem wanem ekspiriens ya i stat mo olsem wanem i kam bigwan, hem i talem se: “Mi mi glad tumas mo mi talem tangkiu long Jehova. Samtaem mi harem se mi no naf blong mekem plante wok. Be God i yusum yumi olsem ol tul long han blong hem. Mo hem i save samting we i stap long hat blong ol man long ol vilej ya, taswe hem i pulum olgeta oli kam long ol man blong hem. Yes, Jehova i lavem olgeta.”