Bushe tamulesumina ukuti abekashi ba mu calo nga ba mafisakanwa ninshi na balashi ba mu buteko nabo kuti baba na mafisakanwa? Ici cilepilibula ukuti ubuteko umushingaba amafisakanwa tabufwile ukulatungululwa na bantunse. Baibolo yalilanda pali ubu ubuteko ukuti, Bufumu bwa kwa Lesa, ubuteko ubo Yesu aebele abasambi bakwe ukulapepela.—Mateo 6:9, 10.

Ubufumu bwa kwa Lesa buteko bwa cine cine ubwaba ku muulu. Ubu Bufumu, bukafumyapo amabuteko ya bantunse yonse kabili e bukalateka. (Amalumbo 2:8, 9; Ukusokolola 16:14; 19:19-21) Pa fintu fyabipa ifyo Ubufumu bukafumya pano calo, paba na mafisakanwa aya mu mabuteko. Natulande pa fintu 6 ifingalenga twashininkisha ukuti Ubufumu bwa kwa Lesa bukafumyapo amafisakanwa.

UBWAFYA: Indalama isho amabuteko yabomfya ilingi line shifuma ku misonko iyo abekala calo balipila. Lelo abalashi ba mu buteko bamo baleba ishi indalama, bambi nabo balabapeela amafisakanwa pa kuti babacefesheko imisonko nelyo indalama shimbi isho balingile ukulipila ku buteko. Ici nalimo kuti calenga ubuteko ukukusha imisonko pa kuti bulekumanisha indalama bubomfya, lelo ukucita ifi na ko kulenga aba mu buteko ukulaiba indalama ishingi. Mu calo nga muli amafisakanwa, abaculilamo sana bantu bakaele.

 ICINGAPWISHA UBWAFYA: Kateeka wa Bufumu bwa kwa Lesa balimupeela amaka ya kuteeka kuli Lesa wa maka yonse, Yehova. * (Ukusokolola 11:15) Ubu ubuteko twabwakalelipilisha abantu imisonko ilyo bukalateka. Lesa wa “maka ayengi” kabili ni kapekape, kanshi akalapeela abantu bonse ifyo bakabila mu Bufumu bwakwe.—Esaya 40:26; Amalumbo 145:16.

UBWAFYA: Ba Susan Rose-Ackerman, abo tulandilepo mu cipande cifumineko batile, amafisakanwa kuti yapwa nga ca kuti “abalashi ba buteko e babalilapo ukuleka amafisakanwa.” Abantu balasuula ubuteko nga ca kuti bulelesha fye bakapokola, na balipilisha imisonko ukulapoka amafisakanwa, lelo buletekelesha abalashi ba buteko abatemwa amafisakanwa. Nangu ni kateka uwa cishinka sana kuti aba uwa mafisakanwa pantu muntunse, nga filya fine Baibolo yalanda ukutila, “pano isonde tapaba umuntu umulungami uucita icisuma.”—Lukala Milandu 7:20.

ICINGAPWISHA UBWAFYA: Yesu Kristu uo Lesa asala ukuba Kateka wa Bufumu, taba nga bantunse pantu takuli nangu umo uwingamulenga acita icabipa. Ilyo ali pano calo alikeene “amabufumu yonse aya pano calo no bucindami bwa yako” ayo Satana, kateka wa cino calo amwebele ukuti alamupeela nga amupepako fye panono. (Mateo 4:8-10; Yohane 14:30) Ilyo Yesu bamupoopele pa cimuti, atwalilile fye ukuba uwa cishinka kuli Lesa, ica kuti alikeene no kunwa umwangashi uwakantuka, uwali no kucefyako ubukali e lyo no kufulunganya ukutontonkanya kwakwe. (Mateo 27:34) Apo Lesa alibuusha Yesu ku bafwa, bushininkisho bwa kutila alilinga ukuba Kateka wa Bufumu bwa kwa Lesa.—Abena Filipi 2:8-11.

UBWAFYA: Mu fyalo ifingi balasala bakateka na ba mu buteko bamo, ne ci cilenga balefumyapo aba mu buteko aba mafisakanwa. Lelo icicitika ca kuti pa nshita ya kampeni, e lyo na pa kusala pene, palaba ubufufuntungu nangu fye ni mu fyalo ifinkankaala. Nga kuli kampeni, abakankaala balabomfya amafisakanwa pa kuti abantu basale umuntu wabo.

Ba John Paul Stevens, bakapingula wa mu cilye cikalamba mu U.S.A balembele ukuti, abakwata ififulo ifikalamba mu buteko nga bamafisakanwa, “cilenga abantu baletwishika ubuteko no kukaanabucetekela.” E mulandu wine abantu abengi balandila ukuti aba mu mabuteko e bapoka sana amafisakanwa.

ICINGAPWISHA UBWAFYA: Mu Bufumu bwa kwa Lesa tamwakabe ukusala bakateka na ba mu buteko, kabili Ubufumu bukateka umuyayaya. (Daniele 7:13, 14) Lesa umwine e wasala kateka wa ubu Bufumu, kanshi takuli uwingamufumyapo. Apo ubu  Bufumu bwalikwata amaka, twalicetekela ukuti fyonse ifyo bukacita fikafwa abantu.

