Tulasambilila Pali Lesa Kuli Bakasesema Bakwe
Kale Lesa alelanda na bantu ukubomfya bakasesema. Bushe ifyo Lesa aebele bakasesema kuti fyatwafwa ukwishiba ifyo tufwile ukulacita pa kuti aletupaala? Ee. Natulande pa fyo twingasambilila kuli bakasesema batatu.
ABRAHAMU
Lesa taba na kapatulula kabili alafwaya ukupaala abantu bonse.
Lesa alaile kasesema Abrahamu ukuti: “Muli iwe e mo indupwa shonse isha pe sonde shikaimwena ipaalo.”—Ukutendeka 12:3.
Finshi tusambililako? Lesa alitutemwa sana kabili alafwaya ukutupaala bonse, nampo nga tuli baume, tuli banakashi nelyo tuli bana, kulila fye tulemumfwila.
MOSE
Lesa wa luse kabili alapaala bonse abafwaya ukumwishiba.
Lesa wa Maka yonse alipeele Mose amaka ya kucita ifipesha amano. Na lyo line, Mose apepele ukuti: “Shi nengeni njishibe imibele yenu, ukuti imwishibe, pa kuti ntemwikwe kuli imwe.” (Ukufuma 33:13) Lesa alitemenwe ifyo Mose alombele kabili alimupeele amano no kumwafwa ukwishiba imibele yakwe. Ku ca kumwenako, Mose alisambilile ukuti Kabumba ni “Lesa wa luse kabili uwa mutembo.”—Ukufuma 34:6, 7.
Finshi tusambililako? Lesa alafwaya ukutupaala bonse nga tule-esha na maka ukumwishiba bwino nampo nga tuli baume, tuli banakashi nelyo tuli bana. Mu Malembo ya Mushilo alilanda ifyo afwaya tulemupepa ne fyo afwaisha ukutupaala.
YESU
Yesu ali ne cikuuku kabili aleundapa umusango onse uwa malwele
Kuti twaisaipakisha amapaalo umuyayaya nga tulesambilila pali Yesu na pa fyo alecita no kusambilisha.
Mu Malembo ya Mushilo mwaliba ifyebo ifingi pali Yesu na pa fyo alesambilisha. Lesa alipeele Yesu amaka ya kucita ifipesha mano ifingi, pamo nga ukushibula amenso ya mpofu, ukukomona amatwi ya bankomamatwi no kundapa abalemana. Na kabili alebuusha na bafwa. Ifyo Yesu alecita filalanga amapaalo Lesa akapeela abantu bonse ku ntanshi. Yesu alilandile na pa fyo tulingile ukucita pa kuti tukabe pa bantu abakapokelela aya amapaalo. Atile: “Pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.”—Yohane 17:3.
Yesu ali sana ne cikuuku. Abaume, abanakashi, abaice na bakalamba baleya kuli ena ilyo atile: ‘Sambilileni kuli ine, pantu nalifuuka kabili nali-icefya, e lyo mwalasanga ukutuusha.’ (Mateo 11:29) Yesu tali nga bantu abengi abaliko pali ilya nshita, pantu ena alicindike abanakashi kabili ali ne cikuuku kuli bena.
Finshi tusambililako? Yesu alitemenwe sana abantu kabili alitulangile ifyo tulingile ukulaikala na bantu.
YESU TE LESA
Amalembo ya Mushilo yalanda ukuti “kwaba fye Lesa umo” na Yesu Kristu inkombe ya kwa Lesa iyaicefya. (1 Abena Korinti 8:6) Yesu umwine alilandile ukwabula no kupita mu mbali ukuti Lesa mukalamba pali ena no kuti e wamutumine pa calo.—Yohane 11:41, 42; 14:28. *
^ para. 17 Nga mulefwaya ukwishibilapo na fimbi pali Yesu Kristu, belengeni icipandwa 8 na 9 muli broshuwa iitila Real Faith—Your Key to a Happy Life. Iyi broshuwa kuti mwaisanga pa www.isa4310.com.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Bushe Yesu ni Lesa Wa Maka Yonse?
Bushe Yesu alandilepo shani pa fyo alemona Lesa?
