Bali-ipeele Abene mu Kuitemenwa Ukubombela mu Ecuador

MUNYINEFWE uwacaice umo mu Italy balemupatikisha ukucita ifyo ashalefwaya. Ilyo apwishishe isukulu alikwete amatoni aya pa muulu sana ukucila abo alesambilila nabo, e calengele ukuti balupwa wakwe na bakafundisha balemukoselesha ukutampa amasambililo ya pa muulu. Lelo mu myaka ya ku numa, Bruno alilaile Yehova ukuti akalabika umulimo wakwe pa ntanshi. Finshi ifyo alefwaya ukucita? Atile: “Nalipepele kuli Yehova ukuti nkafikilisha ifyo nalaile. Lelo ukulanda fye cishinka, nalipepele no kuti nalefwaya ukukwata ifingi ifya kucita mu mulimo wakwe.”

 Papitile fye imyaka iinono, Bruno aile ku calo ca Ecuador ku South America. Atile: “Yehova alyaswike ipepo lyandi ukucila na pa fyo nale-enekela.” Ilyo afikile mu Ecuador, alitemenwe nga nshi pa kumona ukuti mwali abacaice na bambi abafumine ku fyalo fimbi abalefwaya ukubombela sana Yehova.

ABACAICE ‘ABESHA YEHOVA’

Nga filya Bruno acitile, abacaice abengi icalo fye conse balasumina ubwite bwa kwa Yehova ubwa kuti: “Shi munjeshe, . . . mumone nga nshakamwiswile ifipunda fya mu muulu no kumupongolwela amapaalo.” (Mal. 3:10) Ukutemwa Lesa kwalengele ukuti basalepo ‘ukwesha Yehova’ ilyo baipeeleshe ukubomfya inshita na maka yabo, e lyo ne fyuma fyabo ku kutwala pa ntanshi umulimo wa kwa Lesa mu fyalo umo bakabila ba Mbila Nsuma bacepa.

Bamunyinefwe abaipeelesha nga bafika fye uko baleya mu kubombela, balaimwena abene ukuti, “umulimo wa kulobolola ukalamba, lelo ababomfi bena nabacepa.” (Mat. 9:37) Ku ca kumwenako, ba Jaqueline abafuma ku Germany balembeele kwi ofeshi lya Nte sha kwa Yehova ku Ecuador, abati: “Nimomba mu Ecuador ukucila pa imyaka ibili, nomba ninkwata amasambililo 13 e lyo pali aba, 4 balesa lyonse mu kulongana. Ala kwena caliwama nga nshi!” Ba Chantal abafuma ku Canada nabo batile: “Mu 2008 naile mu kubombela ku Ecuador ku ncende iyali mupepi na bemba e lyo kwali fye icilonganino cimo. Nomba pali ino nshita kwaba ifilonganino  fitatu na bapainiya 30. Ala cilawama nga nshi ukumona uko abapya balelunduluka!” Na kabili batile: “Ni nomba line fye nakukiile ku musumba uwaba mu mpili sha Andes Mountains ishalepa amamita 2,743. Muli uyu musumba, mwaba abantu 75,000, nomba mwaba fye icilonganino cimo. Ala kusuma sana ukubombelako pantu abantu balomfwa sana nga muleshimikila! Ndomfwa bwino sana ukushimikila muli iyi ncende.”

AMAFYA BAKWATA

Ababombela mu fyalo fimbi balakwata amafya yamo. Na kuba abacaice bamo balakwata amafya nangu fye ilyo bashilaya. Kayla uwafuma ku America atile: “Ifyo bamunyinefwe balelanda ilyo baumfwile ukuti ndeya mu kubombela ku calo cimbi, fyalemfupuula. Tabaishibe ico nalefwaila ukuya mu kubombela bupainiya ku calo cimbi. Limo calelenga ndeyipusha nati, ‘ Bushe ifi ndefwaya ukuya mu kubombela ku calo cimbi cili fye bwino?’” Lelo nangu cali ifi, Kayla alisalilepo ukuya. Atile: “Ukupepa sana kuli Yehova e lyo no kulanshanya na bamunyinefwe abafikapo fyalingafwile ukumona ukuti Yehova alapaala abaipeelesha.”

Abengi cilabafya ukusambilila ululimi ulupya. Siobhan, uwafuma ku Ireland, atile: “Calengafya sana ukulanda ululimi lumbi. Lelo nalisambilile ukuti ningile ukutekanya ilyo ndesambilila ululimi lumbi e lyo naleiseka nga nalufyanya.” Anna uwafuma ku Estonia na o atile: “Ukusambilila iciSpanish kwalyafishepo ukucila ukushipikisha ku kasuba, ulukungu no kusamba amenshi ayatalala. Limo limo nalemona kwati te kuti njishibe iciSpanish. Lelo nalebika fye amano ku fyo nalelunduluka ukucila ukubika amano ku fyo nalelufyanya.”

E lyo ubwafya na bumbi bwa kufuluka ku ng’anda. Jonathan uwafuma ku America atile: “Ilyo nafikile fye nalifuupwilwe pantu natendeke ukufuluka abanandi na balupwa bandi. Nomba ukulasambilila Baibolo no kushimikila fyalengele ndeke ukubafuluka. Tapapitile ne nshita nali ne nsansa na kabili pantu nalebomba bwino umulimo wa kushimikila e lyo nalipangile ifibusa na fimbi mu cilonganino.”