UBWAFYA: Nalimo kuti mwatontonkanya ukuti ukupanga amafunde na yambi e kwingapwisha amafisakanwa. Lelo abasambilila sana basanga ukuti ukufusha amafunde ilingi line e kulenga ukuti abantu balepoka sana amafisakanwa. Cimbi ca kutila, ico abantu bapangila amafunde, kufwaya ukucefyako amafisakanwa, kabili pa kupanga aya mafunde balapoosapo indalama ishingi, lelo amafisakanwa tayapwa.

ICINGAPWISHA UBWAFYA: Amafunde ya Bufumu bwa kwa Lesa yasuma nga nshi pantu yena yalicila pa mafunde ya bantunse. Amafunde ya bantunse yalifulisha, lelo Yesu ena alandile fye ukuti: “Fyonse ifyo mufwaya abantu ukuti balemucitila, e fyo na imwe mulebacitila.” (Mateo 7:12) Ico maka maka amafunde ya Bufumu yabelako kwafwa umutima wa muntu mu fyo aba ne fyo acita. Yesu na kabili atile, “Uletemwa umunobe nge fyo waitemwa we mwine.” (Mateo 22:39) Lesa alamona ifyaba mu mitima yesu, kanshi kuti atwafwa ukulakonka amafunde yakwe.—1 Samwele 16:7.

UBWAFYA: Icalenga abantu ukuba sana na mafisakanwa kuitemwa, kabili ifi fine e fyaba na bakwata ififulo ifikalamba mu buteko. Mu cipande cifumineko, twacilanda pa cikuulwa icabongolweke mu musumba wa Seoul, pa mulandu wa kuti abo bapeele umulimo wa kukuula ici cikuulwa balipeele aba mu buteko amafisakanwa, pa kuti babomfye indalama ishinono pa ku cikuula.

Kanshi amafisakanwa kuti yapwa fye nga ca kuti abantu basambilila ifya kucita pa kuti baleke ukuitemwa no bufunushi. Lelo amabuteko ya bantunse tayasambilisha abantu ukuleka iyi mibele.

ICINGAPWISHA UBWAFYA: Ubufumu bwa kwa Lesa bukafumyapo icalenga abantu baba na mafisakanwa, bulasambiilsha abantu ifya kucita pa kuti beba  na bukaitemwe. * Ifyo bubasambilisha filenga ‘baleka ukutontonkanya ifya kale no kulatontonkanya ifipya.’ (Abena Efese 4:23) Balasambilila ifya kuba no kutemwa, no kuleka bukaitemwe.—Abena Filipi 2:4; 1 Timote 6:6.

UBWAFYA: Abantu bamo nangu bengasambilila shani imibele iisuma, te kuti baleke ubufufuntungu na mafisakanwa. Abasambilila sana balanda ukutila, ici cine e calenga na mabuteko ya bantunse ukukanapwisha amafisakanwa. Lelo isubilo aba mu buteko bakwata lya kutila kuti bacefyako amafisakanwa.

ICINGAPWISHA UBWAFYA: Akabungwe kaba United Nations akalolekesha pa kucefyako amafisakanwa kalandile ukuti, amabuteko kuti yacefyako amafisakanwa nga ca kuti balesambilisha abantu “ukuba aba cishinka no kulamona ukuti nabo bene balikwata insambu sha kupwisha amafisakanwa.” Ifyo akabungwe kalandile fyaliba fye bwino, lelo Ubufumu bwa kwa Lesa bwena tabupelela fye pa kusambilisha abantu ukuba ne cishinka, pantu ilyo umuntu talaba umwikashi wa Bufumu, afwile ukuba umufumacumi. Baibolo yatila “abafunushi” na “ba bufi” tabakapyane Ubufumu bwa kwa Lesa.—1 Abena Korinti 6:9-11; Ukusokolola 21:8.

Abantu kuti baleka ubufunushi no bufi, kabili ifi fine e fyo Abena Kristu bakubalilapo bacitile. Ku ca kumwenako, ilyo umusambi Simone alefwaya ukupeela abatumwa indalama pa kuti abatumwa bamupepeleko na o apokelele umupashi wa mushilo, balikeene ukupoka amafisakanwa. Bamwebele abati: “Ulapile pali ubu ububi bobe.” Ilyo Simone amwene ukuti ali no lunkumbwa, alombele abatumwa ukuti bamupepeleko.—Imilimo 8:18-24.

Na imwe bene kuti mwaba abekashi ba Bufumu bwa kwa Lesa uko kwine mwikala. (Imilimo 10:34, 35) Ubufumu bwa kwa Lesa bulasambilisha abantu isonde lyonse pa fyo mwingacita pa kuti mube abekashi ba ubu Bufumu. Inte sha kwa Yehova kuti bamulanga ifyo tusambilila Baibolo na bantu cila mulungu nangu fye ni mu mamineti 10, e lyo tatulipilisha. Kuti mwasambilila pa “mbila nsuma iya bufumu bwa kwa Lesa,” na pa fyo Ubufumu bukafumyapo amafisakanwa ayaba mu mabuteko, e lyo na fimbipo. (Luka 4:43) Kuti mwalanda ne Nte sha kwa Yehova uko kwine mwikala pa kuti mulesambilila nabo Baibolo, nelyo kuti mwaya pali Webu saiti yesu iya jw.org. apo mwingabeba ukuti mulefwaya ukulasambilila Baibolo.