Amafya ayacitika mu calo, yalalenga abantu balesakamikwa no kulwala. Abengi abakwata aya amafya tabakwata isubilo lya kuti ifintu fikawama. Finshi bacita ifilanga ukuti tabakwata isubilo?

• Tabafwaya ukutontonkanya pa fyo ifintu fikaba ku ntanshi.

• Bamo bamona ukuti ukulanwesha ubwalwa no kulabomfya imiti iyo babinda kuti kwalenga baleka ukulasakamikwa.

• Bambi nabo balanda ukuti ukufwa kwawama.

• Amafya yamo ayo mulekwata nalimo kuti yaba fye ya pa kashita akanono kabili ifintu kuti fyayaluka.

• Nangu ca kuti ifintu tafyalwike, kwalibako ifyo mwingacita ifingamwafwa ukushipikisha.

• Baibolo yalitulaya ukuti ifintu fikaba bwino ku ntanshi.

Baibolo itila: “E ico, mwilasakamikwa pa bushiku bwa mailo, pantu ubwa mailo bukaba na masakamika ya buko. Amafya ya mu bushiku bumo yalilinga kuli ubo bwine bushiku.”—Mateo 6:34.

Mwilasakamana sana pa fyo ifintu fikaba mailo ica kuti mwafilwa no kubika amano ku fyo ifintu fili pali lelo.

Ukulasakamana pa fintu ifyo mulemona ukuti nalimo tafyakabe bwino, kuti kwalenga fye mwalaumfwa ububi ica kuti mwaleka no kulatontonkanya ukuti ifintu fikaba bwino ku ntanshi.

 Kemba wa malumbo uwa ku kale apepele kuli Lesa ukuti: “Icebo cenu ni nyali ku makasa yandi, Kabili lubuuto mu nshila yandi.” (Amalumbo 119:105) Tontonkanyeni pa fyo Icebo ca kwa Lesa Baibolo caba ngo lubuto:

Nga nakufiita toci ilalenga tulemona apo tulenyanta. Ifi fine e fyo Baibolo yaba. Nga tuli na mafya ilatwafwa ukupingula bwino pa fyo tulingile ukucita.

Ulubuuto lulalenga tulemona umo tuleenda kabili kuti twamona ne fili ku ntanshi. Baibolo nayo kuti yatwafwa ukwishiba ifyo ifintu fikaba ku ntanshi.