Ubwafya na bumbi bwali bwa mikalile. Ilingi line takuba ukwikala nge fyo waleikala ku mwenu. Beau uwafuma ku Canada atile: “Nga ca kuti uli mu calo  cenu, takuba no kumona ukuti ukukwata amalaiti na menshi mu ng’anda fyalicindama.” Nomba kuno tatwakwata amalaiti na menshi mu ng’anda. Abantu bapiina, imyendele yalyafya, kabili abantu abengi tabasambilila. Ines uwafuma ku Austria, ena alashipikisha pantu abika amano ku fintu ifisuma ifyo abantu ba ku Ecuador bacita. Atile, “abantu ni bakapekape, balinakilila, balafwa abantu kabili bali-iceefya. Icacilapo ukuwama ca kuti abantu balitemwa ukusambilila pali Lesa.”

“AMAPAALO MPAKA KUKABULE INCENDE APA KUBIKA AMAPAALO YAMBI”

Nangu ca kuti abacaice bonse ababombela mu Ecuador bali-ipeelesha, basanga ukuti Yehova alabapeela ‘ukucila na pa fyo bengalomba nangu pa fyo bengatontonkanya.’ (Efes. 3:20) Ca cine, balamona ukuti balapokelela “amapaalo mpaka kukabule incende apa kubika amapaalo yambi.” (Mal. 3:10) Umfweni ifyo balanda pa mulimo wa kushimikila mu Ecuador:

Bruno: “Naishile mu kubombela kuno ku Ecuador mu citungu ca Amazon. Lyena, nalyafwilisheko ukukuula umusambo mu Ecuador kabili pali ino nshita, e po mombela. Ilyo nali ku Italy, nalisalilepo ukubika Yehova pa ntanshi kabili alengafwa ukubomba imilimo iyalekanalekana ukulingana ne fyo nalefwaya.”

Beau: “Nalipalama sana kuli Yehova pantu kuno ku Ecuador ndabomba sana umulimo wa kwa Lesa. Pa nshita imo ine, nalikwata ne shuko lya kutandala ku fifulo ifisuma kabili ifi fine e fyo nalefwaisha.”

Anna: “Nshaishibe ukuti nkashi umushimbe kuti akwata ishuko lya kubomba kwati ni mishonari. Nomba ninshininkisha. Ndatasha Yehova pa fyo ampaala pantu ndomfwa bwino ukusambilisha abantu no kukuula amayanda ya Bufumu e lyo no kupanga ifibusa na fimbi.”

Elke: “Ilyo nali ku mwesu ku Austria, nalepepa sana kuli Yehova ukuti nkakwateko fye isambililo lya Baibolo limo. Nomba kuno nakwata amasambililo 15! Ndomfwa bwino ukumona uko abo ndesambilisha Baibolo balelunduluka.”

Joel: “Cilawama sana ukubombela Yehova mu cifulo ico tawaishiba pantu kuti wasambilila ifya kushintilila pali Yehova kabili cisuma sana no kumona ifyo akupaala nga ulebombesha! Umwaka naishile fye ukufuma ku America, bakasabankanya mu cifulo mombela bali 6 nomba baba 21. Abasangilwe ku Cibukisho bali 110.”

INGA IMWE?

Imwe bamunyinefwe abacaice, bushe pali ino nshita te kuti muyebombela uko bakabila ba Mbila Nsuma bacepa? Kwena, pa kuti mwingaya mu kubombela uko bakabila ba Mbila Nsuma bacepa mulingile ukuipekanya bwino. Nomba icikalamba pali fyonse, kutemwa sana Yehova na bantu e cingalenga umuntu ukuya mu kubombela uko bakabila ba Mbila Nsuma bacepa. Nga mwalitemwa sana Yehova na bantu e lyo nga namulinga, pepeni kuli Yehova no kumweba ukuti mulefwaya ukuya mu kubombela uko bakabila ba Mbila Nsuma bacepa. Lyena kuti mwaeba abafyashi benu na baeluda mu cilonganino pa fyo mulefwaya ukucita. Na imwe kuti mwamona ukutila kuti mwabombako umulimo ushaiwamina uwa kubombela uko bakabila ba Mbila Nsuma bacepa.

[Amashiwi pe bula 3]

“Ukupepa sana kuli Yehova e lyo no kulanshanya na bamunyinefwe abafikapo fyalingafwile ukumona ukuti Yehova alapaala abaipeelesha.”—Kayla uwafuma ku America

[Akabokoshi ne Cikope pe bula 6]

Ifya kui-ipekanya ukuya mu kubombela ku calo cimbi

• Mulingile ukulaisambilisha sana mwe bene

• Pitulukeni mu Ubutumikishi Bwesu Ubwa Bufumu, ubwa mu August 2011, pa mabula 4-6

• Landeniko na bamo ababombako mu fyalo fimbi

• Fwailisheni pa fyo abantu bekala muli ico calo ne fyo ico calo caba

• Sambilileniko panono ululimi lwa kuli ico calo

[Akabokoshi ne Cikope pe bula 6]

Bamo ababombelako mu fyalo fimbi balakwata indalama sha kwikalimo pantu . . .

• Balabombako incito pa myeshi inono cila mwaka mu calo mu mwabo

• Mu mayanda yabo ne fifulo fyabo ifya makwebo balashamo aba kusonkela

• Balabombako incito iya pa Intaneti

[Ifikope pe bula 4, 5]

1 Jaqueline uwafuma ku Germany

2 Bruno uwafuma ku Italy

3 Beau uwafuma ku Canada

4 Siobhan uwafuma ku Ireland

5 Joel uwafuma ku America

6 Jonathan uwafuma ku America

7 Anna uwafuma ku Estonia

8 Elke uwafuma ku Austria

9 Chantal uwafuma ku Canada

10 Ines uwafuma ku Austria