Bushe Lesa ni nani ishina? Lesa umwine alanda ukuti: “Nine Yehova. Ilyo e shina lyandi.” (Esaya 42:8) Ishina lya kwa Lesa balililemba mu Baibolo nalimo imiku 7,000. Na lyo line mu maBaibolo ayengi apaba ili ishina, babikapo ishiwi lya kuti “Shikulu.” Lesa afwaya ukuti mwaba ifibusa fyakwe, kabili afwaya ukuti ‘mulelilila kwi shina lyakwe.’—Amalumbo 105:1.

Amalumbo ya kwa Yehova. Baibolo nga ilelanda pali Yehova ilabomfya amalumbo pamo nga “Lesa,” “Uwa Maka Yonse,” “Kabumba,” “Tata,” “Shikulu,” na “Mulopwe.” Mu mapepo ayengi ayalembwa mu Baibolo, mwaliba amalumbo ya kwa Yehova e lyo ne shina lyakwe.—Daniele 9:4.

 Ifyo Lesa aba. Lesa mupashi kabili tamoneka. (Yohane 4:24) Baibolo ilanda ukuti “takwaba umuntu nangu umo uwatala amona Lesa.” (Yohane 1:18) Ilalanda na pa fyo Lesa omfwa. Na kabili ilalanda no kuti abantu kuti balenga aba no bulanda nelyo ukuba ne “nsansa.”—Amapinda 11:20; Amalumbo 78:40, 41.

Imibele ya kwa Lesa Iisuma. Lesa taba na kapaatulula kabili alitemwa abantu bonse. (Imilimo 10:34, 35) Na kabili, ‘wa luse kabili wa mutembo, alakokola ukukalipa kabili alifulisha icikuuku ne cine.’ (Ukufuma 34:6, 7) Na lyo line, kwaliba imibele 4 iyo alanga sana.

Amaka. Apo ni “Lesa Wa Maka Yonse,” alikwatisha amaka ica kutila kuti afikilisha fyonse ifyo alaya.—Ukutendeka 17:1.

Amano. Takwaba uwingalingana na Lesa amano. E mulandu wine Baibolo ilandila ukuti e “wa mano eka.”—Abena Roma 16:27.

Umulinganya. Fyonse ifyo Lesa acita fyalilungama. Ifyo acita ‘fyalifikapo,’ kabili ‘taba na lufyengo.’—Amalango 32:4.

Ukutemwa. Baibolo itila “Lesa kutemwa.” (1 Yohane 4:8) Ukutemwa e kulenga alecita fyonse ifyo acita. E ico tulanonkelamo muli fyonse ifyo acita.

Abantunse Kuti Baba Ifibusa fya kwa Lesa. Lesa ni Shifwe wa ku muulu uwatutemwa. (Mateo 6:9) Nga twamucetekela, kuti twaba ifibusa fyakwe. (Amalumbo 25:14) Na kuba Yehova afwaya ukuti mulelanshanya nankwe mwi pepo, kabili afwaya “mulepoosa amasakamika yenu yonse pali ena, pantu asakamana imwe.”—1 Petro 5:7; Yakobo 4:8.

Yesu te Lesa wa Maka Yonse. Yesu aliibela pantu Lesa umwine e wamupangile, kabili ici e calenga Baibolo ilemwita ukuti Umwana wa kwa Lesa. (Yohane 1:14) Ilyo Yehova apangile Yesu, e o alebomfya “ngo waishibisha imilimo” pa kupanga ifintu fyonse, ukubikako fye na bantunse.—Amapinda 8:30, 31; Abena Kolose 1:15, 16.

 Yesu Kristu tatalile alandapo ukuti ni Lesa. Alandile ukuti: “Nafuma kuli [Lesa], ico nine uwa kumulandilako, kabili E wantumine.” (Yohane 7:29) Ilyo Yesu alelanda no musambi wakwe, aitile Yehova ukuti “Tata, kabili Shinwe,” lyena alandile no kuti “Lesa wandi, kabili Lesa wenu.” (Yohane 20:17) Ilyo Yesu afwile, Yehova alimubuushishe lyena alibweleele ku muulu. Na kabili, Lesa alipeele Yesu amaka ayengi kabili alimubikile pa cipuna ca Bufumu no kumwikalika ku kwa kulyo kwakwe.—Mateo 28:18; Imilimo 2:32, 33.

Yesu Kristu Kuti Amwafwa Ukuba Cibusa wa kwa Lesa

Yesu aishile pano isonde pa kuti atusambilishe pali Wishi. Yehova alandile pali Yesu ukuti: “Uyu e Mwana wandi, uo natemwa. Muumfweni.” (Marko 9:7) Takwaba uwaishiba bwino Lesa ukucila Yesu. Alandile ukuti: “Takuli uwaishiba Wishi ifyo aba kano Umwana, na untu Umwana afwaya ukusokolwela.”—Luka 10:22.

Yesu alalanga sana imibele iyo Lesa akwata. Yesu alepashanya sana Wishi ica kuti alandile ukuti: “Uwamona ine, ninshi amona na Tata.” (Yohane 14:9) Yesu alilengele abantu baba ifibusa fya kwa Lesa pantu alebalanga ukutemwa mu fyo alecita na mu fyo alelanda. Alandile ukuti: “Nine nshila ne cine no mweo. Takuli uwisa kuli Tata kano aishila muli ine.” (Yohane 14:6) Yesu alandile no kuti: “Bakapepa bene bene bakapepela Tata mu mupashi na mu cine, pantu Tata afwaya aba musango yu balemupepa.” (Yohane 4:23) Tontonkanyeni pali ici! Yehova afwaya abantu ababa nga imwe, abafwaya ukwishiba icine pali ena.